Ka Nupepa Kuokoa, Volume LIV, Number 48, 1 December 1916 — ELUA MAKAHIKI I KOE MAKAUKAU KE ALAHUKI MOKU. [ARTICLE]

ELUA MAKAHIKI I KOE MAKAUKAU KE ALAHUKI MOKU.

He elua makahiki o koa i koe e kakali aku ai, alaila hoea mai i ka pau pono ana o na hana ma ke alahuki moku o Puuloa, elike me na lono i loaa mai ma ka pule aku nei i hala; mai Wahinekona mai. Imua o ke komite o ka oihana kaua o ka hale o na lunamakaainana o ka ahaolelo lahui i hoike ae ai ka Adimarala Harris, o ka mahine o Iune, o ka makahiki 1918, ka manawa e paa ai ke alahuki moku ma Puuloa, me kona hoakaka pu ana ae, he manaoio kona, aole e ike hou ia ana ka pilikia, elike me ke alahuki moku mua o ke kapiliia ana, he mau makahiki ae nei i hala. Ma ka oleloia, ina no ka paa o ke alahuki moku ma Puuloa, o kela ke alahuki moku nui hookahi ma ke ao nei, a o ke alahuki moku maikai hookahi no hoi, i lihi launa ole mai na alahuki moku e ae me ia. Ma ka manawa i hiolo ai ke alahuki moku mua o ke kukuluia ana, ua manao ke aupuni o Amerika, e hoopau loa i ka manao kapili i alahuki moku, aole nae pela ka manao o na enekinia, o lilo kela manao hoopau, i kumu e hoohokaia ai na ike o ke kanaka, aka ua paakiki no na enekinia, e hoomaka koke ke kukulu ana i alahuki moku hou. Ua hoea mai kekahi papa komisina mai Amerika mai, no ka huli pono ana i na kumu i hiolo ai ke alahuki moku mua, me ka huli pu ia ana no hoi o na mea e hana aku ai, me ka paa e hiki hou ole ai ia Kaahupahau ke hoohiolo, a me na ike i loaa i na enekinia, pela e kapili hou ia aku ai kela alahuki moku.