Ka Nupepa Kuokoa, Volume LII, Number 27, 3 July 1914 — UA HALA O MRS. SCUDDER [ARTICLE]

UA HALA O MRS. SCUDDER

Mahope o ke kaa ma'i ana me kekahi ma'i ikaika loa no na pule eono i hala, ua kii mai la na anela a lawe aku la ma kela aoao o ka muliwai eleele o ka make, ia Mrs. Doremus Scud der, ka wahinemare a ke kahunapule o Kaukeano, ma ka hora ekolu o ka auwina la o ka Poalima i hala. Aole i maopopo iki i ka lehulehu keia ma'i ona o ka make ana nae ka mea i lohe ia, a ua lilo ia mea hou e pili ana i kona make i lono hoopuiwa loa, kekahi poe o Honolulu. Aole oia e kanuia ana ma Honolulu nei, aka, ua puhiia kona kino make, a o ka lehu e hoihoiia aku ana ma Winchester. Mokuaina o Masakusta no ke kanu pu ana aku maloko o ka ilina e waiho mai la ka laua mau keiki. he anaina haipule ka i malamaia nona maloko o ka halepule o Kaukeano ma ka auwina la Sabati iho nei e ke Kahunapule Ebersole. Mamua aku o kona mare ana i ke kane, o Eliza Jane Candfield kona inoa a ua oili mai oia mai kekahi ohana kaulana mai o Amerika Huipuia, a ma ka Mokuaina o Wisconsin kona wahi i hanauia ai ma ka la 17 o Iune, 1859. Ua hoohalaia kona mau la opio ma kahi hanai holoholona a mahiai me kona makuakane ahiki i ko laua nee ana i Sparta, Wisconsin, a ua lilo kona makuakane i kanaka koikoi maloko o ia Mokuaina. Mahope o kona hookuu maikai ia ana mai ke kula kiekie mai ua komo hou aku oia i ke Kula Kiekie o Vascae me ka pana o ka 1884, a oia no hoi ke kaikamahine mua loa i komo i ke Kula Kiekie ma ka Hikina mai kela Mokuaina aku, a mamuli o ka make koke ana o kona makuahine i oki pokoleia ai kona noho ana maloko o ia kula mamua o kona puka maikai ana mai. Elua makahiki mahope mai o kona hookuuia ana mai ke kula kiekie mai ua holo aku oia no Iapana ma ke ano he kumu mikanele malalo o ka Papa

Amerika, malalo o kona mau lilo ponoi, a ma Nigota, he kahua misiona mamao loa maloko o Iapana, i noho hana ai oia, a malaila oia i hui ai me Doremus Scudder, oiai o Mr. Scudder e noho ana malaila ma ke ano he kauka no na kumu mikanele, me kona kaikuahine, a ma ka la 21 o Iune 1888, i hoohuiia ai laua ma ka mare, a ma ka hapa hope o kekahi makahiki mai, mamuli o ka loaa ana o kekahi o ko laua ohana i ka ma'i i hoi hou ae ai laua no Amerika, a ia laua i noho ae ai malaila i hoomaka ai ke komo kuhohonu ana aku a keia paahana a ke Akua e hana ma na kihapai maloko o ke kulanakauhale o Kikako Burukeline Woburn a o ka hope loa iho la ma Honolulu nei. Eono a i ole ewalu paha mahina i hala hope aku nei, he wahine kino ikaika maika no ka ola maikai kona ola kino, haoha maikai kona helehelena, a ua hoohala mau oia i kekahi o kona manawa ma ka pii mau ana i kuahiwi a i kekahi manawa e hele mau ana i ka auaukai, a ma ia mau hana i lilo ai oia he lala no na ahahui pii mauna ame ka ahahui Outrigger, a he lala no hoi no ka ahahui o na kula kiekie kuloko. No na makahiki eono e hoomaka ana mai ka 1904 mai a pau i ka 1910, he peresidena oia no ka papa misiona o na Mokupuni o ka Pakipika, a ua haalele aku oia ia kulana me ka mahalo nuiia, he hana i lawelaweia oia i ike oleia ka holomua iloko o ia wa iloko o ka moolelo o ia papa mai ka hookumuia ana mai. Ua lilo kona hiaalaai i na hana pono i mea nana e hapai ae iaia a lilo i hoa no ka papa hooko o ka ahahui King's Daughters ame ka Ahahui Hooikaika Kristiano o na Wahine a i lunahoomalu a i hoa hoi no na opio hana hoomana apau. Ua pau kana hana ma keia ao, a ua kahea ia mai la oia e hoi aku no ke kii ana aku i kona uku ma kela ao, kahi aohe luhi, aka he hosana wale no i ke Keiki Hiwahiwa a ke Akua.