Ka Nupepa Kuokoa, Volume XLII, Number 41, 11 October 1907 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

NUPEPE KUOKOA HONOLULU, T. H., POALIMA OKATOBA 11, 1907

 

NUPEPA KUOKOA

SOLOMON HANOHANO : : :  Lunahooponopono

 

NO KA MAKAHIKI  (ONE YEAR) : : :   $2.00

NO EONO MAHINA (SIX MONTH) : : : $1.00

 

O na Dala ame na Hoolaha Apau e Hoouna Pololei Mai

"HAWAIIAN GAZETTE COMPANY LTD.,"

wale no-P. O. BOX 208.  Honolulu, H. T.

Entered at the Post Office at Honolulu, T. H., as Second-Class Matter.

CHAS. S. CRANE            :           :            :             LUNANDI

 

POALIMA      :        :        :       :       :       OKATOBA 11, 1907

 

NO KAUKA WALAKA AME KANA LAAU LAPAAU.

 

            Ua hoala houia mai ko ka lehulehu mau manao iloko o keia mau la mamuli o ka ike ana i ko Kauka Walaka ake nui e loaa mai iaia ke aponoia ana no ka lapaau ana kau i ka ma'i lepera ma Hawaii nei mai ke Kiaaina mai e like me kana palapala noi i waiho aku ai imua ona ma ka Poakolu i hala.

            Me he mea la i ka hoomaopopo aku i ka manao e nune nei iloko o ka lahui Hawaii, oia no ko lakou makemake e loaa he mea nana e hoopakele ae i ka poe apau i loohia i ka ma'i lepera, ka ma'i hoi nana e hookaawale i keiki mai ka makau aku, ka wahine mai kana kane aku a o ke kaikuahine mai ke kaikunane aku.

            Ua nui ka imi ana a na poe loea ma ka  oihana lapaau i ka laau e hiki ai ke hoolaia keia ma'i aka aole nae he holopono o ia mau hooikaika ana, a he nui o na lahui lehulehu i loaa i keia ano ma'i e noho mai nei ma ko lakou mau aina iloko o na hoopilikia ana a keia ma'i.

            Ua ike keia lahui Hawaii i ke ko'iko'i o keia ma'i iwaena o kona mau makaainana, ame he mea la o keia lahui ka nui loa o ka poe i loohia i na haawina hoehaeha a keia ma'i e noho mai nei ma ke kahua ma'i o Kalaupapa, a mamuli o keia hoomaopopo ana i ala mai ai na manao iloko o na hoa Lunamakaainana  o ke kau Ahaolelo i hala, e ae aku ia Kauka Walaka e lapaau i keia ma'i ola ole a na kauka akamai e hoole nei, i ka hiki ole ia lakou ke hoola.

            Ua lawe mai lakou e noonoo no ka hiki ame ka hiki ole ke ae aku ia Walaka e lapaau i keia ma'i i kekahi poe i loohia i ka ma'i lepera, a ua haawi aku lakou i ke apono lokahi ana e haawi ana iaia i kela pono malalo o kekahi olelo hooholo hui (concurrent resolution) a oia nae ka ka Papa Ole i hoole ai i ka loaa ana ia Walaka o ia pono malalo o ia olelo hooholo.

            Ua pololei ka hoole ana a ka Papa Ola i ka loaa ana ia Walaka o ka pono e lapaau i ka ma'i no ka mea he mana piha ko ka Papa a ka Ahaolelo i haawi aku ai e hoole i na poe apau i loaa ole na laikini no ka lapaau ana, a oiai he olelo hooholo hui (concurrent resolution) wale no ka i hanaia e ka Ahaolelo, nolaila ua lilo no ia i mea mana ole i ka manawa i loaa mai ai na ku-e ana, a ina paha he olelo hooloho hui (joint resolution) ka ka Ahaolelo i hooholo ai, ina ua lilo ia ae  ana ia Walaka e lapaau i mea mana, no ka mea he ekolu manawa o ia olelo hooholo e heluheluia ai, mamua o kona aponoia ana, a ua like hoi ia apono ana me kona lilo ana i kanawai.

            Ua hala aku nae ia manaolana o ka lahui ma o ka haule ana o ia olelo hooholo, a ke hoala houia mai nei keia manaolana hookahi no i keia mau la, ma o ka hiki kino ana aku o Walaka imua o ke Kiaaina a koi aku e aeia mai oia e lapaau aku i ka ma'i lepera.

            Ke lokahi like nei ko makou manao me ko ka lahui ma o ka ike ana aku i ka loaa ana he kanaka nana e hoopakele  ae i keia lahui mailoko mai o na hoehaeha ana a keia ma'i. A oiai ke kalahea nei o Walaka me ka leo nui, ame ke kanalua ole no ka hiki ana iaia ke hoola i keia ano ma'i iloko o na mahina pokole wale no, nolaila i mea e pau ai na manao kanalua o ka poe kanalua no keia haole; ke lokahi nei makou e pono e loaa iaia keia pono ana e koi nei, aole no hoi no kona pomaikai wale iho no, aka no ka pomaikai pu o ka lehulehu.

