Ka Nupepa Kuokoa, Volume XLVI, Number 40, 1 October 1909 — MANAO KE KIURE E WAIHO AE I KA HOOPII. [ARTICLE]

MANAO KE KIURE E WAIHO AE I KA HOOPII.

Ma ka auwina la o ka Poaha o ka pule i hala i noho ai ka halawai a ke Kiure Nui o ke Teritore no ka huli pono ana i ka hihia o Waikiki, a i ole o Kaheana ke kanaka i hoopiiia ai no ka pepehi ana ia Wetherill, ka Paele luina i loaa aku ai ua make e waiho ana ma kahi o ka pa papa ma kahi kokoke i na uwapo he mau mahina i hala hope aku nei, ua naha ke poo. Ua manaoia e hoihoi ae ana ke Kiure Nui i ka hoopii hoahewa e ku-e ana ia Waikiki eia nae ua hoopaneeia me ka waiho oleia ae imua o ka Lunakanawai. Lehulehu na hihia i laweia ae a ninaninauia, a maloko o ia mau hihia ua komo pu ka hihia o Tommy Belasco ka mea nana i komo aihue ka hale o E. Faxon Bishop. O kekahi o na hihia i noonooia oia ka hihia wahi puupaa o Shedata i kekahi kaikamahine uuku nona na makahiki he umi. 0 ka hihia o Eugenio Dias i hoopiiia ae ai no ka wawahi hale ma ke degere elua kekahi i laweia ae a noonoo ia. Ma ka hooia ia mai ua powa oia i kekahi Kepani a lilo na dala he $29.60 Me he mea la e hoihoi puia ae ana kekahi hoopii hoahewa no Ailo he kanaka Hawaii i aihue ai he kanakolukumamalima ahui maia ma Wahiawa. Na ka Hope Loio Kalana Fred Milverton i kokuaia e ka Makaikiu Harry Lake, i waiho ae i na hihia imua o ke Kiur6 Nui