Ka Nupepa Kuokoa, Volume LIV, Number 22, 2 June 1916 — O DAVID KAIWI KAHELEMAUNA UA HALA LOA. [ARTICLE]

O DAVID KAIWI KAHELEMAUNA UA HALA LOA.

Aohe hope e hoi hou mai ai, ua hele loa no, ua oili mai o D. Kaiwi mai ka puhaka mai o Mahi, ka makuahine o Kahelemauna ka makuakane, ma Kahakaaulana ae nei, ma Waikiki ae o ke awa o Kalihi, a ma Ewa aku hoi o kahi e hoomalu ia nei na limahana. Ua haalele mai oia i ko makou puulu pu ana, a niau palanehe aku la kana hele ana, huna na maka nalo i ke aouli. He lala oi pookela oia no ka bana puhiohe o ke Kalana o Honolulu nei, a aole no he lua e loaa iwaena o ka lahui Hawaii elike aku me ia ma kana ohe i aoia ai. O kana kumu mua loa nana i a'o mai iaia i kela ohe, o Mekia Kealakai, e noho mai la i Kapalakiko, a e hoea aku ana ka lono kaumaha ua hala kana haumana aloha ma kela ao. Ua kamaaina ia o D. K. Bone e ko nei, a hoea loa aku no i ka Ipuka Gula o Kapalakiko kona polopeka ma kana ohe flute ame picolo, he moakaka lea loa kona makaukau me ka hoohewahewa ole ia. He puuwai piha lokomaikai i na mea apau i kamaaina i kona mau maka, a he ai, he iʻa, he home leo ole i na hoaloha apau e kipa aku ana i ona la, a o ka poe apau i kamaaina i na ano maikai apau o D. K. Bone, e hemahema ana lakou apau ke hoea aku i kauhale aohe kamaaina ua hala, ua ko'eko'e ka home aohe ahi olalo e pumehana iho ai, ua hala, ua nalo loa.

Ua waiho iho la i kona hoapili o ka ua, o ka la, o ke anu me ke koʻekoʻe, he wahine, he mau kaikamahine, kona kaikuahine, kona makuakane hanai, na moopuna, na hoaloha, ame makou pu no hoi o ka oihana hookahi, ka oihana no hoi nana i hookamaaina mai ia makau apau kekahi i kekahi, a i auamo pu no hoi i na hana apau o ka oihana ma na wahi apau i makemakeia no ka hana. I ka ua e lokuhala ole ana, o makou pu no me D. K. Bone, o ka la welawela e kikiki ai ka hou i na maka, o makou pu no me D. K. Bone; a maluna o na ale hulilua o ka moana, o makou pu no me D. K. Bone, a ma na wahi no hoi apau iloko o keia Kalana o Honolulu nei, o makou pu no me D. K. Bone. Ua hala oia, ua hala nae me ka minamina nui ia, a me ke aloha ia e ka poe apau i kamaaina i kona makaukau hoopaapaa ole ia, aohe mea nana e kikoni i kona lae ma kana ohe i aoia ai, a he lima akau maopopo loa no ka hanohano o ka Bana. Ua hala, ua lawe aku la no ka mea Nana i hana, a o na u ana ka i waiho ia iho na ko hope nei poe e paiauma aku me ke aloha oiaio o ka paumako lihaliha. Aole loa na kulu pakaua kukalahale o Honolulu nei e pehi hou i kona mau maka aloha, aole no hoi kona mau kapuai aloha e hehihehi hou ma kona mau alanui, o na lehulehu kai aloha o Kahakaaulana, aole lakou e hoopulu hou ana i kona mau papalina aloha. O na hoaloha i maa ma ka puili lulu lima aloha pu ana, aole lakou e lululima aloha pumehana hou ana, aole no hoi kona leo aloha e lohe hou ia, ma na kaiaulu aloha o Hawaii nei, a aole no hoi ma na aeone o Kalia me Kahakaaulana; ua hala, ua nalo, ua kihiloa ka hele ana huna nalo na maka i ke aouli. Pouli, poele, ka hale, ua hala ka ipukukui e malamalama ai ka home, hala ka ai, hala ka iʻa, hala pu no me na mea apau e pono ai ka noho ana o nei ao mauleule; o ke ahi olalo o ka wahine e pumehana ai ua hala. Nolaila, o makou o ka poe no lakou na inoa malalo iho, a ma ka aoao hoi o ka puali puhiohe o ke Kalana nei, ke komo pu aku nei me oe e ka wahine i hoonele ia i ka makua, a me kona kaikuahine, kona makuakane hanai, na kaikamahine ame na moopuna, na pili makamaka no apau, e auamo pu ae i na haawe koikoi o ke kaumaha luuluu no ka kakou me aloha i hala loa, a ke kalokalo pu ae nei no hoi i na mana lani e hoomama mai i na luuluu apau au e auamo wahine la ame makou no hoi e auamo pu nei. Na oia mau ke Akua, ka Makua, oia mau ke Akua ke Keiki, oia mau ke Akua, ka Uhane Hemolele, e hoomama ae i na hakuʻikuʻi aloha kane mai kou puuwai kupilikii ae, a na lakou pu no e holoi ae i na waimaka pili aiku apau mai kou mau maka aloha ae, a e loaa no ka maha ia oe, me ka ohana apau noluna mai, a iloko o ka inoa o Iesu Kristo, hookahi wale iho no nae, Amene. O makou iho no, KALANI PETER, JOHN AMAAIU, S. K. KAMAKAIA.