Ka Nupepa Kuokoa, Volume XLIII, Number 48, 27 Nowemapa 1908 — NO NA PALAPALA I KAKAUIA MAI E NA MAKAMAKA. [ARTICLE]

NO NA PALAPALA I KAKAUIA MAI E NA MAKAMAKA.

Ua ili iho maluna o ka Lunahooponopono o keia pepa ke koikoi o ka nana ana i na palapala apau a na makamaka e kakau mai nei maloko o keia keena, a oiai he hanā nui maoli no ka hooponopono e ana i na manao a kupono no ka hookomo ana aku iloko o ka lima o ka mea nana e hoonoho mai a kupono no ka heluheluia ana mai e ka lehnlehu, nolaila akahi no a ulu mai ka manao iloko ona e hoike aku i na hemahema nui o na palapala e kakauia mai nei, i lilo ai i mea no kakou e naauao ai a e makaukau pu ai no hoi ma ke kakau ana. O na nui i ikeia, oia no ka hookaawale pono oleia ana o kekahi huaolelo mai kekahi aku, me ke kau pono oleia ana o na koma, ame na kiko ma ko lakou mau wahi. Ua loaa mai kekahi mau palapala me ka'hookaawale oleia ana o kekahi pauku mai kekahi mai, a aole hoi he luia nui ma ka hoomaka ana o kela ame keia manao, me he mea, la e hoike okoa mai ana no i ka naaupo maoli o ka poe na lakou i k-akau mai ia mau manao ina pela ea, e heluhelu mau i ka nu • pepa, a e hoomaopopo i ke ano o ke kakauia ana o na manao e like me ia e puka mau aku nei. I ke kakau ana mai no hoi i na moolelo o ria Kula Sabati, na Ahahui Euanelio ame na Ahahui Opiopio, he mea pono no e hoopokopoko mai na moolelo, oiai mamuli wale iho no o ke ahonui o ka Lunahooponopono i hoopuka liiliiia aku ai ia mau moolelo a hiki i ka pau pono ana, oiai nae, he hana hiki no ia ke hoopokoleia mai, a na mea waiwai nui, e hiki ai ke pau iloko o ka puka hookahi ana aku, a ma ia ano ke waiho loihi nei kekahi mau moolelo i hoounaia mai no ka hoopuka ana aku maloko o ke Kuokoa nei. I k.e kakau ana mai no hoi i na palapala., ua makemakeia i hookahi wale no aoao- o ka pepa e kakau ai, aole e kakau ma kekahi aoao, he hana nui na ka mea hoonoho ka i na apana pepa mai kekahi aoao a i kekahi. I mea e malamalama ai na makamaka ame na hoaloha e kakau mau mai nei i na palapala i keia keena no ka hoopuka ana aku maloko o ka nupepa, he mea pono no e hoomaopopoia keia mau rula ano nui o ke kakau ana, a ina aole pela, alaila e kiolaia ana iloko o ke ie opala.