            Ke kanalua loa nei nae makou i ka loaa ana o ka pono ia Walaka ma keia keehina hope ana i lawe ae nei o ka-hele ana imua o ke Kiaaina a noi aku no kona aeia mai e lapaau i ka ma'i lepera, oiai aole he mana o ke Kiaaina e ae ma ai iaia e lapaau, aia wale no ia mana iloko o ka Papa Ola, aka nae he hana hiki i ke Kiaaina ke a'o aku i ka Papa Ola no ka pono o keia noi, a ina e maliu mai ana ka Papa, alaila ua pono iho la a i ole no e ae mai; oia iho la no, aia no kela pono kaokoa iloko o ka lima o ka Papa Ola.

            Eia kekahi mea nui a ka lehulehu e nana mai ai, eia na kakaka apau ke ku-e nei ia Walaka  ma na ano apau, a oiai e mau ana no keia pono iloko o ka Pala Ola, pela no e mau ai ka loaa ana o na manao ku-e no na noi a keia haole i waiho ae ai iloko o keia mau la.

            Ua loheia ko ka lahui mau manao apono e loaa he manawa e hoike akea ae ai o Walaka i kona ike lapaau, a hoola i kela ano ma'i a ke kakoo pu nei kekahi poe makaainana Amerika e ike aku iaia e hoola ana i keia ma'i, no ke aha ka mea kali ole a hiki mai i ka manawa e noho mai ai ka Ahaolelo, ka mana hookahi nana e hoololi i na kanawai, nana i haawi aku i ka Papa Ola i ka apono ame ka hoole ana i ka poe e noi aku ana i na kuleana e lapaau i  na ma'i?

            Ua loaa ka ike ame ka hoomaopopo ana i ke kumu i loaa ole ai iaia o ka mea ana e noi nei, aole wale no iaia, aka i ka lehulehu pu kekahi a i ka hiki ana mai auanei i keia kau ae o ka Ahaolelo e loaa ai iaia ma o na lunamakaainana la ame na senatoa ka pono, ma o ka hana maoliia ana mai i kanawai, ke kahua paa ana e hoike ai i kona makaukau lapaau i keia ma'i hoopilikia.

           

NO KE KII O J. P. HIPA AME JOHN K. WAIHOIKAEA.

 

            Mamuli o ka loaa ole o kahi kaawale o ka makou pepa o ka pule i hala e hoakaka pono aku ai i ke ano o ke kii i hoopukaia aku ma ka aoao ewalu o ke Kuokoa o ka pule i hala, nolaila he pono no ia makou ke hoakaka pokole aku i ke ano i hookomoia aku ai o ia kii.

            Ma ke Kuokoa o ka la 30 o ka mahina o Augate i hookomo mai ai o P. K. Hipa i kekahi nane, i hoopukaia aku ai hoi ma ka inoa o P. K. H. Aekai o Moanalua, me kona haawi pu ana i makana Baibala Kauoha Hou i ka mea mua loa e loaa ana ka haina pololei o ua nane la ana.

            Ua ku keia nane me ka loaa ole o ka haina no kekahi mau pule a ma ka helu o ke Kuokoa i puka akau ai ma ka la 20 o ka mahina o Sepatemaba i hala aku nei, ua  lawe ae makou i ke ko'iko'i o ka hoike ana aku i ka lehulehu, no ka hookomoia ana  o ke kii o ka mea e loaa ana o ka haina pololei o ua nana la. Ma ia manawa, ua manao ia he hookahi wale no mea e pa'iia i ke kii, aka nae oiai ua noi mai ka mea nana ka nane, oia pu kekahi e pa'iia i ke kii, a nana ponoi no e haawi aku ka makana i ka mea i loaa ai kana nane, nolaila ua pa'iia laua a elua e like me ke kii i hoopukaia aku.

            Ma ke Kuokoa o ka la 27 o Sepatemaba i hoopukaia aku ai ka haina o ua nane nei a P. H. K. Aekai o Moanalua, ame ka inoa o ka mea nana ua haina la, malalo hoi o ka ino kapakapa, J. K. W.. Makanikeoe, a o kona inoa ponoi hoi o John K. Waihoikaea, nolaila e pau ana ke pohihihi o ka lehulehu i na mea no laua na kii i hoopukaia aku ai, ma ka pule aku nei i hala.

            Ua hookoia ka makana e like me ka makemake o ka nane, a ua kakau pu ia hoi na inoa o ka mea nana ka makana ame ka mea i makanaia aku ai, e lilo ai i waiwai hooilina iluna o ka mamo a Waiohoikaea.

