Ka Nupepa Kuokoa, Volume XLVIII, Number 21, 24 May 1912 — HE NUPEPA PUKA PULE HOU, "KA LEO O KA LEHULEHU" [ARTICLE]

HE NUPEPA PUKA PULE HOU, "KA LEO O KA LEHULEHU"

He nupepa puka pule hou a oili mai ma Hilo. I loaa keia ike mamuli o ka loaa ana mai o kekahi hoakaka i ke keena o ka puuku o ke Teritore ma ke kakahiaka Poaono aku nei, mamuli o ka loaa ana mai o kekahi leka ia keena e hoakaka ana ua makaukau kekahi nupepa puka pule, "Ka Leo o ka Lehulehu," no ka hoopukaia mai ma kela ame keia Poalima mai ke keena pa'i mai o ka Hawaii Herald Publishing Company. O B. H. Kelekolio ka lunahooponopono o keia nupepa hou a oili mai, a o ka mea hoi nana i kukulu ae la i keia nupepa hou. He nupepa keia e hoopukaia mai ana ma ka olelo Hawaii a e hoopihaia ana kona mau kolamu me na mea hou Hawaii wale no. Ma ia ekeleka hookahi i loaa mai ai i ka Puuku Conkling kekahi hoakaka ua hoomahuahua houia ae ke kumuwaiwai o ka Hui Ma-lu o Hilo mai ke $50, 000 a i ka $200,000. O ka waiwaiio o na waiwaipaa ame na waiwai lewa maluna o ka Mokupuni o Hawaii ua hiki aku ia i ke $38,300,000—aneane e piha ka $9,000,000 ka oi hou ae mamua o ko ka makahiki i hala, no ka mea, ma ka makahiki i hala he $30,530,945 wale no ka huina auhau i ikeia.