Ka Nupepa Kuokoa, Volume LIV, Number 2, 14 Ianuali 1916 — MAKAIWA I KA EHUKAI. [ARTICLE]

MAKAIWA I KA EHUKAI.

Ma ka hora 10 o ka po Poalua nei, Ianuari 4, 1916, ua pii mai ke kai nona ke kiekie o 5 a i ole ia o 6 paha kapuai ke kiekie me ka hapai ana i na kua awapo o Makaiwa ame ka uhi pu ana i ka pohaku palekai no ke alanui aupuni. Ua loihi no hoi na makahiki o kou mea kakau o ka noho ana ma keia aina, aole au i ike i kekahi kai nui, elike me keia, ke hapaiia la ke kua uwapo nona ka loa o 60 kapuai, a me kekahi mau kua okoa aku 12 a 24 loa. Nani no ko ke Akua mana, e holopuni nei ma ke ao holookoa. Eia hou no keia, ma ke kakahiaka Poaono ae, ua kau mai kou mea kaku ma ka otomobile o Mr. Daniel o Laiewai no Honolulu, a ma ia kakahiaka i ike kumaka iho ai kou mea kakau i ka hana a ke kai ma ua kakahiaka la, ua po'aia mai e ke kai kekahi mau wahi o ke alanui aupuni a pela me kekahi mau uwapo, a ua piha pu hoi kekahi mau wahi o ke alanui me ke kai, a ua kohu mokuluu na kaa otomobile ia kakahiaka, aka, ua manaolana kou mea kakau e pau mai ana keia mau pilikia i ka hana ia e na limahana lima hei i ka hooniho pohaku o kuu one kulaiwi. E aho hoi ia ola ia kini ke a mai la ke ahi. He ma'u wahi meahou ia o ke Koolau malia o huli ke au o ka laki wahi meahou, alaila hoouna hou aku no kou keena e kuu Solomona ahonui, a me na keiki limahei o kou papapa'i ka welina. Samuel W. Kauhi. 737 Kawaiahao Road, Honolulu, Ianuari 10, 1916.