 

            Nui mai ana ka waha o ia wahine i ka hamama no ka palukuia e kana kane ma ka po o ka Poaono ma Kukuluaeo no ka ona.  He hana kohu ole no na ka wahine ka hele ana e inu rama oiai aole he inu o kana kane, a o ka loaa ana o kela moo nahesa iloko o ka nohona ohana ana, oia no auanei ka mea nana e hoomokuahana i ko laua noho maluhia ana.  Aole no nae i pili keia i keia wahine hookahi, aka i ka poe no apau e malama ana i keia nahesa o ka waiona.

 

KUPAIANAHA NA HANA MA KOOLAU.

 

            Mamuli o ka hoeha ana o Hanale Pahia Opio ia John Faya, he Pukiki, me ke kupee hao ma ka Poalua o ka pule i hala ma Kaneohe, me he mea la e huli pono ia aku ana na hana a ka Lunakanawai Aikue.  He keiki o Hanale Pahia na ka Hope Makai Pahia.  Ma kela la ua ona o Hanale Pahia, ame ka hoonaukiuki oie ia mai e John Faya, ua noke aku la kela Hanale Pahia i ka pepehi i ke Pukiki me na kupee hao hoopaa lawehala ma ka hili ana i ke poo a ma ke kino a ma kekahi mau wahi e ae, a ua kukonukonu loa ka eha i loaa ua  manaoia aku e make ana; a ina pela he pepehikanaka ka hihia maopopo loa.

            I ka hoea ana mai o ka lono i ka Loio Kuhina, ua kauoha kokeia ka Hope Makai Frank Pahia e hopu i kana keiki.  Ua hoole ka Hope Makai leka hopu ana . A no ia hoole ana o Frank Pahia ua iho kino maoli ka Hope Loio Kuhina Whitney ame ka Hope Makai George Sea i Kaneohe e hopu ai ia Hanale Pahia i ka Poalua nei.

            Ua hopuia o Pahia a laweia imua o Aikue a ua noho ka aha ma ka Poalua e hoolohe i ka hihia.  Mahope koki iho oiai paha o Pahia he hoaloha pilipaa loa no Aikue ua holo koke mai la oia i Honolulu nei a kuka me ka Loio o Hanale Pahia.  I kona hoi ana aku i Kaneohe ua kauoha koke oia e hopuia na hoike apau o ke Pukiki, me ka hopu pu ia o ke Pukiki Fay malalo o ke ano hoopii hookahi.

            A no keia mau ano hana a Aikue e noli pono ia aku ana keia mau kekee apau e ke Kiure Nui, ina aole e paa ana o Pahia i ke Kiure Nui mamuli o ka Aikue hookolokolo ana.

 

HE PANE IA JOHN MAHUKA.

 

            E ka Lunahooponopono, Aloha oe:-

E oluolu hi oe e hookomo akua ma kau nupepa i keia wahi manao pokole, me ka mahalo nui.

            Ma kela mau helu aku nei ua ike iho la au i kekahi manao i kakau ia e John Mahuka e pili  ana "Heaha la ka ka Lahui Hawii e hana ai i ola ai oia ame kona aina."

            Aia ma ka hapa mua o ka manao ma ka nupepa o ka pule i hala i hoailona ia "A," ua kahea mai oia i ka poe i hoomaopopo i ke Akua mawaena o ka Lahui Hawaii, e hele aku iloko o ka halepule o Iehova ma Koula, ua i mai oia, oia wale no ka Ekalesia oiaio, a ua kauoha pu mai oia e mihi na kanaka i ko lakou mau hewa.

            Ke i aku nei au e pono io no ia Mahuka i ke kakahiaka Sabati ae e hele ae no i ka poe i kokoke i ko lakou luakini, ka poe hoi e moe iho la ma ka aoao makai o ko lakou luakini a kahea aku "E ala! E ala! e ka poe e moe nei a e mihi i ko oukou mau  hewa."

            Kupono loa iaia ke ha'iolelo aku ia poe, malia o maliu mai ia poe alaila piha pono aku kahi luakini o lakou e a'o lalau ai.

            Ua helehelu au i ka moolelo o kona Ekalesia mai ke kukulu ia ana e Iosepa Kamika, a hiki mai, i keia la ke ike nei au he Ekalesia ka kona ua hooponopono hou ia, kupaianaha ko ke Akua kukulu ana i kona Ekalesia a pau i ka hiolo alaila hooponopono hou mai.

            Ma ka pololei o ka moolelo, o ka Ekalesia e ku nei ma Utah, oia ka Ekalesia pololei i kukulu ia e Iosepa Kamika, ina e nana ia maloko o na moolelo i kakau ia, ua mau kona ku ana, a ina o kou Ekalesia e John Mahuka e hiolo hou ana alaila heaha ana ka inoa au e kapa hou aku ai, "he hooponopono hou ia," ana anei, kupaianaha no oe.

