Ka Nupepa Kuokoa, Volume XLII, Number 33, 16 August 1907 — HOOHALAHALA I KA OLELO HOOHOI-O A KA LUNAKANAWAI. [ARTICLE]

HOOHALAHALA I KA OLELO HOOHOI-O A KA LUNAKANAWAI.

Ma ka Poalima i hala i kauia ae ai ka hoopa'i o ekolu mahina hoopaahao ia Mr. Wilson, he kalaiwa kaapio, a no kona manao paha ua nui loa keia hoopa'i i kauia aku maluna ona ke kumu o kona hoohalahala ana, a i ole nō kona pili ole paha i ka 'hewa, aka nae ma na olelo ike'a kekahi mau kaikamahine e ku-e ana iaia, ua maopopo loa kona hewa, a ua uuku loa no hoi keia hoopa'i i kauia aku maluna ona.

Wahi a ka hoike a keia mau kaikamahine Hawaii, ua maa keia kalaiwa kaapio i ke kii mau aku ia laua a lawe aku no kekahi hale 1 hoolimalimaia e ia, no ka hui pu ana aku me na kanaka, a o keia iho la no hoi kona hewa o ka hookolokoloia ana.

O ke kiekie o ka hoopa'i no keia ano hewa, he hookahi makahiki ma ka hoopaahao, a i ole he $500.00 ma ka uku dala maoli. Ina no e kaukaiia i na wahi loaa a na ohua e kau aku ana maluna o kona kaa me ka lawe ole i keia mau kaikamahine ma ke ano imi loaa, ina no aole e halawai me ka pilikia, a i ke kauia ana mai la o ka hoopa'i, hana nui ka imi ana aku i wahi e kaawale ae ai o ka pilikia.