Ka Nupepa Kuokoa, Volume LV, Number 5, 2 February 1917 — HE PUOLO WAIMAKA ALOHA. [ARTICLE]

HE PUOLO WAIMAKA ALOHA.

E Mr. Lunahooponopono o ka Nupea Kuokoa, ka nunu lawe leta o na kai ewalu o Hawaii, Aloha kaua: —E oluolu mai kou ahonui e hookomo iho ma kahi kaawale o kau hiwahiwa i ka'u ukana luuluu, o ia hoi kela mau huaolelo walohia e kau ae la maluna no ka'u mea aloha i haalele mai ia'u, a hala aku la no ka hopena mau o na mea ola hanu, i ike mai ai na kini makamaka ame na hoaloha, ka nui ame ka lehulehu o na ohana o kuu kane, mai ka la hiki ma Kumukahi a ka welona a ka la i ka ilikai o Lehua. Ae, ua hala, ua pau, ua haalele mai i keia ola ana o Clement M. Akaka ma ka la 28 o Dekemaba, 1916, i hala, iloko o na la kakaikahi wale no o kona kaa ana iloko o ka ma'i fiva nawaliwali, a waiho iho la ia'u ame ka luhi a maua i lei ai iloko o na haawe luuluu o ke kaumaha, a pela hoi me ka ohana, e paiauma aku nona ma keia aoao o ka muliwai eleele o ka make. Aloha wale! Ua hanauia oia ma Kamanuwai, Honolulu, ma ka la 15 o Aperila, 1882, mai na puhaka mai o Kaiwi (w) ame M. Akaka kona luaui makuakane; nolaila ua piha iaia na makahiki he 34 a oi o kona ola ana a hala wale aku la no kela home ma o, kahi e hoomaha ai i na ehaeha ame na luuluu o keia ola honua ana. He oiaio o na lima o ka Mea Mana Loa ka i kipa mai a lawe aku la i ka hanu ola ame ka uhane o kuu kane aloha, oiai, ua paa iloko o kona lima na manawa ame ka hopena o ko ke kanaka ola ana, a ko ae la ka mea i oleloia, he mahu ke ola o ke kanaka i pua ae a nalo aku. Aka, o Kona makemake ke hanaia. Nona no ka hoonaniia i keia wa a mau loa aku.

Auwe! Auwe kuu kane, kuu hoa pili o ka ulumahiehie o Honolulu, hoolaukanaka i na hoa o ka imi ana i ka pono o keia ola ana. Auwe kuu kane i ke awalau o Puuloa, i ka i'a papa i ka leo, mai walaau oe o makani auanei. Aloha ia wahi a maua i pili koolua ai.

Ua pili aloha ia e maua ka uhiwai o ke Koolau ame Laie, aina i ka eheu o na manu; ua pawehi i na hunakai o Hauula, ame ka ua kaalina o Kahana, e nihi hele ae la i na pali. Eia aku nei paha ilaila o M. Akaka kahi i walea ai, akahi ka hooko-o i ka pili aloha a maua. Aloha ino! Aloha olua e Heeia ame Kaneohe puuwai hamama: aloha ka la'i o Oneawa i Kailua, i ke ala o ka lipoa; aloha o Waimanalo aina kua-makani ia kaha a maua i noho ai a kupa; aloha na kini lehulehu o ka alo pu ana o ka inea. Ua hala o Akaka aole oia e hui hou ana me oukou no ka wa mau loa. Ua pau, ua hooko-o

aku la ma o. Aloha kuu kane, a ka ihu o ka moku i lawe a ike i ka la'i o Lahaina, ka malu he-kuawa o Wailuku ame ke kua hiwi kukilakila o Haleakala. Aloha ka nani o Kahului i ka linohau a na kaa otomobile. Aloha ia mau kini o ka aina u makou i pili ai. Kuu kane a ka ihu o ka Maunakea i lawe a hoea i ka uluwehiwehi o Hilo kaona, kau aku ma ke kaa oni i ke alahao aia ka palena i ka luapele, e kilohi ana i ke ahi a ka wahine me na ohelo nee i ka papa. Eia aku nei paha oe ilaila e kuu aloha i ke kui lei pua me Hiku i ka nahele, o ka hele no ka ia manao ole mai he hoapili i hope nei, maliu ole mai ia'u ke hea aku. Auwe kuu aloha i kuu kane e, kuu minamina pau ole ia oe! E huna iho ana e nalo, haina e ka waimaka hanini mawaho, o ka'u hana ia e uwe nei ia oe a! Ke hooki nei au me ka mahalo nui i ka Lunahooponopono ame na keiki hooni uwila o ka papapa'i. Owau no me ka ukana luuluu a loko e hana nei. MRS. M. AKAKA. Kapalama, Jan. 17, 1917.