            Ua lohe mai au he noho pu ka ka Uhane o ke Akua me na poe o kou hoomana, ma kou ike ma ka Palapala Hemolele, e pili no na ouli kupaianaha me lakou. Ua pili anei ia mau ouli ia G. J. Waler ame E. Ingham, hiki anei ia laua ke kamailio mai me ka maopopo ma ka olelo Hawaii ina aole ea, alaila aohe o kou ka Ekalesia o Iehova.

                                    Owau iho no,

                                                            PANIWAIOIAO.

 

HE PAPA POHAKU MABALA HOOMANAO.

 

            Ma keia Sabati e hoea mai ana, e weheia ai kekahi pohaku mabala i hoea mai nei mai Nu Ioka mai a e waiho nei ma ka luakini o Kawaiahao he mea hoomanao no Levi Haaleeal Mrs. Haalelea ame kana kane Richard Haalelea.

            He mau pule ae nei ka hoea ana mai o keia pohaku i Honolulu nei me ka manaoia ma ke Sabati hope o ka mahina aku nei o Sepatemaba e malama ia ai keia hana e manaoia nei, aka mamuli nae o ka make ana o ka Makuahine Paleka, ua hoopaneeia ka malamaia ana o ia hana.

            Aka nae e malamaia ana ia hana ma keia la, Sabati, a na ke Kahu Rev. H. H. Paleka e hoikeike mai ana i ka moolelo o keia mau alii o Hawaii nei no lakou keia pohaku mabala hoomanao i hanaia ai.

            Ua lilo mai o Mrs. Haalelea i hoahanau no ka Ekalesia o Kawaiahao iloko o kona mau la opio, a ua pili pu kona aloha no na hana o ka Ekalesia.  Ua oleloia ae ua malamaia a hoohanaia kekahi aha fae laukini mua loa malalo o kana mau hooponopono ana, ma ia fea i loaa mai ai na dala mahuahu he elua kaukani.

 

LOAA HE OPU KOHOLA.

 

            Ma ka nupepa Garden Island o Kauai i hoopukaia ae ai kekahi meahou no ka loaa ana ia Charles Rice kekahi mau opu kohola elua e lana ana iluna o ka ilikai iaia i hele aku ai ma Kipukai ma ka Poakolu o ka pule aku nei i hala.

            Oiai aole i maa ka ikeia ana o keia mea ma Hawaii nei, nolaila ua ulu mai he hoohuoi iloko o ka mea nana i loaa keia mau mea malia paha o keia ka pohaku a Kauka Walaka i olelo ai o kana laau ia e hiki ai ke hoola i ka ma'i lepera, eia nae mamuli o ka noonoo pono ana aole o Walaka e hoohemahema wale i kana laau nolaila ua hoopau waleia ia manao ana pela, a o ka hope loa no hoi o ka mea i kohoia oia no ka opu kohola, a akahi no a pau ke pohihihi no ke ano o ua mau mea la.

            O ke kaumaha o ua mau opu kohoia pakahi la i loaa ai, aia ma kahi o ka umi-kumamalima paona,  a oiai he mea waiwai loa keia, e loaa ai ma kahi o ka $20 a $25 nolaila ua loaa maoli ka pomaikai mamuli o ka loaa ana o keia mau opu kohola.

 

POOLELO A. W. N. LONO.

 

Halelu 101:6 Hapa mua.

            Aia no ko'u mau maka ma ka poe oiaio o ka aina.

            L. He alii haipule o Davida, mai kona mau la opio mai, a hiki i kona pu ana ae ma ke kulana kiekie loa, o ka pane poo o ka Hanohano, he moi no ka Aupuni o ka Isaraela.

            E nana aku ana oia i kona lahui kanaka, e loaa i poe kanaka oiaio o ka aina, ua inaina aku oia i ka  mea hana ino. Aole no hoi oia e ike i ke kanaka hewa.

            Aole e noho iloko o kou hale ka mea hoopunipuni.   Aole e noho ma kou alo ka mea olelo wahehee.

            E hooki koke no wau i ka poe hewa apau o ka aina.  I hoopau au i ka poe hana hewa apau.

            Aka, "aia no ko'u mau maka ma ka poe oiaio o ka aina."

            I noho mai ai lakou me a'u o ka mea hele ma ka aoao o ka pono, nana no e hookauwa ma na'u.

            Eia ko kakou mau manao alakai:

            1.  O ka pono o ka aina.

            2.  O ka pomaikai o ka Lahuikanaka

            a.  Ke koho ana i ka oiaio maoli.  o oiaio ka olelo, pololei, paewaewa ole. he aloha akea me ka naauao, a oia ke kanaka e ola ai ka aina.

            b.  O ka lokahi oia kekahi mea e pono ai o ka aina, e koho ana i ka mea oiaio, mai ka mea kiekie ame ka mea haahaa.

            Oia ka manao o ka mea haku Halelu. "Aia no ko'u mau maka ma ka poe oiaio o ka aina."

