Ka Nupepa Kuokoa, Volume LIII, Number 31, 30 July 1915 — OLELO HOOHOLO HOALOHALOHA NO HON. DAVID KALAUOKALANI, MAKUA. [ARTICLE]

OLELO HOOHOLO HOALOHALOHA NO HON. DAVID KALAUOKALANI, MAKUA.

O makou o na lala o ka Hale o na Alii o Hawaii, ke komo pu aku nei makou me ka eehia lihaliha, paumako kumakena, e uwe a e kanikau pu me ka wahine kanemake ame na keiki makua ole, a ke Alii Kalauokalani i hala koke iho nei i ke ala hoi ole mai. A oiai, o ke Alii Kalauokalani i make aku nei, ka pohaku kihi, nana no i kukulu i ka Hale o na Alii o Hawaii. Nolaila, ke komo pu nei makou me ka ilihia kumakena kanikau kulipolipo nona, ke alii kukulu hale kiahoomanao o na Kamehameha: na Haku kanu o ka aina. A ke pule nei makou ka Hale o na Alii o Hawaii, i ko kakou Makua, ma ka lani kiekie loa, he malu ma ka honua, a he aloha no i na kanaka. Nana no e hoomama mai i ko kakou mau naau luuluu, ilihia kuhohonu, uwe haalipolipo, a kumakena paumako no ke Alii Kalauokalani i nalo iho nei. I hookahi kope o keia Olelo Hooholo Hoalohaloha, no ka Nupepa Kuokoa hookahi kope no ka Buke Moolelo o ka Hale o na Alii, a hookahi kope na ka ohana. Komite Hoalohaloha— Edward K. Lilikalani, Abraham Kaleikau, Solomon Peleiholani, Gulstan K. Poepoe, Joseph Kawainalulu, Mrs. Ruth Lilikalani, Mrs. Maryan Kaleikau, Mrs. Kahalelehua Notley, Mrs. G.K. Poepoe, Mrs. Rebecca K. Johnson, Miss Maria Maunakea, Miss Julia Pauahi. Iulai 28, 1915.