Ka Nupepa Kuokoa, Volume XLVI, Number 4, 22 January 1909 — OPA PUIA HE KEIKI E KA ELIVETA Make Oia Mamua o ka Hoea ana Aku o Kekahi Poe e Haawi i na Kokua ana laia. [ARTICLE]

OPA PUIA HE KEIKI E KA ELIVETA

Make Oia Mamua o ka Hoea ana Aku o Kekahi Poe e Haawi i na Kokua ana laia.

O kekahi o na make ulia ku i kā manaonao ma ka hora eono o ke kakahiaka o ka Poakolu nei, o ia no ka halawai ana ae o Jack Wailea he keiki malama cliveta o ka Hokele lana me kona hopena, a o ke oki puia ana ae hoi o kona mau la o ke ola ana ma keia ao. Aole loa he mea e ae i ike maka i ke ano o kona halawai ana me kona make, oiai oia hookahi wale iho no iluna o ka eliveta, aka mamua nae o na mea i hoomaopopoia me he mea la ua hoohemahema oia ma kekahi mea kona kumu o ka o-pa puia ana aku e ka eliveta a make loa ai oia. Aole no oia o ka mea ponoi i hoonolioia aku ma ia wahi, aka e pani ana nae oia ma kahi o kekahi keiki okoa aku, oiai oia e ai ana i kona aina kakahiaka. Mamua ae o ka loaa ana o kela haa* wina ulia iaia, ua lawe mua aku oia he. keiki Kepani lawelawe no ke kii ana i ka pahu lehu e kiola, a haalele aku iaia ma kekahi papahele okoa a hoomaka mai oia e pii iluna me ka eliveta. Ua haohao 'nae ke Kepani ana i lawe ai, no ka hoea hou ole mai o Wailea e kii iaia, a i kona nana ana mai i ka eliveta, ua ike mai la oia ua paa loa o Wailea, a aole hoi he hiki i ka eliveta ke holo hou aku. Uoko o kela manawa i hoomaka ae ai !kela Kepani e kahea i na kokua a hiki i ke kii maoliia ana mai o kona kiho e laweia ae mai kona wahi o ka pāa ana. Ua hoounaia aku kona makuakane mai kekahi aoao mai o ka mokupuui, o Oahu nei, a o keia no hoi ka makamdttv loa o ke kau ana o ua makuakane nei maluna o ka eliveta, a mamuli. o kana noi, ua haawiia he mau manawa lehulehu nona e kau ai me ka laweia iluna a ilalo o kela wahi. Ua noho ka aha koronelo nieniele kumumake a ninaninau i na mea e pili ana i kela make ana o Wailea, a o ka lakou olelo hooholo, ,ua make oia mamuli o ka ulia, ma o kona o-pa puia ana e ka eliveta. He kanaka opio keia nona na makahiki he iwakalua-kumamalima iloko o ka makahiki hookahi a oi o kona noho hana ana ma kela hokele, ua ike ia kona ano hoopono, a ua lilo no hoi i mea makemakeia e kona mau haku.