             Ko Davida Moolelo he kanaka Kahuhipa kaulana loa oia, he malama pono i na hipa a kona makuakane. hoopilikia no ka Liona ame ka pea i na hipa ana e malama ana, aka, ua paio aku oia me kela mau holoholona ekaeka, no ka pono o kana mau hipa, a hiki i kona lanakila ana maluna o na holoholona.

            He hake Mele kaulana o Davida, ua kono ia oia e komo aku iloko o ka halealii o Saula, e hoomalielie i na manao uluahewa o ke alii, ua lilo oia he alakai oiaio no ka aina.

            He koe kaulana  ke alii o Davida, make ke alii o Saula, mahele ae la ko aupuni o ka Isaraela, elua mahele o ka hooponopono aupuni ana.

            He Aupuni o ka Isaraela, ame ko aupuni o ka Iuda, he ehiku makahiki mahope mai, hui pu mai la na mamo apua o ka Isaraela i hookahi aupuni malalo o Davida, nana mai lakou iaia. a ike i ka oiaio, pololei ame ka naauao o ka Davida alakai ana i ka lahui kanaka, me ka hooponopono aupuni ana me ka noeau nui.

            Hoopau aku oia i ka poe hana hewa e malama ana i na oihana aupuni me ka paewaewa; o ka poe naau akahai, noonoo nui i ka pono  o ka aina.  A maluna ae o na mea apau a Davida i olelo ai; puana ae la ke Alii Davida.

            O Iehova no ko'u Kahuhipa. aole o'u mea e nele ai, Nana no wau i hoomoe iho ma na aina uliuli, Ua alakai oia ia'u ma kapawai lana malie.

            Oiaio, ina hele au ma ke awawa malu o ka make, Aole au e weliweli i ka poino, no ka mea, o oe pu kekahi me a'u; O kou mana, ame kou kookoo o ko'u mau mea ia e oluolu ai.  Ua ike ia o Golia he koa ikaika a kaulana o ko Pilisetia, kaena ae oia i kona ikaika, a ninau aku imua o ka lahui kanaka o ka Isaraela, Owai ke kanaka koa ma ko oukou aoao, e ku mai imua o'u?

            Ua maka'u no ka Isaraela a kuemi hope lakou, no ka nui maoli no o Golia, he umi kapuai kona kiekie, a ua hoopuniia kona kino i na mea kaua.

            Aka, no Davida oia ke koa opiopio o ka aoao o ka Isaraela, i aa aku ia Golia, ia ike ana mai o Golia e ku aku ana o Davida imua o ke kahua kaua, i mai la o Golia, he ilio anei au i hele mai nei oe imua o'u i keia la?

            Olelo aku la o Davida, ua makaukau oe i na mea kaua, aka, ke hele aku nei au imua ou, ma ka inoa o Iehova o na Kaua.   He wahi kaula maa ma ka lima o Davida me na a-la liilii ma kona lima, a ua haule nae ke kanaka ikaika.

            Na Davida i hooponopono ke au o ka hoomana Iudaio, a hiki mai  o Kristo i ke ao nei.

            He Halelu Wanana keia a Davida. Nana aku o Davida ia Hekekia ke alii haipule oiaio, elua haneri makahiki mamua i hala.

            Pela no oia i kau  aku ai kana hoomanao ana ia Iosia he alii haipule oiaio, ka mea nana i wawahi i na Akua kii, a puhi i ke ahi. He ekolu haneri makahiki i hala.

            Nana o Davida i na kanaka oiaio, e oiaio mawaho, a e oiaio maloko, oia ke kanaka e pono ai ka aina, a e oia ai ka lahuikanaka.

            I ka wa i lawe pio ia ai ka lahui o ka Isaraela i Babulona, ua a'o ia aku lakou e noho me ka maluhia ma ia aina.

            Owai ia mea Oiaio? Owai ko kakou Kahuhipa Alii? O Kristo, ua haawi mai ia Iaia e make no kakou.  He nui kona aloha.

            O ko kakou noho lokahi pu  me ia, ke kumu o ka oiaio, aole e hiki na Materia ku-e ke noho like.

            E noho aloha pu kakou me Iesu Kristo, Nona keia ao holookoa, ame ko kela ao.

            E noho oukou iloko o kuu aloha, me ka oiaio ma na mea o ka Uhane.

                                                                                                 SIMON PAALUHI.

 

NO KA RUMATIKA.

 

            He uuku loa ka hoomaopopo ana o ke kanaka no na laau lehulehu e ola ai o ka rumatika,ka ma'i hoi nana e hoehaeha ana iaia no kekahi makahiki, me ka loaa ole o ka manao e imi aku i wahi e loaa ai ka oluolu.  A o ka hope aku e ike no oia i ka loaa mai o ka ma'i chronic.  He hana kuhihewa loa nae keia, oiai he mae hiki wale no ke hooluoluia ka eha a ma ka hapanui nae o na ma'i he loaa  maoli no ke ola ma ke kau ana i ka Chamberlain Pain Balm. O ka oluolu e loaa mai ana, ua oi loa aku kona waiwai mamua o kona kumukuai. O keia ka ma'i nana e hoohiaa i ka moe ana.  Eia ke kuaiia nei e na poe kuai laau apau, a i ole e loaa no ma kahi o Benson, Smith & Co., na Agena no Hawaii.

