Ka Nupepa Kuokoa, Volume XLIV, Number 9, 2 March 1906 — Page 5
| This text was transcribed by: | Tialynn Kawaa |
| This work is dedicated to: | Anake Lolena Nicholas |
Ka Nupepa Kuokoa
KE KILOHANA POOKELA NO KA LAHUI HAWAII.
NUPEPA KUOKOA, HONOLULU. T. H. POALIMA, MALAKI 2. 1906 5
ALEMANAKA O 1906
______
1906 * Maraki * 1906
| Sabati | Poakahi | Poalua | Poakolu | Poaha | Poalima | Poaono |
|
|
|
|
| 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Mahina mua. Maraki 1-E puka ana ka la i Maraki 2. hora 6:@@. Maraki 3 hora 6:1@. Maraki 4 hora 6:18 a e napoo ana i Maraki 2 ame 3 hora 6:@5p Maraki 4. hora 6:06.
KAI PII.
O na kai Pii mai Maraki 2 a hiki i Maraki 4 penei no ia:
Poalima. Maraki 2. hora 10:13a. m: hora 7:26 p. m. Poaono. Maraki 3 hora 11:18 a. m: hora4:08 p. m. Sabati. Maraki 4. hora 10:@0 p. m.
KAI EMI.
Ona Kai Emi mai Maraki 2 a hiki i Maraki 4. penei no ia:
Poalima. Maraki 2 hora 2:18 p. m.: hora 4:11 a. m. Poaono. Maraki 3. hora 3:17 p. m.: hora 6:23 a. m. Sabati Maraki 4 hora 4:28 p. m.: hora 7:25 a. m.
ALEMANAKA O KAULUA, 1906.
La 1.-Olekukahi
“ 2.-Olekulua.
“ 3.-Olekukolu.
“ 4.-Olekupau.
“ 5.-Huna
“ 6.-Mohalu.
“ 7.-Hua
“ 8.-Akua. Kapu Hua
“ 9.-Hoku.
“ 10.-Mahealani.
“ 11.-Kulu.
“ 12.-Laaukukahi.
“ 13.-Laaukulua. Kapu Kanaloa
“ 14.-Laaupau.
“ 15.-Olekukahi.
“ 16.-Olekulua.
“ 17.-Olepau.
“ 18.-Kaloakukahi.
“ 19.-Kaloakulua.
“ 20.-Kaloapau.
“ 21.-Kane.
“ 22.-Lono. Kapu Kane
“ 23.-Mauli.
“ 24.-Muku.
“ 25.-Hilo.
“ 26.-Hoaka.
“ 27.-Kukahi.
“ 28.-Kulua.
“ 29.-Kukolu.
“ 30.-Kupau.
“ 31.-Olekukahi.
Nuhou
Kuloko.
Eia no ke hoomaamaa mai nei na hui hooikaika kino no ka la hookuku e hoea mai ana ma ka hapahope o keia mahina.
He piko pau i ka lole ka i komo ae ma ka home o Mrs. Katie Auerbach, ma alanui Beritania. ma ke Sabati nei. a he $20 i anioia aku.
Ma ke Kinau o ka Poalua nei i holo aku ai na kaikamahine o Oregona no ka Ua Kanilehua o Hilo, a e hoohala ana lakou i kekahi manawa ma ka Luapele.
I keia manawa, akahi no a maopopo ae, e huli hoi mai ana no o Kanikela Farani A. Vizzvona no Honolulu nei iloko o na pule pokole mai keia wa aku.
Ma ka mokuahi Nippon Maru i hala aku nei no Iapana, o Mr. H. C. Seppings, kekahi o na ohua. He mea kakau nupepa oia no Pelekane, a i holo aku nei oia e kakau i ka moolelo o Adimarala Togo.
I ka Poakolu iho nei i hoomaka hou ae ai na keiki kinipopo o keia kulanakauhale e hui a hoolala no keia kau kinipopo nui e hoea mai ana. O na hui i maopopo loa i keia manawa oia o Punahou, Kamehameha ame Honolulu.
Ua hoike ae ka Loio Kalana o Oahu nei imua o ka halawai a na Lunakiai ma ka po Poalua nei, aole e hiki i ke Kalana ke hookaawale i mau haawina dala mai kona waihona ae no ke kokua ana i na kula aupuni e nele mai nei i ke dala.
