Ka Nupepa Kuokoa, Volume LV, Number 50, 14 December 1917 — KANONO KA HOOPA'I O KE KOA PAELE. [ARTICLE]

KANONO KA HOOPA'I O KE KOA PAELE.

O kekahi o na hoopa'i kanono loa i hookauia aku maluna o ke koa Paele nona ka inoa -o Aeie Taylor, e ka aha hookolokolo koa ma Honolulu nei, o ia no kona hoopa 'iia ana he iwakaluakumamalima makahiki e noho ai maloko o ka halepaahao ma ka hana ikaika, me ka loaa ole iaia o kekahi uku. O keia ke koa Paele nana kekahi mau hana aihue lehulehu, a nana hoi i ki ae i ka pu, a ku 0 Mrs. Kauwe o Kakaako ae nei, me ka pakele mahunehune ana hoi o na ola maloko o kela home mai ka make mai. Ua lilo na hana a kela koa Paele i mea hookau aku i ka hilahila maluna o na koa oloko o kona puali hookahi, a i ka manawa i kauia aku ai kekahi hoopa'i kanono loa maluna ona, ua hoomamaia ae ko lakou manao, ma 0 kona kaawale loa ana aku i kahi e, e hapala ole ia mai ai ka inoa maikai o kela puali, a o ka lahui Paele hoi. O ka hewa mua loa i hoomaopopoia, i hanaia e kela koa Paele, o ia no kona aihue ana i kekahi uwaki pakeke mai kekahi koa Paele mai no, oiai e hoomoana ana na koa ma ke ano he poe kiai ma ka Papu Limaikaika, ma ka aoao ma Waikiki o ke awa ae nei.

He ekolu po, mahope mai o kela aihue ana i ka uwaki, ua komo aku la keia Paele maloko o ka home o ka ohana o Albert Kauwe, me ka manao aihue elike me ka moolelo o na mea i hanaia, i puka aku ai maloko o na nupepa. He eha hoi la mahope mai o kela manawa, ua komo aihue hou aku la no kela koa Paele maloko o ka home o Sawyor Nichioka, me ka hoao ana e pu'e i kekahi wahine Kepani, a e ole wale no e hoea koke mai ke kokua, ua mama na wawae o kela Paele i ka holo. Aole malaila iho la pau na hana kolohe a kela Paele, aka ma ia po hookahi no, Ua komo aku la oia maloko o ka hale o Lee Sew, me ka manao e aihue, a pela maloko o ka hale o Mrs. A. B. Lau, a lawe aihue mai la i kekahi mau waiwai, he mau lako gula, ame na dala maoli he kanakolu-kumamalima. Ua apono ke Kenerala Wisser i ka hoopa'i i kauia aku maluna o kela Paele e ka aha hookolokolo koa, a e hoounaia aku ana oia no ka Mokupuni Neil, Wakinekona, kekahi o na halepaahao o ka oihana koa o Amerika. __