 

MR. MOSE POKINI UA HALA.

 

            Mr. Luna hooponopono. Welina kaua: -E olulolu e hookomo iho ma kahi kaawale o kou mau kolamu i kela mau mamala olelo e kau ae la maluna i ike mai na kini makamaka e noho ana mai Hawaii a Niihau o ka mea i hala ma kela aoao o ka muliwai eleele.

            Ma ka la 29 o Sepatemaba iho la. ua make o Mr. Mose Pokini he keiki kupa no na pali hulaana o Waipio, Waimanu, Laupahoehoe, Honopue o ka Apana o Hamakua, Hawaii.

            E ka Wailele o Kawaikapu. Waihilau, Waiilikahi Kaimu, eia mai o Mr. Mose Pokini ke hoi uhane aku la e auau i ko oukou mau wai kilihune.

            E Waipio, Waimanu, na Laupahoehoe, Honopue, ka Makani Apaapaa, eia mai ko keiki ke hoi uhane aku la e hehi hou i ko oukou mau lepo.

            E ka Ululaau o Kaauwana. na Ohu kikepa o Pokahi, na Lehua i kuele, ka Hulaana o Kaulehai, ka Hulaana hakihaki auki o Eleli, eia mai ko keiki ke hoi uhane aku la e ike ia oukou.

            Auwe! aloha wale.  "A aloha wale ia o Kaunuohua he puu ia."

            Eia iho kona wahi moolelo. pokole, a ka mea kakau i hoomanao ai, oiai ma ia mau pali ka mea kakau i hanai ia ai a nui.

            He mikiala hana, o ka hana nui ma ia mau awawa o ke kanu kalo, hanai holoholona a ma ia mau hana i hooikaiki ai keia Mose Pokini a lilo i kanaka kuonoono.

            No ka loaa ana i ka ma'i. ua kii na makai aole he loaa, ua noho i Laupahoehoe me ka makaukau i na mea eha ina he makai e hoea ana imua ona he make wale no, aka i kahi ukulii o Waimea pahu'a na mea make a keia Mose Pokini, penei:

            Kau aku o James Bright me na makai ame na kanaka kokua maluna o ka moku kiakahi o Wm. Hookuanui. holo aku ka moku a ku ma Honopue, he umi a oi aku a emi ai paha na mile hele ma ka aina.

                        Mawaena o ka hora 10 ame 11 o ka po, hiki ma ka hale, ma ke kuhikuhi ana a ke kamaaina, hoopuni ia ka hale, weheia ka puka me ka hikiwawe loa, kau ia ka pu imua o keia Mose ina e oni he kanaka make, paa na lima i ka hao, noho a ao ae kahea ia ka moku no ke kii ana mai i ke pio, pela iho la i paa ai keia Mose, mai like paha me Koolau.

            Ina he ohana ko waho i koe e hoike mai i ka mea kakau, a ina aole o ka mea kakau ka mea kuleana i kona mau pono maloko nei o ke Kahua Ma'i nei, e like me na hoakaka i hoikeia maluna e hoouna pu mai i poo leka.

            Me ka mahalo,

S.| K. MAIALOHA.

Kalawao, Molokai, Oct. 8, 1907.

 

HE HOALOHALOHA.

 

            Mr. Lunahooponopono, Aloha oe:-eia he kaumaha me makou ka Ekalesia o Waikane, a e oluolu hoi oe e hoike ae, i ike mai ai ka wahine kane make ame ka ohana, i na hana a ka Ekalesia, Kula Sabati, Ahahui Hooikaika Kristiano ame ka Ahahui Manawalea, ame na ho paahana pu iloko o Kristo.

            He mea minamina nui ia e Iehova ka make ana o kona poe haipule.

            O makou o ka Ekalesia o Waikane, ke Kula Sabati, Ahahui Hooikaika Kristiano, ame ka Ahahui  Manawalea, ma o ko  makou komite la, mamuli o ka loaa ana mai ia makou o ka lono kaumaha, ua hoea a kipa ae la ka Anela o  ka make ma ka home o Mr. ame Mrs. David Hoapili a lawe aku la i ka hanu hope loa o ko makou makua i aloha nui ia, Rev. Robert Maka, ma ka wehena o ke alauia o ka la 29 o Sept., 1907.  waiho iho la i ka wahine, na keiki ame na moopuna e noho me ka eha o ka naau ame ke Kaumaha.

            O ka Rev. Robert  Maka, ua hanauia oia ma Kamaili, Puna, Hawaii i ka 1832. O ka nui o kona mau makahiki ma keia oia ana he 75. Iloko o keia mau makahiki o kona ola ana, ua wae ia oia he Misiona no ka oihana kuwaho, ma ka aoao o ka Papa Hawaii.