O Lunakanawai Archer ka i hoike ae i kona manao kakoo i ke kokua ana o ke Aupuni Kalana i na kula aupuni. me kona manao na ka Ahaolelo no hoi e hoihoi mai i na dala a ke Kalana i haawi ai, ke hui ae ia Aha “in the sweet” mahope.
Ma ka la 25 o keia mahina i ka Ehukai o PUaena ka Bana Hawaii e hookani ai i ka lakou mau hokeo. O keia iho la kekahi mea a ka Papa Lunakiai o Oahu nei i hooholo ai ma ka halawai o ka po Poalua nei, a mamuli hoi o ke noi ana a Mr. Cox.
Na ka Rev. J. Kalino i malama ke anaina pule o Ewa nei i nehinei a o ka Olelo paipai o ka pauku 14 o ka mokuna 11 o Korineto II. He momona na mea i pu-a ia mai. Malaila pu ae no ka Ha’iolelo. Moses K. Nakuina a mahope o ke anaina pule. ke anaina Hoeueu Kristiano.
KAA OTOMOBILA O H. HACKFELD & CO., MAKANA EKAHI.
KAA OTOMOBILA O DR. ANDERSON. MAKANA ELUA.
Ka Mea oi Loa o ka Maikai.
O ke kaupale ana aku wahi a ka olelo a’o, he oi aku ia mamua o ka hoola ana. He mea oiaio keia a he oi aku no hoi ka maalahi o ka hana ana pela. Oia hoi. ina oe i ike i ke ano o ke kaupale ana aku. Ina i ike ka poe o ke taona o Ladana i ke kaupale ana aku i ka ma’i bubonika, ina paha aole e laha ino kela ano ma’i weliweli malaila. Eia nae, aole lakou i ike, a ua pulumiia lakou e like me ka haule ana o na kumu huita i na pahi oi o ka mikini oki. I mea e pakele ai mai na enemi mai, kukulu na kanaka i na papu ame na kakela, a kukulu i mau pa kiekie a puni ko lakou mau kulanakauhale. a ma keia hana, he noeau a naauao keia noonoo ana. Aka nae, o ka ma’i, ka mea nana e luku nei he mau tausani a he umi wale no ma ke kahua kaua. he mea hiki ole ia ke pale aku ma ke kukulu ana i mau pa manoanoa a holo ana paha me ka manao e pakele. O ka hana pono wale no e pono e hanaia. oia ka malama ana i ke kino i loaa ke olakino maikai ma o ka malama ana i ke no o ka noho ana ame ka lawe ana i kekahi laau hooikaika kino ame hoomaemae koko e like me ka
WAMPOLES PREPARATIONS
ka mea nana e hoomaikai ka hoowali ana i ka ai, pepehi ame ke kipaku ana i na anoano o ka ma’i mai loko aku o ke koko. a hooikaika i na mea hana o ke kino holookoa e hana i ka lakou apana hana pakahi i haawiia mai ai ia lakou e hana. He momona keia laau holomua a maikai e like me ka hone meili, a ua loaa iaia na mea hoonoono ai i loaa i ka Aila Puupaa Cod Maemae, i hanaia e makou mailoko mai o ka puupaa o ka i’a cod hou loa, a i huiia me ke Compound Syrup of Hypophosphites ame ka Extracts of Malt and Wild Cherry. Aole he laau i like me keia no ke ke pale ana, hooluolu ana, ame ka hoola ana i ka La Garipa, eha o ka Puu ame ke Akemama, Ma’i Hi Koko. Nawaliwali, ame na ma’i e ae e loaa ana ia kakou apau loa mai na anoano mai o na ma’i like ole e komo mau nei iloko o kakou ma ka hanu ana i ka ea, ma ka ai ana, ame ka inu ana i ka wai. ame kekahi mau hana e ae a kakou e maopopo ole ai he kumu keia e pilikia ai. Eia iho ka olelo a Kauka W. D. McNab o Kanada: “Ua loaa ia’u kau aila puupaa cod he laau maikai loa ia no ke kukulu hou ana ame ka hooikaika hou ana i na ano ma’i emi pu wale mai o ke kino.” E loaa no ka maha mai ka manawa e lawe ai i ke kulu mua. E hoao nou iho i ike i ka oiaio. Na ka omole mua e hoike mai i ka oiaio ame ka oiaio ole. E loaa no ma na halekuai laau lapaau apau.
