Ka Nupepa Kuokoa, Volume XLVII, Number 19, 12 Mei 1910 — HE LUA HOHONU NA KA WAIPUILANI. [ARTICLE]

HE LUA HOHONU NA KA WAIPUILANI.

I ka Lunahooponopono o ke Kuokoa. Aloha kaua: E oluolu mai i ke kauwahi kaawale o ke Kilohana no ka'u wahi hunahuna meahou o Maui Hikina nei i ike mai ai ko kaua mau kini heluhelu pepa. Ma ka la 28 o Aperila, 1910, ua halawai aku la ka ike a ko'u maka me kekahi lua hohonu e kau mai ana i ka hapalua o ka ihona pali, i hauleia e ka wai Puilani me he mea la he ekolu hora mamua iho o ko'u hiki ana malaila nona hoi ke ana waena he 50 kapuai he 40 kapuai ka hohonu. A mailoko mai o keia lua e kahe ana ka wai me he ia ua hiki i keia wai ke hoopiha i kekahi paipu 4 iniha ke anawaena a ua hoao au i ka wai he mananalo e like me ka wai kai. Aia no keia meahou ma Kuiaha-kai ma kahi kokoke i ke kahakai o Hanapopolo ma kahi kokoke no i kela mau lua mua a ke Kuokoa i hoike mua mai ai ma na helu i kaahope aku la; he kanakolu-kumamalima kapuai ka mamao mai keia man lua mua mai. Kupaianaha no na mea a ke Akua i hana ai me kona mana nui. He mau wahi meahou ia o ke kuaaina nei. Me na keiki hoonoho hua ko'u adiu. Kou kiu hanu meahou, JACK HONOKAUPU, Huaelo Landing, Mei 4, 1970.