Ka Nupepa Kuokoa, Volume XLVI, Number 15, 9 April 1909 — O KAAPUWAI OPIO UA HALA. [ARTICLE]

O KAAPUWAI OPIO UA HALA.

E Mr. Lunahooponopono, Aloha oe: —E oluolu mai oe i kou ahonui ame kou lokimaikai e hookomo iho i keia wahi puolo waimaka a ke aloha ma kahi kaawale o na kolamu o ke kino lahilahi o ka kaua Nupepa Kuokoa i ike mai ai na kini makamaka o ke kamaiki opio i make no ka mea he mau makua no kekahi e noho mai nei aia ma Wainiha ame Hawaii i loaa ole aku ia lakou na lono no keia pilikia no ka mea he uuku wale no ka manawa o ka ma'i i hiki mai ai a lawe aku la i ke ola oia hoi ka hanu a koe iho la ke kino lepo e like me ka ke Akua i hoike mai ai. He lepo no oe e hoi hou aku no oe i ka lepo no ka mea mai ka lepo no oe i hele mai ai. Ma ka la 30 o Malaki nei o keia A. D. 1909 ua kipa mai la ka Anela o ka make a kaili aku la i ka uhane aloha o J. P. Kaapuwai opio i aloha nuiia a waiho iho la kona kino lepo; a ma ia ahiahi no ua manele ia aku kona kino lepo no ka ilina o Halehaka He keikikane nui maikai nona na mahina he umi a oi, a he keiki i hoopomaikaiia iloko o ka Ekalesia o Iesu Kristo o ka poe Hoano o na La Hope nei. Ua hanauia mailoko mai o ka puhaka o kona mau makua, o ia hoi o Kua Kamakuahine a o Makaneole ka makuakane, a ua hanauia oia ma Lihue, Mokupuni o Kauai. O kona makuakane hanai o ka inoa no e o la iaia a o ka makuahine hanai o Peleaumoku. A ke komo pu nei makou me kona mau makua ponoi ame na makua hanai iloko o na haawina o ke kaumaha ame ka luuluu no keia kamaiki opio a ke pule nei makou i ke Akua Nana no e hoomama mai i keia mau kaumaha ame ka luuluu. Owau no me ka haahaa, J. P. KAAPUWAI.