Kokoke loa e paa ka hale puhiohe o Aala Paka ae nei.
POINO MA KA HOOPANEE.
HE MEA PONO E LAWELAWE KOKE I KA MALAMA ANA I KE OLA.
O ka pilikia o na puupaa he mea maikai ole ia ke hoohemahemaia. no ka mea he kolo malie kana hana a hiki i ka manawa e paa ai ke kanaka malalo o kona malu mamua o ka hoomaopopoia ana. Ua hiki ia lakou ke hoololi i ko lakou mau ano a like me kekahi mau ma’i e ae a ma ia ano i kuhihewa nui ia ai lakou.
Mai kuhihewa oe!
Mai hoopalaleha.
Ano e lapaau i kou mau puupaa!
Ka ma’i na puupaa aole lakou e oluolu ana aia wale no a lawe oe i ka laau no na puupaa. O kaDoan’s Backache Kidney Pills oia wale no ka loaa kupono loa e loaa koke ai ke ola i na puupaa. He hoola kan@. Ua hoola oia i kekahi poe ma Honolulu nei.
Mr. A. J. Cahill o ke alanui Papu, ma keia kulanakauhale, kiai po kana hana ma kahi o Messrs T. H. Davies & Co., Kaupalenaia, wahi ana. He sela moku au i ko’u mau la opio. a i kahi manawa, ua hana au no ka Hui Moku Piliaina. Mamuli o keia loaa ana o’u i ke kikala haneenee me ka ma’i ma ka puupaa ua haalele au i ko’u hele ana i ke kai. o
No keia kumu, ua hoao au i na ano laau apau. a o ka laau nana au i hoomama keia mau luuluu i loaa ia’u, oia no keia Huaale a Doans no ke Kikala Haneenee me ka Puupaa. Eia ke kuai ia nei ma ka halekuai laau o Hollister Oia loa ko’u ma’i, pau na ehaeha i loaa ia’u. Ina e manao ana kahi mea e ike ia’u e loaa no au ma kahi kuai lakou moku o Van Dorn’s alanui Papu.
E loaa no ia oe. ka laau i ola ai o Mr. Cahill, me ka nana pono ana i ka inoa piha like me keia ma ka wahi:-kuai la nei ma na hale haawi laau a pau ma ke 50 keneta o ke poho, 6 poho $2.50. a i ole e leta mai no i ka halekuai laau o Hollister Co. ma Honolulu, Agena no ka Paeaina Hawaii.
BENJ. K. KAIWIAEA UA HALA.
Ma ka lono oiaio loa i loaa mai ma ke ku ana mai ma ke ku ana mai o ke Kalaudina i keia kakahiaka, i loaa mai ai kekahi lono hookaumaha. mamuli o ke kipa ana ae o ka Anela o ka Make a lawe aku la i ka hanu hope loa o Benj. K. Kaiwiaea ma ka po Sabati la 25 o Feb. 1906. ma Haou. Hana. Maui. kahi hoi ana i noho aku ai ma ka oihana hoonaauao i kona lahui ame na lahui e like hoi me ka hoonee ana a ka Papa Hoonaauao i na mahina pokole wale no i hala ae nei, a kuu aku la i ka uhane no ka hopena o na mea apau, He kanaka o B. K. Kaiwiaea i hilinai nui ia a he makamaka maikai hookipa a heahea no na hoaloha apau e kipa ana ma Hana, he ai a he wahi hoi e hoomoe ai o na poo me ke kuha’u ole o na poe malihini apau e kipa ana ma kona Home, na na poe a pau i kipa ma kona Home e hooia iho i keia. Me ka wahine ke kaikamahine ame na ohana ko maua U pu ana, a na ke Aloha.
Me ke aloha nui,
Akua no e kiai mai ia kakou ma Kona MR. AME MRS. JAS. H. S. KALEO.
