Ka Nupepa Kuokoa, Volume LIII, Number 34, 20 ʻAukake 1915 — O MRS. MARY KEOLA KEKAPAI UA HALA. [ARTICLE]

O MRS. MARY KEOLA KEKAPAI UA HALA.

Ia oe e ka Lunahooponopono o ka Nupepa Kuokoa:—E oluolu hoi oe e uwila ae i kela poomanao o ke aloha e kau ae la maluna, ma kahi kaawale o ka hiwahiwa a ka lahui, i ike mai ai na ohana, na makamaka ame na hoaloha o ko kakou mama aloha i hala ma ke ala mau o na mea apau. Ua pauaho mai o Mrs. Mary Keola Kekapai i keia ola ana, i ka la 23 o Iulai o ka mahina i hala, malalo o ka hoomailo ana a ka ma'i maluna iho o kona kino, iloko o na mahina loihi ae nei i hala, ua huli ia ke ola, aole nae he lana mai, a haalele wale mai no ia makou kana poe keiki me kana kane i hoonele ia i ka hoa pili. Luuluu wale! Ua hanau ia ko makou mama aloha ma Makawao, Maui, i ka makahiki 1856 mai kona makuahine mai o Kaaie ame Kamalanai kona makuakane; ua piha iaia he 59 makahiki o ka hanu ana i na ea huihui o keia ola ana, a haalele wale mai no ia makou kana poe keiki, kona hoapili ame na moopuna i hoonele ia i ke kupunawahine, e u mau aku nona. Aloha wale! Ma Waiakoa, Kula, Maui, ko laua wahi i mare ia ai i ka makahiki 1873; ua piha ia laua he 42 makahiki o ka noho pu ana iloko o ka nohona maemae o ka mare, ahiki i ka manawa i kani mai ai ka pu a ka Anela, moku ae la ke kaula, lawe aku la ka Haku i Kana o ka uhane, waiho iho la i ka lepo i mea hoomanao mau aku i ko makou mama aloha i na la apau. Minamina wale! He makuahine haahaa, hoopono, a heahea i na mea apau, mai ka poe loaa a me ka poe nele, e kipa aku ana i ko laua home aloha ma Waiakoa, Kula, Maui. He makuahine aloha keiki, a he mea nui no hoi kana poe moopuna iaia, aole no hoi oia i hoohewahewa mai ia makou ahiki i kona hiamoe loa ana aku la. He hoahanau oiaio oia no ka hoomana o na La Hope nei, a he makuahine makee hoi i na hana maikai apau. He hoa kuka ekahi no ka Hui Manawalea o Pulehu, Kula, Maui, no 10 makahiki, a mahope mai, ua hoopii hou ia ae oia i Peresidena no ka Hui Manawalea o Pulehu, Kula, Maui, no eha makahiki, i ka wa i haalele mai ai ka Peresidena, Mrs. Mary Forsyth, a hoi aku oia no Laie; nolaila ma ia kulana oia i noho ai no eha makahiki, a he puuku no hoi no ia ahahui. Nolaila o makou ka Ohana i hoonele ia i ka mea aloha he mama, ke haawi aku nei makou apau i na hoomaikai palena ole i na ohana, na hoaloha ame na makamaka i launa pu mai me makou i kona huakai hope loa ame ka poe apau i haawi mai i ka lakou mau hoohiwahiwa no ko makou mama aloha. Nolaila ke waiho nei makou i na mea apau iloko o Kristo Iesu no ka mea Nana no i haawi mai a Nana no i lawe aku. Amene. Me na keiki oniu hua o ke Kuokoa ka welina pau ole o ko makou aloha. Me ka oiaio ke kakau nēi makou i ko makou mau inoa: Miss Albertina Jeager, Miss Emily Wilson, Miss Rose Paio, Miss Glady Wilson, Mas. Wilson Cleveland, Mas. Eddie Wilson, Mr. E. H. Kekapai, Mr. Edward Kika|a, Mr. ame Mrs. Cleveland, Mr. ame Mrs. Kikala, Mr. ame Mrs. Wilson, Mrs. Paio. Ma ka lono kelekalapa o ka loaa ana mai i keia kulanakauhale ma ka Poalua aku la, e hoakaka maopopo loa mai ana ia, no ka hookohu hou ia ana mai nei o ka Lunakanawai Whitney ma ke kulana ana e paa nei i keia manawa.