Ka Nupepa Kuokoa, Volume LV, Number 45, 9 November 1917 — HE HOALOHALOHA NO OBED K. KIKALA, UA HALA. [ARTICLE]

HE HOALOHALOHA NO OBED K. KIKALA, UA HALA.

E Mr. Lunahooponopono, Aloha oe:—E oluolu hoi oe e hookomo iho ma kahi kaawale o ka kaua hiwahiwa i kela wahi poomanao e kau ae la maluna, i ike mai ai na ohana, na makamaka ame na hoaloha o kuu kane hele loa, e noho mai la ma ka hikina a ka welona a ka la i Lehua. Ua haalele mai kuu kane aloha ia'u me ka luhi a maua, me na keiki i hooneleia i ka makuakane, me ka ohana no apau me ka hoomanao mau aku iaia, no ka manawa mau loa. He makuakane oluolu, lokomaikai, akahai, he aloha ohana, he ike i ka poe kiekie a haahaa; nolaila o kana mau mea apau i hana mai ai ia'u, me kuu ohana, aole loa ia e poina. Auwe kuu luuluu no kuu kane hele loa a! Ua haalele mai oia ia makou i ka mahina o Okatoba, la 18, 1917, hora 11 o ka po, aole oia i poina ia'u me ka ohana ahiki i kona moe ana no ka wa mau loa. Ua loihi no ka hoomailo ana a ka ma'i maluna o kona kino, ua hoihoi ia oia i ka halema'i o Keokea, no eono pule no ke ake no e loaa mai ka lanakila, eia nae ua poho wale ia upu ana, ua kii au a hoihoi hou mai iaia iwaho nei, no ko'u ike no aole oia e lanakila ana, nolaila ua piha na la he 29 o ko maua noho pu ana a haalele mai la oia ia'u me ka ohana apau. Ua hanauia kuu kane hele loa ma Lahaina, Maui, i ka mahina o Mei 15, 1867, mai ia Muee (w) ame Kikala (k), he hookahi wale no oia a kona mau ma-

kua, a ke Akua i hoohua mai ai. Ua mare aku oia me kana wahine mua, ua loaa ia laua he ekolu mau keikikane, make aku hookahi koe elua e ola nei. Ua piha na makahiki he 50 a oi o kona hanu ana i na ea huihui o keia ola honua ana. Ua hoohuiia maua ma ka berita maemae o ka mare i ka mahina o Ianuari 15, 1902, ma Kalihi-kai, nolaila ua piha ia maua na makahiki he 15, 9 mahina me ekolu la o ko maua noho mare ana. Aohe pua oliva i loaa ia maua a hala wale aku la no oia. Ma Kalihi-kai ko maua wahi noho no na makahiki loihi, a he hookahi no ona makahiki a oi o ka noho hou ana ma Maui nei, a haalele mai la ia'u me ka ohana. Auwe kuu minamina pau ole e! He kamaaina i na haku pena o Honolulu, ua ike ia oia e ka poe apau mai ke kiekie a ka haahaa; o kana oihana wale no ia, a hala wale aku la no. He kanaka hoomanawanui iloko o kona mau ehaeha he nui. He hoahanau oia no ka Ekalesia o ka Poe Hoano o na La Hope nei. Ua hoonaauaoia oia ma ke kula Bihopa o Wailuku, i kona mau la opio. E Kalihi-kai e, ua pau kou hoopulu hou ana i na papalina o kuu mea aloha, ua pau hoi kou lohe hou ana i kona leo, ua pau hoi kona kipa hou ana i ko oukou mau ipuka hale, he mea hoi na'u e poina ole ai iaia. Auwe kuu hoapili e, o ia aina malihini i noho ia ai; auwe kuu minamina pau ole i kuu kane hele loa e, kuu hoa pili o kuu mau la opio aloha wale a! Pela pu hoi me kuu Club Lei Hala, ua pau ko oukou ike ana iaia ame kana mau kokua ia kakou. Auwe. kuu minamina pau ole i kuu hoa pili e! Me na manao walohia, a kaumaha no kuu mea aloha he kane, a'u e poina ole ai i kona moolelo ke hoomanao ae. Ke haawi aku nei au i ka'u hoomaikai i na ohana, na makamaka ame na hoaloha apau, i komo pu mai me a'u, ma kona huakai hope loa ame ka poe apau i haawi mai i ka lakou mau boke pua no kona kino wailua. Ke nonoi pu ae nei no au i ka Makua mana loa, Nana no e kiai mai ia kakou apau iloko o Kristo Iesu, Nana i haawi mai a Nana no i lawe aku, o ke kanaka i hanauia e ka wahine he hapa kona mau la. O makou iho no me ka luuluu, MRS. ROSE KIKALA, Me ka Ohana.