Ka Nupepa Kuokoa, Volume XLIII, Number 32, 7 ʻAukake 1908 — NA KAMALII AUWANA O KA PO [ARTICLE]

NA KAMALII AUWANA O KA PO

No ka walea paha hoi o na kamalii i ka maau hele i ka po me ka hoopilikia oleia no kekahi manawa ae nei i hala pela no lakou i hele mau ai ma na ahiahi ma na alanui o k« kulanakauhale nei me ka loaa ole o kekahi mea nana e malama mai ia lakou, aka ma ka po nae o ka Poaono nei, ua hopuhopuia mai na kamalii hele wale ma na alanui e na makai, a ku ana no ka halewai. Akahi no na makai a hooko i ke kanawai i hooholoia ai e ka Ahaolelo aku nei i hala, mamuli o ko lakou kauohaia ana aku e ko lakou poo e hopu i na kamalii apau e loaa aku ana ia lakou e hele ana ma na alanui i ka wa poeleele, mai na keikikane ame na kaikamahine. He nui na kamalii i loaa aku i na makai apau nui mai i ka lawe ia no ka halewai, i kekahi manawa e ikeia aku ana kekahi makai e hoihoi mai ana he elua ana mau keiki, he hookahi hoi a kekahi a he ekolu a kekahi, a i kekahi manawa na ke kaa makai maoli e hoihoi mai kekahi poe kamalii no ka ' He poe kamaliikane wale no ka i hopuia e na makai, no ka mea o lakou no ka i loaa aku ma na alanui āole he mau kaikamahine, a pela i loaa ole ai he poe kaikamahine i laweia ae i ka halewai ma kela po. No ka maka'u o kela mau keiki e hoopaaia aku ana lakou iloko o na keena paahao, nolaila, ua noke lakou i ka uwe i ko lakou mau makua, aka ua pau nui no nae i ka hookuuia aku e hoi no ko lakou mau home, me ka loaa aku o na a'o ana, aohe kupono o na alanui no lakou e maau hele ai o ka po.