Ka Nupepa Kuokoa, Volume XLII, Number 45, 8 November 1907 — KUU MAKUAKANE ALOHA UA HALA. [ARTICLE]

KUU MAKUAKANE ALOHA UA HALA.

I ka Nupepa Kuokoa, Aloha oe: - E oluolu mai kou lokomaikai e ka lunahooponopono, iaʻu no kaʻu wahi ukana e hoolaha ae oe, a ike mai na kini, na makamaka ame na hoaloha mai Hawaii a hiki aku i Niihau. Ma ka hora 12:30 awakea Poakahi, Okatoba 28, ua kii mai la ka Anela o ka make a lawe aku la i ka uhane o kuu makuakane hanai aloha Mr. C. L. Kaaikaula a hoi aku la ke kino i ka lepo, e like me ka olelo i hookumu ia i Kinohi e ka mea Mana Loa. No ka lepo mai oe, e hoi aku no oe i ka lepo, a o ka uhane, e hoi aku no ia i ka mea Nana i hana. Ka Ioba, o ke kanaka i hanau ia e ka wahine, he hapa kona mau la a ua piha i ka popilikia, puka mai no ia me he pua la, a ua okiia aku, a holo aku no ia me he aka la, aole ia e mau. Ua hanau ia o Kapena Lofa Kaaikaula ma Lanai i ka la 8 o Sepatemaba, 1843, ua hiki aku ka huina o kona mau la o ka hanu ana i na ea o keia ao i ke 64 makahiki o kona ola ana. Ua haalele mai oia ia'u ame kona kaikuahine hookahi, na keiki, na moopuna ame ka ohana mahope nei me na waimaka o ka luuluu ame ke kaumaha i na hoomanao pau ole nona o kuu makuakane. He kamaaina no ka mokupuni o Lanai, i ka makahiki 1887, ua haalele aku oia ia Lanai, a hoi mai a noho ma Lahaina ua hoi mai no au a noho pu me ia me ka ohana apau, a hiki wale no i kona haalele ana mai ia makou e hoomanao i kana mau hana maikai. Ia oe e ka Malu Ulu o Lele, aole e kau hou ana ka malumalu o kou mau lau uliuli maluna o ke kino o kuu makuakane; e na lau Niu o Puunau, ka home, ua pau kou peahi ana mai iaia i na la welawela o ke kau, e na Pohaku ooi o Makila, ua pau kona hehi ana ia oe, e na Pi-pa alanui o Lahaina, aole oia e hehi hou ana ia oukou, e na ipuka hale ou e Lahaina ua pau kona maalo hou ana me oukou, o Kaaikaula he kamaaina ma keia mau wahi, ma na wahi a kuu makuakane i hele ai owau pu no me ia ma ka oihana lawai'a, e hele ana i o a ianei pela no ka nui o ke aloha iloko o'u. Ma ka Poalua ae hora 11:05 ua hoolewa ia mai kona kino lepo mai ka home noho a iloko o ka luakini o Wainee, a na ka Makua D.W.K. White i malama kona kino lepo me kekahi mau olelo hoomaikai a hoalohaloha e pili ana i ka mea e moe ana maluna o ke pakaukau, ame kekahi mau olelo hoolana i ka ohana o ka mea i moe ame na makamaka na hoaloha i launa pu mai iloko o keia anaina, a ma ke ka'e o ka lua kupapau iloko o ka ilina o Wainee ka hoomanao hope loa ana i kona kino a hoi aku la ke kino i ka lepo. Nolaila, ma ka aoao o ka mea i make, ke haawi aku nei au i ko'u hoomaikai nui i ke Akua, ka mea nana i hoopiha i ka honua i ka poe i komo pu mai me makou ka ohana no ko oukou launa ana mai a hiki ma ke ka'e o ka lua o ka mau loa. E hoomaikai ia o Iehova, no ka mea nana no i hana a Nana e lawe aku. E hoomaikaiia Oia. Me ke aloha MRS. HELENE PAAOAO. Maunakui, Lahaina, Maui, Sept. 1, 1907. 1907.