Ka Nupepa Kuokoa, Volume XLII, Number 31, 2 ʻAukake 1907 — KO KA HALEMA'I MOIWAHINE. [ARTICLE]

KO KA HALEMA'I MOIWAHINE.

O kekahi o na hana lokomaikai a i ku i ke aloha oiaio a ko kakou mau Alii i hana mai ai no ko laua lahuikanaka ponoi, oia no ka hookumu ana i ka Halema'i Moiwahine, i wahi" no na kanaka ma'i e waihoia ai me ka loaa ana o na lapaau ia ana maluna o ko lakou mau kino maloko olaila me ka uku ole. Ua lilo keia hana a ia Alii hanau o ka lepo aloha o Hawaii i kiahoomanao iloko o na Hawaii ponoi, a ke o nei ia hana iloko o kela ame keia hanauna ma ke ano he puu hoomaha no ka poe nele a ilihune i hoopilikiaia e ka ma'i e holo aku ai, no ka lapaauia mai e ko ke ao nei mau ike. No na makahiki lehulehu ke ku ana o keia halema'i me ka maikai me ke kaupale oleia ana o n? kanaka Hawaii i ke komo ana aku iloko o keia halema'i no ka loaa 0 na lapaau ana e like hoi me ka makemake o ka mea nana i hoala i keia hale no ka pono ame ka pomaikai o kona lahui ponoi. Ua hoonohoia kekahi mau kauka niakaukau loa ma ka oihana lapaau no ka hoopakele ana ae i ka poe apau i loohia i ka poino ma ke kino, a ua nui no hoi ko lakou mahaloia I e ka poe ma'i. He mau pule wale ae nei no nae i hala, ua ulu mai kekahi pilikia mawaena o ka papa kahuwaiwai ame kekahi o na kauka e lapaau nei i na ma'i maloko o keia halema'i, oia no ka hoopauia ana aku o Kauka Hodgins ame Judd. O ka hapanui o ka poe i kaa aku malalo o ka lapaau a keia mau kauka, ua hoike ae lakou i ko lakou minamina loa no ke kaawale ana aku o keia kanaka makaukau ma ka laua oihana mai ka halema'i aku, mamuli o ka hana a ka papa kahuwaiwai, a no keia kumu no hoi i ala mai ai ka manao hoohuoi iloko o ka lehulehu i ke kumu ame ke kahua o keia pilikia mawaena o keia mau kanaka ame na kahu waiwai o ka halema'i. Malia paha he mau kumu maikai no ka hoopauia ana o keia mau kanaka aka nae o ka mea nui oia no ka loaa io ana o na kumu hewa maopopo, mamuli hoi o ka nui o ka poe i make ma o ka laua mau lawelawe ana, alaila ua kupono io maoli. O kekahi no hoi o na mea e ikeia aku nei i keia mau la, oia no ke kaupaleia ana o ke komo ana aku o kekahi ano ma'i a lakou i makemake ole ai e malamaia maloko o keia halema'i.