Ka Nupepa Kuokoa, Volume XLVI, Number 6, 5 February 1909 — NAHUIA O KAAIKAULA IAUKEA E KA ILIO. [ARTICLE]

NAHUIA O KAAIKAULA IAUKEA E KA ILIO.

Ma ka Poakahi aku nei o ka pule i hala, ua nahuia iho la o Kaaikaula Iaukea o Kewalo e kekahi ilio ana o ka hoike ana mai, he Pukiki ka mea nana ua ilio la. Ua hoike aku oia i ka ona nana ka ilio no kona nahuia ana, me ke koi pu ana aku iaia ma ke ano maikai, e hooponoponoia no hoi kela pilikia ma waena o ka mea i nahuia ame ka ona nana ka ilio, ma o ka uku ana o ka mea nana ka ilio i na hoolilo apau no ka laau e kau ai ma kahi eha. Ua hooleia mai nae keia noi ana, a no ia kumu, i kulike ai hoi me ka Mr. Isenberg i hana ai no kekahi ilio i nanahu ai iaia ma kekahi mau la ae nei i hala, ua hele mai la oia imua o Makai Nui Jarrett, a hoike aku la i kona pilikia, a wahi ana, aole ka he mea i hanaia mai no ka ona nana ka ilio. No kona manao loa no e loaa ke ala kupono ana a i ole e loaa mai kekahi mau alahele e hiki ai iaia ke imi aku no kona pono, ua hele loa aku la oia no ke keena o ka Ilamuku Amerika, a oiai aole oia ma ke keena, ua hoea aku oia no ke keena o ka Loio Kuhina, a mailaila mai kona hele ana a hiki i ke keena o ka Loio Kalana. O kana i olelo mai ai, ua kakauia aku kana moolelo a ka hoike ana aku e pili ana i kona nahuia ana e ka ilio, eia nae aole he maopopo iaia e hanaia mai ana paha kekahi mea no kona pono, oiai ua hele a kaumaha mamuli o kona nanahuia ana e kela ilio. Wahi ana, ina ua hopuia ka ona o ka ilio nana i nahu i ka wawae o Isenberg, pehea iho la i hopu oleia aku ai ka ona o ka ilio nana oia i nahu. He wahi ano hana kupaianaha io no kela aka malia paha ua maopopo no i ka oihana makai ka lakou mea i hana mai la no ka hihia a Mrs. Iaukea o ka waiho ana aku imua o ka Makai Nui.