Ka Nupepa Kuokoa, Volume XLVIII, Number 30, 26 July 1912 — NOHO PAAHAO MA KAHI HOIKEIKE I'A Nanea Loa Kekahi Haole i ka Makaikai me Kona Maopopo Ole i ke Paniia o ka Puka. [ARTICLE]

NOHO PAAHAO MA KAHI HOIKEIKE I'A

Nanea Loa Kekahi Haole i ka Makaikai me Kona Maopopo Ole i ke Paniia o ka Puka.

No ka nanea loa o kekahi haole nona ka inoa o Chas. Pool i ka nana i na i'a ma kahi hoikeike i'a mawaho ae nei o Waikiki ma ke ahiahi o ke Sabati aku la i hala ua poina loa oia i ka manawa e paniia ai o ka puka o kela wahi a o ka hopena nae o kona nanea loa ana e nana i na i'a, o ia no kona lilo ana i paahao no ka hora hookahi, a ma ka ulia laki wale no i hiki ai iaia ke hemo iwaho, ma o ka pinana ana ma kekahi puka aniani a haule mawaho i o ka pa. Ua hoea aku kela haole ma kahi hoikeike o na i'a mahope iho o ka hora eha o ke ahiahi, a oiai he nui no kekahi poe makaikai e ae malaila, aole ona noonoo ae no ka manawa, he hookahi no mea nui iloko o kona noonoo, o ia no ka hele makaikai ana i na iʻa mai kekahi wahi a i kekahi. Iaia nae e nanea la i ka nana, ke hoi liilii nei ka poe makaikai, a hiki i ka neoneo ana oloko o keia wahi, me kona koe hookahi no iloko. I ka hiki ana mai hoi i ka manawa e paniia ai ka puka, elike me ka mau i na manawa apau, ua pani mai la ka mea kiai i ka puka, a hoomaka aku la e hoi no kona wahi, me kona manao, ua pau loa na mea a pau i ka hele iwaho. Ua lohe no nae o Chas. Pool i ka u-paia ana aku o ka puka, aole no nae ona noonoo ae, o ka wa pono wale no keia nona e haalele iho ai i kela wahi hoikeike iʻa, aka ke hoomau ia no oia i kana nana ana, a he mau minuke

loihi ma ia hope mai, akahi no a ala mai la ka manao iloko ona, e huli hoi mai kela wahi mai, o ka mea kupanaha nae, iaia o ka hoea ana mai ma kahi o ka puka, ua paniia, a ua paa hoi i ka lakaia. Ke hoaa la oia i kona wahi e hemo mai ai iwaho, ke noke la hoi i ke kahea me ka leo nui, a oiai ua ahiahi loi i kela manawa, a ua mehameha no hoi keia wahi iloko o kela manawa, aohe poe lohe mai i kona leo kahea, nolaila ua ku a pilikia maoli oia, ana o ka mihi ana iho i kahi o kona poino, ina no ka loaa oie he alahele nona e puka hou ai iwaho, alaila e noho ana oia malaila a hiki i kekahi la mai. Ke huli la nae oia ma o a maanei i wahi e hemo ai, a ma ka ulia pomaikai wale no i loaa mai ai iaia he manaolana, nolaila ua hele aku la oia a ma kekahi puka aniani nui, ua hu ae la oia iluna, a hooikaika e wehe i ke kua hao mawaho mai, a i ka hemo ana, manao ka pakele, a o kona oili mai la no ia iwaho, me ka hoohiki ana aole loa oia e hoohemahema hou ana iaia iho, no kekahi manawa hou aku ana e hele ai e nana i na iʻa, aka e makaala loa ana oia i ka manawa.