Ka Nupepa Kuokoa, Volume XLVI, Number 3, 15 January 1909 — HOOPOINOIA KEKAHI MAU HALE E KA MAKANI [ARTICLE]

HOOPOINOIA KEKAHI MAU HALE E KA MAKANI

Mamuli o na lono i hoikeia mai i Honolulu nei, ua ikaika maoli na hana a ka makani o ka pa ana iho nei iloko o keia mau la ma Waialua ke hele la a ulaa puia na kumulaau ame kekahi mau hale o ka poe hana o ka mahiko. Mai na Koolau pu no hoi i hoikeia mai ai ka lohe no ka ikaika o ka pa ana a ka makani malaila, eia nae aole he nui o na mea i hoopoinoia. He ikaika no ka pa ana a ka makani ma Honolulu nei, aka aole e loaa aku ka ikaika o ka makani o na makahiki elua i hala ae nei. O na kumulaau e hoopuni ana i ka hale noho o ka lunanui o ka Mahiko o Waialua, a pela no hoi kana ulu papaia, ua pau i ka ulu-paia e ka makani a ahu lalakukui iho ilalo. O na kauhale keia o na kanaka hana o ka mahiko, ua hoohuli puia e ka makani, a he nui maoli ka ka poino ma kekahi mau wahi e ae oloko o ka apana o Waialua. O na kumukiawe keia, ua like loa ko lakou paa me he opala la imua o ka makani. Mamuli o ko W. R. Kakela kamaaina loa i ke ano o ka makani kona o kekahi mau makahiki lehulehu i hala ae nei, ua olelo ae oia, i ka wa e ikeia ai ka pa ana a ka makani Kona ma Honolulu nei, e oi loa aku ana ka ikaika ma na huli Koolau ame Waialua. Wahi ana, mai ka moana mai ka hele ana mai a keia makani, a i ka wa e pa aku ai i ke kuahiwi, o ka wa ia e pahili iho ai me ka ikaika ma Koolau ame Waialua, a ua kapaia keia makani, he Hoolua. O keia paha ka makani i paa i ka poe haku mele o ke au kahiko i ka hoohaehae i ke Kona, ka makani kihae launiu. Mai Punaluu, Oahu ae nei i loaa mai ai kekahi lohe no na hana hoopoino a ka makani o ka pa ikaika ana i keia mau la iho nei, a o kekahi o ia mau lohe, o ia no ka akaa puia ana o kaupoku o ka hale o Walter Macfarlane ma ke kakahiaka o ka la Sabati iho nei, a o kahi nae o ka laki loa, aole he hookahi o kela ohana i hoopoinoia aku. E noho nanea ana no o Mrs. Macfarlane me kana ohana keiki iloko o ko lakou hale, a iloko o ia nanea i pukalaki mai ai ka makani me ka ikaika a alaa aku la i kaupoku o ko lakou hale, me ka haalele ana iho ia lakou nei me na manao pihoihoi e noho ana no maloko o ka hale. Aia o Mr. Macfarlane ma ke kula i ka manawa o ka loaa ana o keia pilikia i ko lakou hale, eia nae oia kekahi i kulaiia e ka makani a hina ilalo, a i

kona manawa i aea ae ai iluna i ike mai ai oia i ka lelele ana o kaupoku mai ka hale aku. Ma kekahi mau mea i kamailioia ae, e pili ana i keia nuhou, o ke kumu ka o ka pakele ana o kela ohana, mamuli no ia o ko lakou holo ana e pee malalo o ka moe. O ke alahele wale rio e loaa ai kou hoaloha oia kou hoomakamaka aku.— •Em#raon. 1