Ka Nupepa Kuokoa, Volume LIV, Number 39, 29 Kepakemapa 1916 — HE HOOMANAO ALOHA NO MRS. PAALUA KAAI. [ARTICLE]

HE HOOMANAO ALOHA NO MRS. PAALUA KAAI.

Elike me ka hikiwawe loa o ka anapu ana a ka uwila a holo hikiwawe ae la kana hoomalamalama ana ma na welelau o ka honua, a i ukaliia mai hoi e ka leo uiuina a nakolokolo o ka hekili e koni paapaaina ana ma na paia lewa lani, pela iho la ka hikiwawe ame ka emoole o ka lono kaumaha i pahola ae ma ka hora 11 a. m. o ka la 10 o Augate, 1916, o Mrs. Paalua Kaai, ua hala, ua haalele mai ,a ua hele loa me ka noonoo hou ole mai i na mea e pono ai o keia kino mahope nei, e ahu moka ki ana, haalele pu mai la i kana mea aloha he kane, na lei aloha a laua, na moopuna, ka ohana, na hoa paahana pu iloko o ka ka Haku hana, ame na hoaloha he lehulehu wale, a alualu aku la i ka lei mae ole o ke ola mau loa i kama ia a i hakuia me na pua rose o ka maha, ka hauoli ame ka noho oluolu ana o ka uhane, ka lei mae ole i hoomaukaukau ia e ko kakou Haku lesu Kristo no kona poe kanaka iloko o k@ e nei, i hana me ka hoomanawanui, paupauaho ole, kunukunu ole, a i hooko hoi i na kauoha ame ka makemake o ko kakou Haku lesu Kristo Ua lilo nae keia haalele ana mai o Mrs. Paalua Kaai i keia ola honua ana i hamare koikoi loa e palukuluku ana i na puuwai he lehulehu wale mahope nei, me ke kaumaha, ka luuluu ame ke aloha paumako mai ia makou na hau mana o ke Kula Sabati ame na lala o ka Ahahui C. E. o Waialua, Honouli ame Kainalu i huiia, a i oi loa aku hoi maluna o ka mea aloha he kane, kona hoa uhaiaholo pu iloko o na inea ame na popilikia o keia ola honua ana, ka hoa i alo pu iloko o na ale kupikipiki-o o ka moana kai akea, no ka lawe ana i ka lamaku o ke ola iloko o na aina i hookahuaia ai ka naaupo, a i ulu paapuia e na ao eleele panopano o ka pepana ame ka hoomanakii, ka hoa pili paa loa i alo hoomanawanui pu me ka hookae ole i na palapu ame na popilikia o ko kakou mau oaloha e noho mai la me ka ehaeha iloko o Kalaupapa ame Kalawao. Auwe, luuluu wale no hoi ke kino i ka hana mao ole a ke aloha! He paahana ikaika o Mrs. Paalua Kaai no ke Kula Sabati ame ka Ahahui C.E. o Waialua, Honouli ame Kainalu i huiia. Iloko o na hana lulu kokua, o Mr. Paalua Kaai kekahi o na haumana pookela ma ia mahele hana o ke Kula Sabati ame C. E. Ma na mahele hana e ae o ke Kula Sabati ame C. E., he ikaika, he hoomau, he kunukunu ole, a e hoomanawanui maoli, a ua lilo ia mau hana a Mrs. Paalua Kaai i kiahoomanao poina ole na ko makou Kula Sabati ame ko makou Ahahui C. E. e hoomanao mau ai. Ua kuu ka luhi o Mrs. Paalua Kaai, ua hiolo aku na inea o kela keia ano, a ua hanee aku hoi na puu kinikini o ke kaumaha mai kona hokua a he manaolana kulanalana ole, ua hoolei aku la ka heleuma o ko Mrs. Paalua Kaai moku uhane iloko o ke awa pohu la malino o ke Kanaana heu. Me ia mau hoomanao poina ole ana nona, nolaila. e hooholoia: Ke komo pu aku nei ke Kula Sabati ame ka Ahahui C. E. o Waialua, Honouli ame Kainalu huiia, ma o ko makou komite la. no na hoomanao aloha ana me ke kane aloha, Rev. D. Kaai, na keiki ame ka ohana i hooneleia i ka makuahine. Ke nonoi aku nei i ka Makua Lani e lawe ae i na ehaeha, na haawe kaumaha a luuluu i ili iho maluna o ke kane, na keiki, ka ohana ame na hoaloha. E hoounaia i hookahi kope o keia hoomanao aloha i ke kane ame ka ohana a i na nupepa Hawaii, ke Kuokoa ame Ka Hoaloha. Ko makou komite, J. NAKALEKA, S. K. NAMAKAOKAIWA, J. K. KAUPU, A. K LAUMAUNA.