Ka Nupepa Kuokoa, Volume XLII, Number 22, 31 May 1907 — KA HALAWAI A KA PAPA O NA LUNAKIAI. [ARTICLE]

KA HALAWAI A KA PAPA O NA LUNAKIAI.

O kekahi o na mea ano nui i hoea mai iloko o ka halawai a ka Papa o na Lunakiai i noho ai ma ka po o ka Poakahi nei, oia no ka palapala mai ka Hui Kelepona Mutual mai, oia hoi e loaa aku ke apono ia ana ia lakou mai ka Papa aku no ka hoomoe ana i na uwea maloko o ka lepo ma kekahi mau alanui o ke kulanakauhale nei. He manao keia i aponoia mai e ka Luna Nui o na Hana o ka Lehulehu, me ka manao ana nae na ka hui hana uwila e hana na alanui i hoomoeia ai o na uwea i ka wa e loaa ai o kekahi mau poino i na alanui a e like pu ko lakou mau ana me ia e waiho nei i keia manawa. O na alanui i manaoia ai e loaa mai ka aeia ana no ka hoomoe ana - na uwea, oia no ke lanui Moi, e hoomaka ana mai ke Alanui Nuuanu aku a hiki i ke Alanui Alakea, a holo i kai a hui me ke Alanui Kalepa ame kekahi mau alanui e ae. Ua waihoia aku kela palapala i ke Komite o na Alanui. Na Mr. Keliinohopono i waiho mai i kana hoike no ke Komite o na loaa ame na hoolilo, e hoike mai ana i ka hooia ana mai o ka Lunahooia o ka Teritori e haawiia mai ana i ke Kalana no ka mahina o Iune he $35,000, a mahope iho o ka pau ana o kana hoike, ua aponoia ka uku ana i na bila kumau o ke Kalana, ame na lilo o kela ame keia keena. Na ka Enekinia Kalana i hoike mal i ka pau pono ana o ka hana i hanaia i ke alanui ma Waimanalo, a pela no hoi me ka uwapo ma Kaneohe he mau hana e ae no kekahi e hanaia nei, a ke kokoke aku nei e pau. Mamuli o kekahi leka i loaa mai i ka papa mai ka Ahahui Enekinia Hawaii mai, ua hanaia e ka Papa kekahi, Olelo Hooholo e noi ana i ka Elele i ka Ahaolelo Lahui e hooikaika ma na mea apau e hiki ana iaia ke hana ma ka imi ana i mea e maikai ai ke Kanawai i kapaia "He makana no na Alanui." He mau palapala e ae no kekahl i heluheluia mai, a waihoia i ko lakou mau komite like ole. He kono ka i loaa mai mai ke Komite Kaupua mai e kono mai ana i ka Papa o na Lunakiai no ke komo pu ana aku ma na hana kaupua ma ka ilina o Maemae, a ua aponoia aku ke kono. Ua hapaiia mai ka noonoo ana no ke koho ana i mau luna pa aupuni, a mahope iho o ka hoakakaia ana o ka palena ame na wahi o na pa aupuni e waiho nei, ua hookohuia aku keia mau keonimana malalo iho nei i mau luna pa aupuni: No Makiki, W. J. Karratti; Kalihi, M. K. Nakuina; Nuuanu, Lolohi; Kapiolani Paka, Alexander Young; Waianae, Fred Meyer; Laie, W. K. Apua; Ewa, J. E. Kahoa. Mahope iho o ka noonooia ana o kekahi mau haawina dala e pono ai ka hanaia ana o kekahi mau alanui ma kekahi mau apana, ua hooholoia e hoolakoia aku ka Enekinia Kalana me ona kaa bake nona ke kumukuai mai ka $225 a ka $250.