Ka Nupepa Kuokoa, Volume XLII, Number 22, 31 Mei 1907 — KEKAHI MAU HALE INU RAMA E HOOPAU LOA IA ANA. [ARTICLE]

KEKAHI MAU HALE INU RAMA E HOOPAU LOA IA ANA.

Ma ka halawai a ke komisina laikini i malama a'e ai ma ka Poaha o ka pule i hala, i hoakaka ponoia a'e ai kahi e hoopauloaia aku ai o ka hoopukaia ana o na laikini no -ke kuai ana i na waiona maloke o na hale inu rama. O ka mua, aole loa i aeia e hoopuka houia aku na laikini i na hale inu rama ma na aoao o ke alanui Kekaulike, mawaena o alanui Moiwahine ame ke alanui Hokele, a o ka lua ma na aoao o ke alanui Moi, mawaena o ke kihi e ku nei o na hale inu rama o Thomas McTiphe ame Frank Harvev, ame ke kihi o kahi e ku nei o ka hale inu rama o U. Tukamoto ma kahi kokoke i ka uwapo o Haaliliamanu ame ka aoao mauka o ke alanui Moi ame Muliwai. O keia mau hale inu rama apau i hoakakaia a'e la. aia lakou ma kahi kokoke loa i ka makeke i'a, a o ka makemake maoli o ka papa o na komisina laikini. oia ka hookaawale loa ana aku i kahi o na hale inu rama e ku ai mai ka makeke aku. Ua hapai hou ia mai ka noonoo ana e pili ana i ke ku bona ana o na ahahui, mahope iho o ka noonoo akahele ana o ia papa i ka mea pono e hana aku ai. ua hooholo ia e ae wale ia aku no ke ku bona ana mal o kekahi hui, ina ua Hoomanaia mai oia e ku bona ma kona palapala hoopaa me ke aupuni, a i na aole he mea oia ano, alaila, aole no e ae ia.