Auwaiolimu. Honolulu, Maraki 1, 1906.
Ua hoopuka ae nei o Lunamakai Baraunu i na kauoha i kona mau hope aole e hookuu i kekahi paahao. Ua ala mai keia kauoha mamuli o ka hookuuia ana o Kaeo i hoopiiia no ka pepehi i kana wahine, e Hope-Lunamakai Kalakiela. Ua kauoha hou ia e hopu ia Kaeo e Lunamakai Baraunu.
HOOLAHA HOOKAPU.
Ke hoike ia aku nei ka lohe i na mea apau, e hele nei ka auau kai a lawaia paha ma ke kai o Hamohamo, ma Waikiki-kai, Honolulu, Oahu, ke hookapu nei ka Moiwahine Liliuokalani aole e kii i ka Limu Pakaeleawaa, me ka Limu Huluhuluwaena, Opihi, Pupualealea, I-na, Haueue ame ka Pipipi, ma ke alo ponoi iho o ka Pa Alii. Na kona mau lima alii ponoi no i kanu a hookawowo i keia mau mea apau i hoike ia ae la maluna, a o ka mea e kii ana i keia mau mea e hookapu ia nei, e hopu ia no oia, a hoopai ia e ke kanawai. O keia mau mea apau i kanu ia e ka Moiwahine mai Hilo i lawe ia mai ai kekahi no Lahaina kekahi, no Molokai kekahi, no Kauai kekahi, no Waialua, Oahu nei, kekahi.
E hoolohe i keia hookapu.
J. O. CARTER,
Agena.
Honolulu T. H., Malaki 1 1906.
3091-Mar. 2. 9. 16. 23. 30
OLELO HOOLAHA.
E ike auanei na mea apau. Owau o Mrs. Mata Yoshimasu wahine mare a Yoshimasu i oleloia a mamuli o kona haalele kumuole ana mai ia’u a holo malu aku oia me ka maopopo ole ia’u o kana wahi i holo ai nolaila ina oia maloko o na palena o keia Teritori o Hawaii nei a ua ike oia i keia Hoolaha au ma keia Nupepa e oluolu oia e hoi mai me a’u kana wahine mare.
Owau no me ka oiaio,
MRS. MASA YOSHIMASU.
Kawaihae. Feberuari 26. 1906.
3109-Mch. 2.
OLELO HOOLAHA.
I na mea apau e nana ana i keia. Owau o Mrs. P. Kaluakapu ame kuu kane mare o Mr. Kaikuahine liilii no Haleola. Honomakau. N. Kohala. Hawaii. A ma keia ke hana nei, a hoike aku ma ke akea, ua hoopau loa ia ka mana waiwai, ame ke kuleana o na hooilina ma ke kanawai iloko o ka Palapala Kuai me George F. Beckley i hanaia ma ka la 20 o Okatoba. A. D. 1885, a hooiaioia ma ka Buke Aupuni 102. aoao 62 ame 63 ma ka la 5 o Iune, A. D. 1886. A ma keia ua pau loa ka mana o ia Palapala.
A no ka oiaio o keia.
MRS. P. KALUAKAPU.
KAIKUAHINE MAHI.
Haleola. Honomakau. N. Kohala. Hawaii, Feberuari 2, 1906.
3109-Mar. 2, 9
HOOLAHA HOOKO MORAKI.
ISAAC NOAR.
HOOLAHA MANAO PANIKU A KUAI A KA MEA PAA MOLAKI.
Malalo a ma ka pono o ka mana o ke kuai i paa iloko o kela molaki i hanaia i ka la 28 o Iune, 1901, e Isaac Noar, o Honolulu. Mokupuni o Oahu, Teritori o Hawaii. ma ke ano Mea Molaki, ia Ida E. Lamb, o Honolulu i olelo mua ia a’e nei, ma ke ano Mea Paa Molaki, a i kopeia iloko o ka buke 226, ma na aoao 142-144 o ko Hawaii Keena Kakaukope; a i kulike ai hoi me ka Pauku 2161 (Mokuna 139) o na Kanawai Hooponopono hou ia o Hawaii, o ka mea nona ka inoa malalo iho nei, Ida E. Lamb, ma keia ke haawi nei i ka hoolaha ke manao nei oia e paniku i ka molaki i oleloia no ke kumu i uha’iia, o ia hoi: ka uku ole ia ana o ke kumupaa ame ka ukupanee i paa ma ua molaki la i oleloia i ka manawa e uku ai.
