Ka Nupepa Kuokoa, Volume XLVI, Number 38, 17 September 1909 — PAKELE KA MAUNA KEA MAI KAU ILUNA O KA PUKO'A. [ARTICLE]

PAKELE KA MAUNA KEA MAI KAU ILUNA O KA PUKO'A.

Ma ka huakai a ka Mauna Kea o ka halihali ana ae i na malihini no Maui mai Hilo ae ma ka po o ka Poaono nei, ua loaa iaia kekahi ulia mamuli o ka ili ana ma ke awa o Hana i ka Ua Lanihaahaa. He keu no hoi o ka pilikia wale no ia i loaa ilaila, aka i ka hoea ana aku no Kahului, ua loaa hou no ia haawina iaia, a o kahi o ka laki loa, aole i lilo ia mau ili ana i mea no ka moku e poino ai, no ka hoomau ana i kana huakai aumoana. I ka hoea ana o ka Mauna Kea ma Hana, ua hookuuia kona waapa iloko o ke kai no ka halihali ana aku i ka poe apau e makemake ana e lele ,malaila, a ia hoemi ana mai o ka moku, i hooku'i ai me ka pohaku, a mamuli o ka ikaika o ia hooku'i ana, ua kulana maoli ka po e noho ana iluna o ka moku ia manawa.. Ua hoomamao koke ka Mauna Kea mai ke awa mai a hiki i ka hoi ana mai o kona waapa, alaila holo aku la no Kahului me ka hana mau ana i ka pauma. Ma Kahului aku, ua hooku'i hou kona iwikaele me ka papaku o ke awa, aka ua hooikaika no nae ka Mauna Kea iaia iho a hiki i ka hemo ana me ka maalahi. Mamuli o kela ulia i loaa i ka Mauna Kea, me ka ike maka ana o na kanaka o ka Ahaolelo Lahui, nolaila ua loaa ia lakou ka hoomaopopo ana, he mea pono e loaa ia Maui he mau awa kumoku hohonu e palekana ai ke klpa ana aku o na moku ilaila.