Ka Nupepa Kuokoa, Volume XLII, Number 33, 16 ʻAukake 1907 — KOKOKE LOA E PAU NA HEMAHEMA O KA PAKA AUAU MA WAIKIKI. [ARTICLE]

KOKOKE LOA E PAU NA HEMAHEMA O KA PAKA AUAU MA WAIKIKI.

He mau la kakaikahi wale no i koe alaila hiki mai i ka manawa e pau pono ai na hemahema o ka Paka Auau mawaho o Waikiki, ame ia pau ole no nae o na hemahema i ka hanaia, eia no ka lehulehu ke holomoku nei nowaho o keia paka i ka auau kai. Aole no ka auau wale no ka manao nui o na hale i kukuluia ma keia paka auau aka no ka hooluana ana no kekahi a no ka malama ana i kekahi mau aha hulahula i ka wa e makemakeia ai, a o keia mau hana ana, malalo wale no o ka hana ana a na paahjao me ka nuku loa o na hoolilo ma ka aoao o ke Kalana. Aia he mau keena o kanakolu-kumamalima ka nui i hookaawale ia no na kane, a he mau keena nunui maoli e pono .ai ke mahelehele hou ia, e kaawale ai kekahi mau wahi no ke komo ana i na lole, a ma ia ano e hiki ai i na kanaka he kanahiku-kumamalima ke auau i ka wa hookahi.

Aia pu no hoi ko na wahine mau wahi auau i hookaawaleia i lako pono me na mea e pono ai ka hele ana ika auau. A ina no ka pau pono o na mea i manaoia no ka hana ana i keia paka, ua manaoia e lilo ana keia wahi i wahi hoona mauia e ka poe makaikai, a e na poe no hoi e manao ana e hele malaila e hoonanea ai, e like me ke Kula Sabati o Kaumakapili e manao nei e lawe aku i ka lakou mau kamalii ma Waikiki e hoohala manawa ai.