Ka Nupepa Kuokoa, Volume XLVII, Number 10, 10 March 1911 — HE HOALOHALOHA. [ARTICLE]

HE HOALOHALOHA.

I ka Lunahooponopono o ka Nupepa Kuokoa, Mr. Solomon Hanonano, me ka mahalo: E oluolu e hookomo iho maloko o kahi kaawale o kau nupepa i kela mau hua e kau ae la maluna, a nona hoi na manao e like me ia malalo iho: O makou o na haumana Kula Sabati o Pauoa o na Ekalesia makua o Kawaiahao ame Kaumakapili, ma o ko makou komite la, oiai ua oluoluia e ka Makua Lani ka lawe palanehe ana aku i ke ola makamae o Mrs. Lapana Keawepooole ma ka la 22 o Feberuari, 1911, a oiai hoi o Mr. Lapana Keawepooole he hoa paahana pu oia me makou ma na hana Kula Sabati, a mamuli o ka hala ana aku o ka mea aloha he wahine, ua ili iho maluna o ke kane i hooneleia i ka wahine ame na keiki i hooneleia i ka makuahine, na haawina o ke kaumaha ame ka luuluu, nolaila E hooholoia, Ke komo pu aku nei makou apau e auamo pu me oukou iloko o ka nohona kanikau ana, a na ke Akua no e hoomama mai ia kakou apau. O ke ala ana i hele aku la, oia ke ala no kakou apau. Komite—D. Kalama, Moses Kaululaau ame John Helekohi. Pauoa, Maraki 6, 1911. -