Ka Nupepa Kuokoa, Volume XLIV, Number 9, 2 March 1906 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

NUPEPA KUOKOA, HONOLULU, T. H., POALIMA, MARAKI 2, 1906.   3

TISIA - O - ATICA

Ka Wiwoole o na

Wiwoole

Ke Ahikanana nana i Ulaa ke Kana-

wai o ka Make o Ciretia.

MOKUNA VIII.

HUI MALIHINI MA KA LUAPAAHAO.

"E Kalia, ua ike no oe i ko'u hilinai hala ole ia oe, a eia no ia haawina me a'u nou, ao ka'u e makemake nei e hoike aku ia oe, e ike au iaia e pono ai."

"Aka, no keaha oe i makemake ai e ike iaia?" i ninau aku ai o Kalia.

"Mai nana oe i ke kumu.  Eia wale no, ua makemake au e ike iaia."

"A, e kuu hakuwahine," wahi a Kalia i pane ae ai me ka luliluli ana o kona poo, "ke manao nei wau, ua aloha oe i ka opio o Atenai."

"Aole au i makemake e hoole ia mea," wahi a Arienda, "no ka mea, ua ike no wau aia ia mea me a'u a ua aloha i'o no wau iaia.  He haawina ia i kau mai maluna o'u a'u i ike ole ai mamua.  E Kalia, e ike au iaia e pono ai."

"Aka, no keaha oe e ike ai iaia?  Oiai, ina e hoike aku ana oe i kou aloha nona, e hoike i'o mai ana kela i kona aloha nou, alaila, o ko olua hui ana, he hookomo ana aku ia iloko o ke kaumaha mau loa.  Ua ike no oe, ua silaia ke kanaka opio no ka make a ma ka la apopo e hookoia ai, a aohe he mana hookahi nana e hoopakele ae iaia a ke hala oia, o kou noho mau loa ana ia iloko o ke kaumaha."

"E Kalia," wahi a ke kaikamahinealii, "me ka puili ana ae o kona mau lima, "aole keia o ka manawa wale no i loaa ai ia ano ia'u, aka, he nui na manawa, eia nae o keia aku ka oi i loaa ia'u.  Malia e olelo mai ana paha oe, i kuu aloha i'o a ua alakaiia au ma ia mea, a'u paha e mihi ai ma keia hope aku ; ke manao nei wau, aole au e mihi ana."

"Me he mea la, eia kekahi mea ke hawanawana nei iloko o kuu uhane e pakele ana no oia," i hoomau hou aku ai o Arienda.  "Aia ko'u hoku ke kau la maluna o kona lae mohaha.  O ka'u e ike nei, ina wau e ike ana iaia i keia po, alaila, o ia ike ana a'u ke ala e hala ae ai ka make."

"A pehea oe e ike ai iaia?" i ninau aku ai ka wahineukali.

"Ina e kokua mai oe ia'u, ke manao nei wau ua hiki no ke hanaia."

"O no ia mea he kokua, ua haawi mua wau ia'u iho, a ina nei no ka lilo aku o kuu ola ilaila, e hookoia aku no pela, i mea e puka pono ai," wahi a Kalia i kalele ikaika iho ai i kana hoike manao.

"Ke hoomaikai aku nei au ia oe e kuu Kalia maikai," wahi a Arienda i hooho olioli ae ai.

"A e hoike mai oe i kau mau makemake a'u e hana aku ai," wahi a Kalia i pane aku ai, "a na'u no e hooko aku."

"Eia.  He kamaaina anei oe i na lunakoa o ka pualikiai?"

"Ae," wahi a Kalia.

"A ua ike no anei oe i kahi e ai ai lakou?"

"Ae, e kuu hakuwahine," i pane aku ai o Kalia.

"He ke'ake'aia no anei oe i ke komo ana iloko o ia wahi mamua o ka aina-ahiahi o keia la?" i ninau aku ai o Arienda.

"Aole he loaa o na hookuia o ia ano me a'u ke komo au iloko olaila.  He maalahi loa ke ala no'u."

"A he hiki maalahi anei ia oe ke hoohuihui i ka pauda hoohiamoe iloko o na meaai o ia poe koe?"

Alaila kau iho la ke poo o Kalia maluna o kona lima me he mea la e hoomaha ana, a noonoo iho la no kekahi mau minuke.

"He hiki no," wahi a Kalia i hooho ae ai.  "Ke manao nei au ua hiki ia'u ke hana me ka nui ole o na ke'ake'a.  O kahi pilikia wale no oia no ka hoohuihui ana i ka pauda e hoohuoi koke ole ia ai e lakou."