            Ua hoomaha i ka hana, ua hoi mai a noho i ka aina kulaiwi, e kali ana apa-e mai kela leo ma o, e komo ua makaukau na mea apau, nolaila, e hoo holoia.

            1.  Ke komo pu aku nei makou e kaana pu i na kaumaha ame na luuluu i kau iho maluna o ka wahine i hooneleia i ke kane ole ame na keiki i ka makua ole, na moopuna i ke kupuna ole,

            2.  Ke pule nei makou, Nana no e hoomana i na manao piliaiku, i kau iho maluna o ka ohana.

            3.  Ke noi nei makou, i ke Alii o na Alii ame ka Haku o na Haku Nana no e alakai iloko o ke ao nei.

            Ma na ala maikai o kona inoa.

            MOSES KUIKAHI,

     J. KAOHELOAHI.

                FRANK LEIALOHA.

      MRS. SOL PEACK.

                MRS. KALEIMAMAHU.

 

                   HE HOOMAIKAI NUI.

 

            Mr. Lunahooponopono, Aloha oe: E ae mai ia'u i kau wahi kaawale o kau pepa.  Ke haawi aku nei makou na keiki, ka ohana i na hoomaikai nui i na hoaloha, na makamaka ame na hoahanau o ka Hui  Hookuonoono o na Oiwi Hawaii o Waianae i komo pu mai me makou i ka hoomanao ana mai i na kaumaha ame na luuluu i kau iho maluna o makou o na keiki ame ka  ohana i hookaumaha ia mamuli o ka oluolu ana o ka Makua Mana Loa i ka lawe ana aku i ko makou mama i aloha nui ia Mrs. Mahoe Kawelo, ma Waianae, Sept. 27, 1907 me ke aloha pumehana ia kakou no apau.

            O makou iho no na Keiki,

                        HUGO KAWELO,

                        KANOHO KAWELO,

                        MAKAWAO H. KAWELO,

                        MRS. LOUIS CASSER.

 

HE PILIKIA LEHULEHU E PAHOLA NEI.

 

            Ke pahola la ke Kolera ma Iapana a ma Rusia, ka ma'i ahulau bubonika ma Inia, Farani a ma Kapalakiko, ka waihalana ma Sepania ame Iapana, o ka wi ma Kina, a o ka make i ka wela a ka la ma Nu  Ioka.  A i ka hoomaopopo aku  ua ane e puni loa ke ao hoolookoa i na haawina poino like ole.

 

            E hoao oe e holoi i kou mau maka me ka waimahana i huiia me na wahi kulu liilii o ka boracic akika, a e ike ana oe i ka like ole o ke kulana o kou maka mamua me ko mahope o kou holoi ana.

Aole Like i Keia Manawa

 

            I kekahi manawa i hala @ ae na haumana o na laau lapaau @ a o ua ike la e hoika ana @ na like ole o na ma'i. e like @ o na lala like ole ame na @ o ke kino o ke kanaka. A o @ keia eha like ole i loaa i ke kino kanaka. he ma lapaau like @ ka lakou.  O na lawelawe kah@  ana me ka hawawa ni he alakai @ ana no ia iloko o ka manao @ manaolana.  O ka mea oiaio o k@ he mikini ia o hookahi kino. a@ lala e ano e ana pela no hoi @ aku ai na laia e ae o ua mikini @ ia ano hookahi.  Nolaila, ma k@ ai kakou o ka mea e loaa aku @  ka laau lapaau a o ka lawelawe @ paau ana e loaa ai ka olulolu @ ola o na eha like ole-a i ole o k@ ae o na mea iloko o ua mau m@ ole la aka, hookahi mea i ma@ loa he mau ano like ole wale @ lakou apau a he mau hua hoi i p@mai, mailoko mai o ka mea hooka@.  E like me keia malalo iho: Ka n@ ke koko, na ma'i o ka puu a@ akemama, he ma'i alaala na a@ waliwali e ae, wela anu, kunu@ ka nalulu, he ma'i ano kaumaha @ kou i ka nana aku eia nae o ka@ lapaau a