Ke haawi hou ia aku nei no hoi ka hoolaha o ka waiwai i hooliloia e ua molaki ia i oleloia e kuaiia aku ana ma ke kuai kudala akea ma na keena kudala o James F. Morgan. alanui Kaahumanu, Honolulu i olelo mua ia a’e nei, Lunakudala, ma ka Poaono, ka la 24 o Malaki, 1906, ma ka hora umikumamalua awakea.
O ka waiwai i hooliloia e ua molaki la i oleloia a e kuaiia aku ana o ia iho keia:
O kela apana a mahele apau loa o ka aina (he hapa o ka aina i hoikeia a i hoakakaia iloko o ka Palapalka Sila Nui 1125 L. C. a. 709 ia Pehu ma ke ano Apana 1) e waiho la ma ka aoao Akau o Alanui Papu ma Kapauhi, Honolulu i olelo mua ia a’e nei, a penei hoi ke apo ana ame ka hoakaka ana:
E hoomaka ana ma ke kiko ma ka laina akau hou o alanui Papu kahi hoi o ka palena aina mawaena o ka L. C. A. 734 ia Piikoi ame L. C. A. 709 ia Pehu e oki ana i ua laina la i oleloia, a e holo ana:
1. Ak. 15 deg. 27 min. Kom. oiaio 50.6 kapuai e holo ana ma ka L. C. A. 734 ia Piikoi a hiki i ke kiko maluna o ka paia pohaku 2 kapuai makai o ka palena Hikina o ia mea hookahi;
2. Ak. 78 deg. 45 min. Hik. oiaio 19 kapuai e holo ana ma na aina o Vierra ame Emmes e holo ana hoi ma ka pa 9 kapuai ma ko Vierra ame 10 kapuai ma ko Emmes:
3. Ak. 86 deg. 35 min. Hik. oiaio 103 kapuai e holo ana ma ko Emmes aina ma ka pili pa a hiki i ka laina e ku nei o ke Alanui Papu; alaila,
4. Hema 61 deg. 14 min. Kom. oiaio 121 kapuai e holo ana ma ka laina hou o Alanui Papu, a hiki i kahi i hoomaka ai.
E ili ana he 3177 kapuai kuea a i ole ma kauwahi olaila a iloko olaila na aina apu i hooliloia a i ole ma kauwahi olaila, a iloko olaila na aina apau i hooliloia a i ole e manaoia nei e hoolilo aku ia Isaac Noar i oleloia e Ching On ma kekahi palapala i hanaia i ka la 28 o Iune. 1901.
IDA E. LAMB
Ma o J. M. DOWSETT.
Kona Loio Ponoi.
Ma ke dala kuike ka makemake a ma ke Dala Gula o Amerika; ma ka aoao hoi o ka mea kuai mai na lilo Palapala apau.
No na mea aku i koe e ike a’e ia Holmes & Stanley, alanui Kaahumanu, Honolulu, na loio o ka Mea Paa Molaki, a i ole ia James F. Morgan, Honolulu, Lunakudala.
3109-Mar. 2, 9, 16, 23
LAAUILINONABEBE
O Kona Paa ame Kona Lauoho kekahi mea ano nui loa a na Makuahine e noonoo nui ai.
* *
UA HANAUIA KEIA A ME KELA KEIKI ILOKO O KA HONUA NEI me ke ewe o na ma’i lehulehu e ulu mai ana iloko o ka ili. ke poo a e lilo ana hoi ke koko ia wa i mea nui loa no ka panee ana i keia popilikia a peia i lilo ai la i mea nui loa e hookaumaha mau ai i ka noonoo o kela a me keia mea i loohia i ka nali ana a na ma’i lehulehu. Aole keia mea i hookaumaha ia ma kekahi ano e ae, aka, mamuli no o ka hoopalalehaia ana e ka mea i kupono e malama a makaala i keia poino. Nolaila, ua lilo i kumuhana na kela a me keia makuahine maikai e makaala mau ai i ka lakou mau keiki e loohia ana i na popilikia lehulehu e ulu mai ana mamuli o ke koko ino. e hookamaaina mau lakou me na mea a pau e hiki ai ke pale aku i keia mau popilikia lehulehu, i mea hoi e loaa ai ke ola maikai, malalo o na lapaau noeau ana me ka hikiwawe a me ke ola loa no hoi.
