Ka Nupepa Kuokoa, Volume LIII, Number 14, 2 April 1915 — HE HOALOHALOHA NO KO MAUA AUNTY ALOHA MRS. E. H. BAILEY. [ARTICLE]

HE HOALOHALOHA NO KO MAUA AUNTY ALOHA MRS. E. H. BAILEY.

Mr. Hanohano. Aloha kaua: — E oluolu mai hoi oe e hookomo iho ma kahi kaawale o ka Nupepa Kuokoa i keia puolo kaumaha e kau ae la maluna, he hoomanao aloha na'u ame kuu kaikaina, no ko maua aunty aloha.

Iloko o ka nanea ame ka hoihoi o na manao, me ka mahui, mua ole, eia ae he lono kaumaha e hiki mai ana, a kohu Anela i lele ae mamua o'u me ka helehelena pihoihoi, a lohe ae la i ka leo o ka hoaloha i ka i ana mai he leo kaumaha ka'u e ha'i aku ana ia oe o mama Mrs. Emily Bialey ua make ma ka po Poalua, Maraki 16. Auwe ae la au me na waimaka e iho makawalu ana no kuu mama aunty aloha. No kuu aunty i hala aku la i ke ala hoi hou ole mai, he makuahine aloha oia i ka hana a ke Akua, a he hoahanau kahiko oia no ka halepule Kaahumanu o Wailuku, Maui, he hoa paahana iloko o na hana maikai, a he C. E. no hoi, a ua a'o pu mai no ia makou i kana poe keiki i ka hana maikai. He makuahine aloha i ka heluhelu Baibala i kela a i keia la, a he mea nui no ka Baibala iaia. He mama hoopono ka nohona home ana he aloha ohana, kokua i ka poe pilikia ahiki i kona haalele ana mai la i keia ea huihui o ka noho ana. He ekolu ana mau keiki, ua hala mua kana keikikane o William Bailey a koe iho la na kaikamahine elua. Nolaila ua piha ia Mrs. Emily Bailey he 84 makahiki o kona hanu ana i na ea huihui o Iao Valley. Elua ana mau kaikamahine hanai, ua hala hookahi oia o Mrs. Tilon Dutro ame Mrs. Annie M. Kennedy, e noho nei ma Honolulu. Aloha, aloha ka makua, aloha ka pali uliuli o Iao Valley kahi a kuu aunty aloha i aloalo iho ai me na malihini. Huli ae hoi no Makawao i ka ua Ukiukiu e pohala mai ana, i kuu aunty e huli hoi ana no Makawao; pa mai ka ua ame ke anu mea ole ka nohona o Makawao, aloha ke kula loa o Kalena, kahi a'u ame kuu aunty aloha e auwana ana i na opae, ke kau mai la ka rain Ukiukiu ame ka ohu e hea mai ana i kuu aunty aloha e naue ae, a e kipa me Niolopua. He mea ole ke anu o kakahiaka, ua ala kuu aunty aloha i ka wili waiupaka. Aloha, ua pau kona ike hou ia, ua hoi i ka poli o Iesu Kristo. He mea nui kana poe moopuna iaia aole oia i paupauaho mai i ka malama ana ia makou, na keiki ponoi ana ahiki mai ia makia na keiki a kona kaikaina, o ko makou mama Annie Miner i hala mua ma o ma kela ao nani. Nolaila e kuu mau kaikuaana, ke komo pu aku nei au me kaina Mrs. Louisa Mossman iloko o ka auamo pu ana i na kaumaha ame ke kanikau ana no ko kakou mama aloha; a ke pule nei au i ko kakou Haku Iesu e hoomama mai ia olua ame ka ohana apau ame a'u pu kekahi. Nolaila elike me ka olelo a ka buke nui, Nana no i hana mai, a Nana no i lawe aku a moe aku la iloko o kona poli aloha. Huli ae la au a nana aku la i ka mahina ame ka hoku me he mea la o kuu aunty aloha kekahi. E hoomaihai ia kona inoa, Amene. Me ka mahalo nui ia oe e ka Nupepa Kuokoa. O maua me ka luuluu. MRS. ANNIE M. KENNEDY. MRS. LOUIS L. MOSSMAN.