Ka Nupepa Kuokoa, Volume XLII, Number 20, 17 May 1907 — HE HOOMAIKAI. [ARTICLE]

HE HOOMAIKAI.

O makou o na lala ame na hoa apau o ka Ahahui Ekalesia Mokupuni o na Mokupuni o Maui, Molokai ame Lanai o ka Hoomana Naauao i akoakoa ma Kaolino o Kamalamalama, Pauwela. Hamakualoa, Maui, ma o ko makou Kakauolelo la: ke haawi aku nei makou i ko makou mahalo ame ka hoomaikai kiekie i na hoahanau na makamaka, na hoaloha o ka Ekalesia o Kaolino o Kamalamalama o ka hoomana Naauao o Pauwela Hamakualoa, Maui, ka poe hoi i haawi mai i ka lakou mau kokua aloha ma na mea e pono ai, a e oluolu ai ke kino o na hoa apau o keia Aha. He oiaio no, ua a'o mai ka olelo a ke Akua ia kakou. "E imi e oukou i ke aupuni o ke Akua ame kana pono a e pau auanei ia mau mea i ka haawi ia mai ia kakou. Nolaila, ke koi mai nei keia olelo e imi kakou a loaa ke Aupuni o ke Akua. Nolaila, ua loaa ia oukou e ka Ekalesia o Kaolino o Kamalamalama ka mea oi mamua o na mea apau, oia hoi ke kukuluia ana o ke kumukanawai na Kanawai, ame na Rula o ke Akua iloko o keia Aha Ekalesia Mokupuni. I hookumu ia ai ke kukulu paa ana i ke aloha iwaena o na Ekalesia iloko o na

mokupuni huiia. Ke hoomaikai pu ae nei no hoi makou i ka Mea nana i hoolako mai ia kakou i na mea e pono ai ke kino ma kela ao, a pela no hoi me na lako o ka Uhane ma kela ao mau loa. Nolaila, e alualu kakou i ka Moto o ke Akua, oia no Kona kumukanawai. "O ke aloha pumehana no hoi ia," a e ka maluhia hoi, ame ke kuikahi, ame ka lokahi. Nolaila, e oluolu oukou e lawe i keia hoomaikai, a maluna ae o na mea apau, e hooikaika kakou e hoomau i ka lokahi ana o ka manao aloha mawaena o kakou. A aole hoi he mea nana e hookaawale ia kakou mai ke aloha ae o Kristo. O ke Akua pu me kakou a hui hou kakou. O makou iho no ma o ko makou komite. HENRY F. KAHOE. Komite. Pauwela, Hamakualoa, Maui, Aperila 20, 1907.