Ua olelo ia o ka auau me ka wai pumehana a me ke KOPA CUTICURA no ka hoomaemae ana i ka ili no ka papaa i ka lepo a me kahi mau ino e ae. a pela hoi no ka unahi-pii, a pela hoi. ina e kapili malie i ka Aila Hamo CUTICURA no ka hooki koke ana i ka maneo o ka ili. ka eeke ano manene o ka ili ame ka pehu, a pela hoi no ka hoomalielie ana i ka hu’i a me ka hoola ana i na palapu, a mahope aku oia wa, ina ka e inu i ka laau hoohainua CUTICURA, oia wale ae ia no ka na mea a pau e hana ai no ka pale ana aku i keia mau kinaunau o na keiki liilii i na wa a pau e hoomaka mai ai, a ina no ua loaa mua. he mea pau wale no ia i kela mau laau ae la, ke malama pono ia na kuhikuhi. Ma keia hana ana peia, e loaa ai i na makuahine hoomanawanui ka maha a me ka oluolu o ka naau. a he mea no hoi ia no lakou e hookaumaha ole ia ai i na wa a pau. Ua hoola ia keia mau haawina pomaikai ma na home lehulehu a puni ka aina.
Mamuli o ka momona, ka maemae, a me ka hikiwawe o ke ola o keia laau, i makemake nui ia ai e na lahui kanaka a pau i hoao a ikemaka i kona waiwai nui ma ke ano hoola, a pela no hoi i hilinai nui ia ai kona waiwai no ka hoopakele ana i ka luhi a me ke kaumaha o na makua lehulehu ma na wahi a pau, a pela no i malama nui ia ai maloko o na home.
HE HOOLAHA MAOPOPO NO NA MA’I MALOKO A MAWAHO O KE KINO.
Oia hoi ke KOPA CUTICURA e hoomaemae ai i ka ili a me ke kepia o ke poo a hoowaliwali i ka alualu, o ka AILA CUTICURA HAMO no ka hoopau koke i ka maneo a hooluolu a hoola a me ke CUTICURA RESOLVENT no ka hooluolu a hoomaemae ana i ke koko. Ke kuaiia nei ma na wahi a pau o ka honua nei. Keena Kuai ma Auseteralia, R. Towns & Co., Sycney, N. S. W. Keena ma Aferika Hema. Lamron, Ltd.m Cape Town. “I loaa ai ka ili pahee maikai ka lauoho a me na lima.”
O POTTER DRUG AND CHEM. COMP., Boston, U. S. A., na Ona o na Laau CUTICURA a pau loa.
HOOLAHA HOOKO MORAKI.
HOOLAHA MANAO PANIKU AME KUAI PANIKU A KA MEA PAA MOLAKI.
I KULIKE AI me ka manao o kekahi molaki i hanaia e SARAH K. LAA. WILLIAM LAA. kana kane, a me PELANI (w) i ka THE WESTER and HAWAIIAN INVESTMENT COMPANY, ma ka la 4 o Mei, 1898, kopeia ma ka Buke 180 aoao 61, ma keia ke hoikeia aku nei ka lohe ua manao ka mea paa molaki e paniku i ua molaki ’la no ka uhakiia o ke kumu, oia hoi, ka uku oleia o ke kumupaa ame ka ukupanee i ka manawa e uku ai.
Ke hoike houia aku nei mahope iho o ka hala ana o na pule ekolu mai ka la aku o keia hoolaha, e hoolahaia aku ana ka waiwai i paa maloko o ua molaki ’la no ke kuai ma ke kuai kudala. ma na keena kudala o JAMES F. MORGAN. ma Honolulu ma ka Poaono, ka la 24 o Malaki, 1906, ma ka hora 12 awakea o ua la ’la, a ma ia manawa a ma ia wahi e kuaiia ku ai ka waiwai i oleloia.
