Ka Nupepa Kuokoa, Volume XLIII, Number 50, 11 December 1908 — NUI KE DALA MA KA LAWE OHUA [ARTICLE]

NUI KE DALA MA KA LAWE OHUA

Imua o ka Alia Kaapuni i ka Poalua nei hookahi hihia okimare i lawe ia ae, a mahope o ka hooloheia ana ua aeia. ke noi a ka mea hoopii. Ma ka nana pono ana i ka moolelo o ka hihia, he hana nui maoli ka hoi kela o ke dala o ka lawe ana i na ohua maluna o na kaa otomobile ina he oiaio ka mooklo i waihoia ae ai imua o ia aha. Ma ka hoike a ka mea lioopii, Alina Goedeke, ua mareia oia me Wil•liam Goedeke i ka makahiki 1897, a mahope koke iho no o ko laua mareia ana, ua 4iaalele kana kane iaia, me ka hoonele ana iaia i na pono apau o keia noho ana, oiai nae, ma ka hooiaio mai iaia he kaa otomobile kona nona ke kumukuai he $3,500, a ke loaa nei iaia he $400 i kela ame keia pule mamuli 'o kona aloalo ana i na ohua ma ?na wahi like ole. A mamuli iho la o kela ike i hooiaia aku iaia, ua noi ae oia imua o ka Aha e uku ke kane i ka uku loio me ka haawi mau iaia i uku hoomau $10 no ka pule; he uku haahaa kupono loa ia ana i manao ai oiai oia e ohi ana he $400 i ka pule. O Clement K. P. Quinn ka loio o ka mea. hoopii, a oiai he elua ona mau hoahanau kalaiwa kaa otomobile, aole no paha e nele ana kona ike nona iho i ka nui maoli o na pomaikai ma kela hana o ka aloalo ohua ana maluna o na kaa Otomobile, a pela paha oia i hoike aku ai i ka mea hoopii he nui ka loaa o kela hana, i maopopo ai i ka mea hoopii ka nui o na loaa a kana kane.