Ka Nupepa Kuokoa, Volume XLVIII, Number 42, 18 ʻOkakopa 1912 — HE MELE NO DUKE KAHANAMOKU [ARTICLE]

HE MELE NO DUKE KAHANAMOKU

Kaulana Hawaii a puni ke Ao, Ia oe e Duke Kahanamoku; Nau i alo aku na kai loa, Pakipika me ka Atelanika; Haalele mai oe i ke one hanau. Maluna o ka mokuahi Honolulana; ike oe i ka nani o Maleka, Ma neia hana he heihei au; Ike oe i ka hau-oki o Kaleponi, Me ka uluwehi o ka Ipuka Gula; Haalele oe i ka nani o Kaleponi, No na kulanakauhale o ka Hikina; Peneselavania ame Nu Ioka, No ke komo i ka hui Olimapika; Ku'i mai ka lono puni Hawaii, Ua lanakila oe Duke Kahanamoku; He moho Au hoi no Amerika, E paa i ka moto haneri-mita; Heihei Au nui o ke Ao nei, Kulanakauhale o Sekokahama. Haalele i ke awa o Nu Ioka, Maluna o ka mokuahi Finelana; Me na hoaloha ilipuakea, No na kaiaulu o europa; Ike oe i ka nani o Suedena, Me ka Emepera o Perusia; Hiki mai i ka la hookuku, Aha'i mai oe i ka lanakila; He moho kaulana no ke ao nei, Mahimahi hoi no ka Pakipika. Ku aku oe imua o na 'Lii, Moi kane Moi wahine; Me na hoomaikaiia ana mai, No ka moho kaulana o ke Ao nei; Loaa ia oe na medala, A Hawaii e haaheo ai; Ike puia hoi me Hawaii, Ia oe e Duke Kahanamoku; Hoike aku oe i ko ke ao, Ka haahaa ame ka paa rula. Haalele aku oe ia Europa, No ke ala huli hoi no Amerika; Ike hou i ka nani o Maleka, Hookipaia me ka hanohano nui; Mai Nu Ioka a Kapalakiko, Ke ala huli hoi i ka Aina; Ike hou i ka nani o Kaleponi, Hookipaia me ka hanohano loa; Ka moho kaulana o ke Ao nei, Ka mahimahi o ka Pakipika. Haalele i ka uluwehi o Maleka, Maluna o ka mokuahi Wilhelmina; Hoi mai me ka lei o ka lanakila, A Hawaii e lei mau ai; Pili mai ka moku i ka uwapo, Apoia aku me ka ohohia nui; Ka moho kaulana o ke ao nei, Ka mahimahi o ka Pakipika; Hainaia mai ana ka puana, E ola loihi o Duka Kahanamoku. Hakuia e Leinaala, o ka Makani Apaapaa. Kohala, Hawaii. Oct. 11, 1912.

He mele he inoa no Kahanamoku Ka hoa heihei o ka Niuhi Nau i lawe ka hae o ka lanakila Ma na welelau o ka honua Ku'i e ka lono puni e ke ao Ka mahimahi o ka Pakipika Ike i ka nani o Europa Me ka pua hau lohi o Maleka Nani Hawaii Kilohana i ka la'i Moopuna oe na Kaahupahau He hiwahiwa oe na ka lahui He milimili na ka makemake Hainaia mai ana ka puana Na moku o Hawaii a e o mai Haina houia ka puana Ka mahimahi o ka Pakipika. Hakuia e NAHONOAPIILANI.