Ka Nupepa Kuokoa, Volume XLII, Number 33, 16 ʻAukake 1907 — POINO NO NA KEIKI I KA HOOHEMAHEMA A NA MAKUA [ARTICLE]

POINO NO NA KEIKI I KA HOOHEMAHEMA A NA MAKUA

Aole paha keia o ka maka-mua loa o ka hoike ia ana aku i ka lehulehu, i ke kau ana maluna o na 'makua mea keiki ke ko'iko'i o ka halawai ana o ka lakou mau kamalei me na haawina poino, no ka mea ke a'o mau nei na kahunapule i na makua e malama pono i ka lakou mau keiki mai ka awai aku, a ke hoike mau aku nei no hoi na nupepa i kela ame keia manawa i na makua e malama i ka lakou niau keiki, aka nae, ke lawe mai nei no makou i keia kumuhana a kamailio hou aku maluna olaila no ka pono o ka lehulehu. Ma ka Poalima o ka pule i hala i halawai ae ai kekahi wahi keiki uuku ma ka inoa o Charle Murry me kekahi ulia poino ma o kona wili puia ana e ka huila o ke kaa rola alanui ma keia kulanakauhale, a he ku maoli i ka manaonao na hiona i hoikeia ae e ka poe i hele maoli a ike i ua wahi keiki nei. Ma keia wahi makou i makemake ai e hoala mai i kekahi mau ninau, oia hoi keia: No keia wahi keiki anei ka hewa i loaa ai iaia keia make ana? No ka mea anei nana e hoohana ana i kela kaa ka hewa? I ka ninaninau ponoia ana 0 ke ano i halawai mai ai keia keiki me kela ulia poino, ua hoike ae ke paoahi, o ke kaa rola alanui, i kona kipaku ana i keia wahi keiki ame kekahi kaikamahine nui ae mai laua hoopipili ana aku ma kahi o ke kaa, aka nae aole he hooloheia aku o ia mau kipaku ana, ua mau aku la no ka pipili ana i kahi o poino. Ua hiki anei ke oletoia ae no keia wahi keiki no ka hewa i halawai ai oia me kela ulia poino? Penei ka olelo a'o a kekahi kumu kula Sabati i kana mau haumana: Mai hoopa'i ina keiki me ka hoike ol'e aku ia lakou i ke kumu o ia hoopa'i ana, i lilo ia i mea no lakou e hoomaopopo ai, a maka'u paha o hoopa'iia mai lakon ke hana hou aku i ka hana i loaa mua ai ka hoopa'iia. Ua hoopa'iia anei na keiki no ka hele wale ma na alanui, me ka maopopo no i na makua mea keiki, he wahi ia e halawai ai me na uiia poino, ina aole mai ke kaa rola alanui mai aka mai kekahi mau kaa e ae he lehulehu. Ina ua kauia na hoopa'i ana, ua hoopa'iia anei me ka manao ahewa mai ke keiki mai, aole e hana hou ia hewa? Maluna iho o na makua mea keiki ke ko'iko'i loa o ke kiai a makaala ana i ka lakou mau keiki, aole paha ma ke ano e kiai mau aku ma na wahi apau a lakou e hele ai ame ka lakou mau hana, aka ma ke ano, e a'o maoliia no lakou me ke kupono, maloko o na home, i na mea pono e hana ai, e hoike pu ia hoi na poino e loaa mai ana ma o ka hoolohe ole ia mau a o ana, i lilo ai i mea na na keiki e hoomaopopo ai i ka popilikia e halawai aku ana me lakou ke ku-e lakou i na meat a'oia ia lakou e ko lakou mau makua. Aole o keia wale no ka poino i ikeia mamuli o ka hookuuwaleia o na kamalii, aka he mau poino lehulehu e ae no kekahi i halawai mai me lakou, oia no ka haule ana iloko o na auwai, ka pau ana i ke ahi ame kekahi mau poino 0 ke ano like.