Ka Nupepa Kuokoa, Volume XLVI, Number 40, 1 ʻOkakopa 1909 — AHAMELE NUI AME HULAHULA. [ARTICLE]

AHAMELE NUI AME HULAHULA.

Ma ke ahiahi Poaono, Okatoba 9 e hiki mai ana, e wehe ana ka Ahahui Kaahumanu maloko o ka Hale Melo Hou i Ahamele nui ame Hoikeike Tabalo no ka pomaikai o ka Ahahui. Ma ia po e kuupau mai ai kekahi 0 na puukani o ke kulanakauhale nei 1 na mele hooni puuwai au e ka mea e hele aku ana e hoolohe e poina ole ai. O ka tabalo kekahi mahele ano nui e hoikeia mai ana ma ia po, he mau mea hoi e hoonaauao mai ana i ke ano o ka noho ana o ke au kahiko o Hawaii nei, a ma ia mau hoikeike ana e ikeia ai, aole no i hupo loa ka noho ana o ia au kahiko. Ua lawe ae na makuahine o keia Ahahui i keia hana nui i wahi e loaa mai ai na pomaikai no ka pono o ka Ahahui o keia mua aku, a ua manaolanaia e haawi mai ana ka lehulehu i ka lakou mau kokua ana. Ua kukuluia ka Ahahui Kaahumanu he mau makahiki lehulehu i hala ae nei malalo o ka manao e kokua i na lala iloko o ka pilikia a ka ma'i ame ka make, a o ka loaa ana he waihona kupono he mea ia e, loaa ai o ka holomua. E loaa no na tikiki ma ka lima o na poe kuai a ma ka halekuai o na mea kani o Bergstrom ma alanui Papu mahope aku o ka Poakahi o keia pule ae, a o na poe apau e kuai ana i na tikiki, e oluolu e hele ae ma ua halekaai nei no ke kuapo ana i tikiki no ka iielu o ka noho, koe na tikiki hapalua me ia mau tikiki no lakou e komo ai iloko.