Ka Nupepa Kuokoa, Volume XLVIII, Number 10, 8 March 1912 — NA ANOAI O KAHULUI MAUI. [ARTICLE]

NA ANOAI O KAHULUI MAUI.

E Mr. Lunahooponopono o ka Nupepa Kuokoa, Aloha oe:- E oluolu mai i kau wahi rumi kaawale o ka hiwahiwa a ka lahui no kela mau hua e kau ae la. O ke kulana o Kahului ma na hana ano hou he oia mau ka panee imua. O ka palekai hou e hanaia nei, he mau kapuai helu wale no koe pau ka hana ana. Ma ka la 17 o ka mahina i hala, oia no ka la i hoomaka ai ke konohi o ka Pake, ma ka hora 10 oia po, ua konoia mai au ame ka ohana e kekahi o na keiki pake no ka hele ana aku e hui pu ma ko laua papaaina i hoomakaukau ai; ia'u malaila, a ma ka papaaina, ua hui pu iho la me o'u mau hoa luhi o ka oihana lawai'a o ke kai huki hee nehu o Kahului oia o James K. Hanapi, Mr. G. Paia, Mr. Kameeau, Mr. Joe K. Papalimu, me kou mea kakau ame ka ohana; ua noho iho la ma ka papaaina a hoopiha iho la i ka lua o ka inaina; ua ai a ua inu a ko'u ka puu i ka wai a ka naulu, aua kela. Lelele ana pau hoi kau i kahi mama; eia keia i ka hora 12 oia po. Ma ka hora 4 a.m. o ka wanaao oia po no ua puiwa ae kekahi mau hoki e huki ana i kekahi kaa e kalaiwaia ana e ke Pukiki i ke pahupahu a huli ke kaa, puehu liilii na kini waiu; i ka haule ana o keia Pukiki, wahi ana, iaia e waiho ana ilalo, ua ike oia ua komo ka laina o na hoki ma kona a-i, a hoomanao iho la ka ia e make ana oia aole oia e ola ana. Mamuli o ka ulia laki, ua moku mai la na laina a me na ili i hoopaaia i ke kaa a hemo aku la na hoki a pakele kona ola, aole no he wahi ona i eha. O kahi i loaa ai keia poino ma ke alanui e pili ana i ka Fishery. He mau la puanuanu keia o Kahului nei, a inoino pu no hoi me ke kai. Eia ke hanaia nei kekahi hale nui maikai no ke kukeawa hou o Kahului nei ma kahi kokoke i ka aekai, a hiki aku i na la nalu, he alahula ia na ke kai, a o kahi i maikai ai o ke kiekie olalo. I ka nana aku o Kahului kekahi o na kulanakauhale nui o Maui nei ma keia mua aku a o Maui no e ka oi! Welina kaua a me kou mau keiki oniu hua ko'u anoai. Kou hoaloha pu o ka uwila makeneki e haale nei. S. K. Makaena. Kahului, Feb. 28, 1912.