Ka Nupepa Kuokoa, Volume LI, Number 52, 26 December 1913 — KA AHA PAEAINA O KA HOOMANA NAAUAO O HAWAII [ARTICLE]

KA AHA PAEAINA O KA HOOMANA NAAUAO O HAWAII

Mr. Solomon Hanohano, Aloha nui kaua me ka malu mai ke Akua mai, Amene: —Ke noi aku nei au i kou oluolu ina he wahi kaawale kekahi o ka kaua Kilohana, ka Nupepa Kuokoa, e hookomo iho oe i na mea i ha'iia ma lalo iho nei, penei: E noho ana ka Ahahui Paeaina o ka Hoomana Naauao o Hawaii, ma ka la 22 o Ianuari, 1914, ma ka luakini o Ka Olino o ka Malamalama, ma Pauwela, Hamakualoa, Maui. Ua makemakeia ka poe apau i kuleana ma ia aha e hele mai mamua o ka manawa i ha'i ia, maluna ae, oia keia malalo iho: Na Peresidena mokupuni apau, peresidena mokupuni Ekalesia, peresidena Mokupuni Kula Euanelio, peresidena Ahahui o na Opio ame ko lakou mau elele. E hele mai ka poe apau i hoikeia maluna ae me ka makaukau i na dala ekolu ($3.00). Penei: Hookahi dala no ka hookohu. No ka hoike $1.00, lulu no ka aha $1.00. Pela no na peresidena apana elike no me na mea i hoikeia e pili ana i na peresidena mokupuni, pela no na hana i na peresidena apana ame ko lakou mau elele; e hele mai no lakou me ka makaukau imua o ka ahahui paeaina oia no ka makaukau i na dala ekolu. Nolaila ke poloai aku nei au ia oukou apau e hele mai e hui pu ma kahi i hoikeia ma Ka Olino o ka Malamalama. Owau iho no me ke aloha, Rev. JOHN KEKIPI, Hanaia ma ka halekahu o Ke Alaula o ka Malamalama i keia la 22 o Dekemaba, 1913.