Ka Nupepa Kuokoa, Volume XLIII, Number 9, 28 Pepeluali 1908 — HE HOALOHALOHA. [ARTICLE]

HE HOALOHALOHA.

Auwe! Minamina wale!! ka pua nani o ka Home Mailealii, ka home kahu o Haili Betera, oia ka Rose popohe anuhea, ka Rose aloha, pua Meria, ua hala a nalohia aku la. Ua hele i ke ala hoi ole mai me ka makani Puulena aala o Puna. Ia Rev. S. L. Desha, ka Anela Ha'iEuanelio kaulana o Hawaii aloha, Kahu hoi o ka Ekalesia Makua o Haili, ke kane aloha a Mrs. Rose Kaukaha Desha i hala aku la, a nalo no ka manawa pau ole. Auwe! Luuluu wale hoi la!! Luuluu Hilo e, He ua nui, He ua huki heenalu na ka lawai'a, Ka poe oli e haa mai la i ka moana, Mawaho aku o ka Lae o Leleiwi, Lele aku la ka hanu o ka mea aloha, Maalo pulelo aku la i ka wai o Lokoaka, He aka no ka makani kaili hoa, Ua laweia aku la ka hoa la lilo; O oe ka! ka ke aloha e kaualupe nei, A kuewa i ke ala me ka waimaka, Kona aloha e, Me makou mau no, Nolaila, ke hooholo nei makou me ka ilihia aloha i keia mau manao: 1. O makou, o na lala apau o ka Hui Kaahumanu Lala ma Hilo, Mokupuni o Hawail, Helu 3, ma o ko makou mau Komite la, ke hoike aku nei i ko makou kaumaha, luuluu, a minamina loa, me ka walohia pu hoi, no kona kaawale ana aku la mai ia oe aku, kana kane aloha, ana hoi i paulele nui ai; a ia makou pu no hoi kona mau hoa, ka mea a makou i hilinai nui ai ma kona kulana eleu, loea, hoopono, naauao, a Kristiano oiaio hoi, ame na haawina lani e olino ana iloko ona. A no ia mau ano maikai i loaa iaia, i hilinai piha ai makou maluna ona, a kohoia i Peresidena Nui no ko makou hui i hoikeia ae nei. A ma ia kulana oia i paa ai me ka mahiehie a hlki i kona kii ia ana mai e ka Makua Lani, a laweia aku la no ka home nani mau loa maluna, i ka po a ao ae la 1 o Feberuari, 1908. "Ka Lani kuu Home, E maha mau ai, Pokole paa ole, Kuu noho maanei." 2. Ke komo pu aku nei makou i ka U a kumakena pu ana me oe, ame kau mau kamalei aloha, me ka ohana apau; ame ke kaikuaana pu o kau mea aloha, ame kona mau ohana pu apau. A maluna ae o na mea apau, ke uwe aloha pu nei makou me oukou apau, no keia haawina ehaeha a kaumaha i kau mai maluna o oukou, ame makou pu. Ke nonoi haahaa mau aku nei no makou i ka Makua Mana loa iloko o ka Lani e aloha mai ia oe, a ia oukou no apau, a e hoomama, a hooluolu mai, mai na ehaeha ame na inea o keia ola honua ana. Amene. 3. E haawiia i kope o keia Olelo Hoalohaloha i ke kane, a i na nupepa, a e hoopaaia keia Olelo Hoalohaloha ma ka buke moolelo o ka hui. O makou no me ka walohia, Mrs. Hattie K. Nailima, Mrs. J. Alai Akana, Mrs. Kaleialoha Kaloi, Mrs. Kahana Kaauwai, Mrs. Mihana Ai. Mrs. Kaouliokalani Pahioliilii, Mrs. Sarah Hapai, Sarah Hapai, na Komite.