WAMPOLE'S PREPARATION

ka mea nana e hoemi koke me ka p@ ole o ka  manaolana i na ma'i ano @ a he mana hoola hoi kona i na m@ manaoia aohe he manaolana i k@ ka puka malaelae mai.  O  na kumu ka loaa ana o ka mana hoola oia@ keia malalo iho:  O ka mua oia ka@ na hooponopono maluna o ka @ hoowali ai o ka opu, elua o kona @ ika hana e kipaku ana i na ano @ apau o ke koko, a o ke kolu. o @mana hooikaika i ka ulu hou a@ kino iloko o ka maikai mau.   H@ ia i ka ai ana. oiai hoi iloko  ona ala he mau waiwai io he nui o ke ola @ kino ame na ai maikai e hanai io @no i na i'o paahana o ke kino o @ kanaka, a o ua mau ano la aia ia @ ko o ka laau lapaau Pure Cod Liver Oil (Ka aila maemae o ke akepaa o ka i'a cod) i hui pu ia me na wai  momona i hoohuihuiia kekahi mau mea kupono loa no ka hoola ma'i ana.  Aohe i moe uhana ia keia laau lapaau i loaa ai oia, aole no hoi i loaa mai ia mamua o ka ulia wale, aka, ua imilia a hulua me ka noeau maluna o na kahua paa o ka oihana imi lau lapaau.  He oiaio loa kona ano, e like me na mea i weheweheia nona a ua loaa hoi kona hilinaiia e ka lehulehu maluna no nae o na kumu i ha'lia.  Eia ka Kauka Thos. Hunt Stucky pane:  "Ma ka hoohana mau ana o'u i keia ana laau i na manawa apau a'u i lawelawe ai i kahi oihana kauka, ua ike au he laau maikai loa keia ma ka ai ana, he ono e loaa lihi iki ai ke ano liliha a he laau lapaau  no ia i kupono loa i hoomakaukauia no ke kuai ana.  "Aia he ikaika hoola ikoko o kela ame keia oolopu laau e ai ia ai.   Aole e loaa ia oe ka manao hoopoho manaolana mai iaia mai." He kuaiia keia laau e ka poe kuai laau lapaau apau apuni ke ao holookoa nei.

           

OLELO HOALOHALOHA.

 

NO KA MEA:-Ua oluolu i ke Akua Mana Loa, ke kahea ana mai i kekahi Makuahine o ka pono, Kristiano o Hawaii.

            He Makuahine Hoonaauao ma ka pono, no na Moi kane, na Moiwahine, na Keikialii, na Alii hanau o ka aina, a me na makaainana o keia Lahui Hawaii, mai ka makahiki 1832  mai a hiki a keia 1907.

            A NO KA MEA: -Ua nui kona hoomaikaiia ame ke aloha nui ia e na kanaka apau o keia Paeaina, kana poe keiki, mai na alii ame na makaainana. ka mea a lakou i aie ai, i keia pono Kristiano, i puka mai mai keia makuahine, a kanuia ma ka lepo o Hawaii e haaheo nei i keia ia Nolaila.

            E HOOHOLOIA: O makou o na hoahanau o ka Ekalesia o Kawaiahao. ke komo pu aku nei makou e uwepa e kanikau pu me ko maku Kahu ame ka ohana, i hooneleia i ka makuahine ole.

            E HOOHOLOIA: A ke pule nei makou i ke Akua Mana Loa, e lawe aku i na luuluu, ame na kaumaha mai @ kakou aku, malalo o kona aloha ame kona lokomaikai.

            E HOOHOLOIA: E kakauia i ekolu Kope Kulike:  1 Kope na ka ohana o ka mea i make. 1 Kope na ka lah@ e hoolahaia ma o ka Nupepa Kuokoa 1 Kope e kakauia ma ka Buke M@ lo o ka Ekalesia o Kawaiahao.

Me ka mahalo

            EDWARD K. LILIKALANI.

            L. W. P. KANEALII.

            JAS.  H. S. KALEO,

            J.  K.  NAKILA,

            S.  K. NAKAPAAHU.

Honolulu, Okatoba 5, 1907

 

OLELO HOALOHALOHA

 

            Oiai, ua oluolu loa i ka Makua Kahikolu ke kahea ana mai i ka Uhane makamae o ko ka Lahui Hawaii Makuahine i aloha nui ia. Mrs. Mary Elizabeth Parker, a mamuli o keia kaawale ana aku mai o kakou aku nolaila, ua ili iho maluna o kakou ame ka Lahui holookoa ke kaumala ame ka luuluu.

            Nolaila, E. hooholoia. O makou @ hoahanau ame na lala o ka Aha@ Hooikaika Imipono Kristiano o ka Ekalesia o Kawaiahao, e noho ana @ ka Apana o Kakaako, ke komo @ aku nei makou e auamo pu i na kaumaha ame na luuluu apau. me ka ohana i hooneleia i ka makuahine a @ kupunawahine ole.

            E hooholoia.  Ke nonoi nei makou na mana lani e hoomama mai i @ naau kaumaha apau mai o ao @ mea i hala aku.

            E hooholoia.  E kakauia i ekolu k@ pe o keia Olelo Hoalohaloha. 1 ka@ na ka ohana o ka mea i make 1 @ i ka Nupepa Kuokoa. 1 kope @ Nupepa Hoaloha.

Me ka mahalo

            ALFRED KAILI,

            JAS. KEOHOKII,

            G. MEHEULA,

            HENRY KANE,

            IOELA KIAKAHI.

                                                Komite

 

Kakaako, Honolulu, Oct. 7, 1907

 

            Ma ke awakea Poalua nei he Puk@ ka mea i pakele mahunehune i ke k@ Otomobile ma ke alanui Papu.