E loaa no na mea aku i koe mai ia Castle ame Withington mai, na Loio o ka Mea Paa Molaki.
OLELO: Kuike ma ke Dala Gula o Amerika Huipuia. No na lilo Palapala ma ka aoao o ka mea kuai mai.
Hanaia Honolulu, Feberuari 27, 1906.
THE WESTERN AND HAWAIIAN INVESTMENT CO., LTD.
Mea Paa Molaki.
Penei na waiwai i paa maloko o ua molaki ’la.
1. -He aina pa-hale ma ka aoao mauka o ke Alanui Pauahi. ma Honolulu. he 59.8 kapuai o mua ame 46.4 kapuai hohonu, oia ka aina i uhi hapaia e ke Kuleana 11213, o ka hapa i paa ma keia molaki oia ko Kaihe apana ame kekahi apana aina aupuni, i hoolilo ia mai e ke Kuhina Kalaiaina ia William Laa, a i kopeia ma ka Buke 168, aoao 247; o ka hapa i koe oia ka hapalua o na mea molaki aku iloko o ka apana o Kaihe. a i aelikeia hoi e hookaawale aku no lakou.
2. –He apana aina ma Kalaepohaku iloko o Palama, Honolulu, e ili ana 2.4 eka i hoikeia ma ka R. P. 2493, Kuleana 1746 ia Nakaikuaana mai iaia mai i ili mai ai ua apana aina ala ia Pelani ame William Laa.
3. –Elua mahele e uhi ana he 80 eka, oi aku a emi mai paha. iloko o ke Ahupuaa o Kahana, i uhiia e ka palapala kuai a Pelani ame Pupu ia William Laa i oleloia, i kopeia ma ka Buke –aoao-
4. Aina ma Waikele, Ewa, i uhiia ma ka R. P. 860, Kuleana 858-B, ia Puolohenau, e ili ana 2 eka, a oia ka apana aina i ili mai i ua William Laa ’la ma ke ano hooilina: ame ka R. P. 3893. Kuleana 858-C, ia Pokini, e ili ana 1,039 eka, i hooliloia ia Pelani i oleloia ma ka palapala kuai a Pokini. i kopeia ma ka Buke 29. aoao 154, ame
5. –Ke kuleana hoolimalima o Sarah K. Laa i oleloia iloko o kekahi wahi apana aina uuku e pili ana i ka apana aina ma ke Alanui Pauahi i hoikeia ma ka helu ekahi maluna ae.
O na mahele elua iloko o ke Ahupuaa o Kahana i hoikeia ma ka “3” ua hookuuia mai na hihia mai o keia molaki, aole hoi e kuai puia ana malalo o keia kuai paniku.
3109-Mar. 2. 9. 16. 23.
Ke Maikai Ole ke Koko ua Pilikia Iho Ia ke Kino.
E hoomaemae i ke koko a e kipakuia aku no na ano ma’i apau. Aole he laau i loaa ae no ka hoomaemae ana i oi aku mamua o ka AYER’S SARSAPARILLA- ka mea hoi nana e hookaawale aku i na kumu o ka ma’i ma ka hoola hoowaiwai ana i ke koko a ma ia ano ua hooikaika ia ke kukulu ana i ke kino: a o ka hoopena hikiwawe loa oia ka hoi ana mai o ke olakino maikai. Aia he kaukani o na kanaka i hiki ke hoike ae i na kula na ehaeha a lakou i noho kaumana ai mamuli o ke kokokoino, a i keia manawa eia lakou ke hauoli hou nei i keia ola ana a lakou e makaukau mau nei e hapai pookela ae i ka Ayer’s Sarsaparilla.
Hoomakaukauia e Dr. J. C. Ayer & Co., Lowell, Mass., U. S. A.
HOOLAHA HUI.
Ke hoolaha nei o Tugawa Kotaro ame Nishimura Gentaro o Olaa, Hawaii, ua hoohui laua ia laua iho no ka hana Malama Hotel ame Haleaina ma ka Mile 9 o ke Alanui Luapele, malalo o ka inoa Tugawa & Nishimura.
3109-Mch. 2, 9.