Ka Nupepa Kuokoa, Volume XLVIII, Number 4, 26 January 1912 — KA ANOAI O KA MAKANI APAAPAA [ARTICLE]

KA ANOAI O KA MAKANI APAAPAA

E Mr. Lunahooponopono o ke Kilohana, Welina kaua: - E ao mai hoi oe ia'u e kui lima pu aku hoi me oe, ma kahi kaawale o ka kaua hiwahiwa, o awila aku hoi au i ka maka o Kaopua, i na hunahuna mea hou o kuu aina kaulana i ka haaheo, a na kupuna i hooheno iho ai. E Kohala nui e, Kohala iki, e Kohala ua apaapaa, o Pili, o Kalahikiola, o na puuhaelelua, o ke kanaka no ka hele ana, o ka puu no ke ku i kahi hookahi. Ae, he oiaio, ma ke kakahiaka poni= poni o ka la 17 o keia mahina, mawaena o ka hora 3:20 a. m., ua kipa mai la ma ka home aloha o na kupuna, Mr. a me Mrs. Amos Kauanoe Eldredge, ma Kaiholena, Puuhale, North Kohala, he opuu daimana mai ka puhaka mai o ka laua mau keiki, Mr. ame Mrs. Senches Kauanoe, Jr., he kaikamahine nui nepunepu mohaha maikai o ke ola kino, he kamakahi hoi keia i loaa mai i ka hapa kenekulia o ko laua mau la hapanea o ke ola ana ma keia ola honua ana. Mahalo a nui i ka loko maikai o na mana lani ka haawi ana mai i na hoopomaikai mailoko mai o ko laua puhaka mai, a ko ai ka olelo a ka Haku, e hoohua aku olua a e hoopiha i ka honua; hii moopuna no nae o Kauanoe a me Kekaulike: mahalo a nui. Ae, e lei no au, e lei no oe, e lei pu no kaua i ke aloha. He inoa no ke kama, Lucilla Naliipunihaniha Senches Kauanoe, a i hooheno ia no ke kamalei nona ka la i lei e: Ike lihi wale aku la au, Mea e ka pua o ke Koolau; I keohohia ia e ka ua hina; Hina keoho o ke kupukupu, Kupu haoeoe ka opua i ke kai; E makaikai ana i na kahawai, E hao ana ka makani me ka puulenaʻ He lei kahiko ia no ka wahine i nani ai Nani maemae ka pua o ka ilima i ka la, I ke ohohia ia e ke kehau o uo, Nai no oe i ka hulu, o puehu auanei, O aai auanei me he mauu laili ala, Haina ke kama nona ka lei Na Kauanoe na Kekaulike nana ke kama. E o e ka lei i ko inoa, Naliipunihaniha no ke kama. He maikai ke ola o ka mama. E hoomau aku i ka hana i ka mea maikai. Ma ka la mua mai o keia mahina a makahiki hou hoi, he kupaianaha i ike mua ole ia i na makahiki i aui wale aku la, na hoailona pahaohao o keia au hou e nee nei; ke hele la a mo'a unounoa Puna i ke Akua Wahine, o ka hopena anei hoi keia o ka honua! Me

he la ua pili pu ka lani me ka honua, ea, o ka'u hoomanao wale ae la no hoi keia, ehuhu ana paha na keiki o Kona i na keiki o Kohala nei i ka lilo ana mai nei o ke kaohi ana i ke kukuna o ka la he pumehana mai hoi kau, mahanahana ke kumu pepeiao, nalulu ka opu, nahu hoi ke poo i kau a mea htwela o ka la, iloko no o ka wela o ka la he mea ole wale no ia i na ketki wawahi pohaku o ke awapae o Mahukona e hana mai nei, o keia ka uwapo o ke alauuihao mai Hilo mai a Mahukona. O kahi e ku aku ai o ka uwapo hou, aia no ia ma ka aoao hema o ke awapae kahiko i keia wa, o kahi o ka hale kahiko o S. G. Wilder i maa mau ia kakou i ka ikeia, he nani keia uwapo e hana ia nei e ka luna hoohana nui, Mr. Wilson, ke holomua nei keia hana. me ka puahi nui. Nui no ka eleu o keia poe imi waiwai a kalepa kuloko o ka aina, he mea oiaio, e hiki mai ana ka la e haaheo hou ai o Kohala e o ai no ka manawa pau ole. Ke hoohalike ae nei au me ke kanaka mahiai, he pololi kali ole, a pela hoi keia; ku ae no ka manao e holoholo no Hilo, kau iho la no ma ka lio hao, he hao mai hoi kau, noho ana i Hilo, me ke kaukai ole o ka pololi (makemake) a hoea mai ka mauna Kea. Ke manaoia nei ina aole na kuia, e kapalulu mai ana ka lio hao mai Hilo mai a Mahukona, iloko o keia makahiki, a pehea ana la keia makahiki ae, he kaa uwila ana paha, ke loaa keia mau kaa i Hoala, uwe! Lele o Kohala i luna me he lupe la, aka aole keia o ka lupe a na keiki eepa o uka o Waomau kaa ia Kohala; lele o Kohala oia no o ka hele, he heke mai hoi kau. E lawa kaua maanei, no kekahi wa aku uwila hou aku au i na hunahuna. Me ka lunahooponopono ko'u kuilima pu aua, a me na keiki hoolei hamare metala ko'u wehe papale ana. S. D. KEHENA BOY. Keena oihana Poho O-o Kahua Kupee Pipi o Uwe Sanana, Kehena, North Kohala, lanuaii 18, 1912.