Ka Nupepa Kuokoa, Volume XLIII, Number 9, 28 February 1908 — OLELO HOALOHALOHA. [ARTICLE]

OLELO HOALOHALOHA.

Pomaikai ka poe i make iloko o ka Haku. O ka mea lanakila, e haawi no au iaia e noho pu me a'u ma ko'u nohoalii, me A'u i lanakila ai, a noho pu me ko'u makua ma ka nohoalii. Mamuli o ka manao oluolu o ke Akua Mana loa, ka lawe ana aku ia Mrs. Rose S. L. Desha, oia ka moku ana o ke kaula dala a naha hoi ke kiaha gula o ke aloha, ka hoapili hoi o ke kane he wahine, Walohia wale hoi! E hooholoia, O makou iho o na lala apau o ke Kula Sabati Huiia o Waioli, Hanalei, Kauai, ma o ko makou Komite la, ke hui pu aku nei e kanikau, a e uwe pu me ke kane wahinemake ame ka ohana o ka mea i make, iloko o na haawina o ke kaumaha, luuluu me ke aloha nui. Ke nonoi haahaa aku nei ka makou leo pule i ka Makua Lani, e hoomama ae i na luuluu, ame na kaumaha mai luna ae o ke kane wahinemake ame kona ohana. E hooholoia, E hoomaikai nuiia aku ka inoa o Ke Akua Mana loa, a e haawiia i hookahi kope pakahi i ke kane wahinemake, i ka Nupepa Ka Hoaloha, i ka Hoku o Hawaii ame ke Kuokoa. O makou iho na Komite, S. W. KAUANOE, W. G. AARONA, W. K. KAMUELA, MRS. K. SAMUELA, MRS. S. M. KANEOLE, MRS. E. KUAPUHI, MRS. S. AARONA. Kula Sabati Huiia o Waioli, Hanalei, Kauai, Feberuari 16, 1908.