"Na'u ia e hoomaopopo aku," wahi a Arienda.  "Ua manao wale au aole e hoololi ana ua uwati kiai a hiki i ke aumoe o keia po."

"Pela," wahi a Kalia i hooia aku ai.  "Aole e hoololiia mamua o kela manawa, a ina no hoi e hoololi ole ia ana, alaila, oia aku la no.

Ua ike no nae au o na lunakoa apau i hoopaaia no ke kiai ana aole lakou e hoohemoia aku a hookomoia mai i poe okoa."

"A he ai like no anei na koa me na lunakoa i kahi hookahi?" i ninau aku ai o Arienda.

"Ae, e kuu hakuwahine, oia hoi, ke noho hana like lakou iloko o ka halealii."

"Alaila, e hoomakaukau oe ia oe iho, ame ke akamai no hoi e hoohana ai, e kuu Kalia maikai.  No ka pauda ua makaukau wau me ia mea.  A ke ike nei au ua kokua mai na akua o kakou ia'u. Ua hooolakoia mai au me keia ano pauda hoohiamoe, he makaukau hoi no'u no ke ku-e ana i ka moi o Aikupika a i pakele ai au mai iaia mai, aka, ma keia, ke ike la wau eia ka hana i waiwai loa ai ua pauda nei."

Aole no hoi liuliu loa ua napoo aku la no hoi ka la e like me ka mau, a uhi iho la no hoi ka malu o ka po iluna o ka aina okoa, a oia ka manawa i haawi aku ai ke kaikamahinealii i ka pauda hoohiamoe ia Kalia, me ka haawi ana aku i na olelo hoolana no ka hooko ana i kana mikiona.

"No ka mea," wahi a Arienda, "he mea pono e hala ole ko'u hui ana me ia i keia po i ike ai au iaia.  O, e Kalia maikai, ina ua pololei kau koho, a ina ua lilo mai kona puuwai ia'u a na'u aole e nele ka loaa o na alanui e pakele ai oia mai ka make weliweli i kunipaa mua ia."

Haalele iho la o Kalia i kona hakuwahine a hoomaka aku la ka hele akahele ana no kahi i makemakeia; a koe iho la no hoi o Arienda oia wale no.  Nona iho, ua maopopo loa, ua aloha oia i ka opio o Atenai.  Mamua aku aole oia i loaa i na haawina o keia ano oiai nae he nui na kanaka opio o kon aaina iho ame ko kekahi mau aina mai i hui me ia a aole nae i umea i kona noonoo, aka. i ka ike ana o Arienda i keia kanaka u'i, ua pii koke ae la ke aloha a mokio pololei mai la i kana pua a loaa pono mai la ka puuwai palupalu o ka wahine u'i a o ka lilo ae la no ia i makana na ke aloha.

No ka oiaio o keia mau anoi ana iloko iho o ka wahine opio Arienda ua hooholo iho oia e hoopakele i kana ipo i aloha ai me ka hui mua ole mamua, no ka mea, o kona kulana ka mea nana i koi ikaika iaia e hoopakele ae iaia mai ka make ona i kuleana ole ai e komo koke aku.  Alaila, me keia mau anoi iloko iho o Arienda i pelu iho ai kona mau kuli a nonoi aku la i na kaua e aloha ia mai kana pule ma ka hoopakele ana i ke kanaka i lilo ai kona puuwai.

I kela ahiahi aole i hele aku kona makuakane e ike iaia, a pela i kaa pono iho ai oia nona iho, a nui no hoi kona manawa e hakukoi ai i na hiohiona onaona i loaa iaia me he moeuhane la ame ka hoomakaukau ana i na mea e hoolako aku ai i kana aloha i aloha malihini ai.

A hala he hora hookahi mahope iho, i hoi mai ai o Kalia mai kana mikiona mai, a me ke akahele no hoi ka nihihele ana mai mamua o kona hoopuka ana i kekahi olelo.  I ke ku ana aku o Kalia imua o kona hakuwahine, aia oia iloko o ke kulana haalulu, e naka ana me ka pihoihoi nui.

"E kuu Kalia maikai," ahi a Arienda i hooho mua aku ai i ka wa ona i ike aku ai i kona wahineukali, "mai maka'u oe, no ka mea, o kaua wale no keia.  Heaha kau hana i hana aku nei e ano-e nei oe?"

Alaila, noho iho la ka wahineukali ilalo no ka hoomaha iki ana i kuu iho ai kona nae, alaila pane aku la oia:

"U hana aku nei au a oi aku mamua o na mea au i kauoha mai ai ia'u e hana no ka holomua o ka kaua hana e upu nei.  Ua hoohuihuiia aku nei e a'u na meaai o na koa apau me ka laau hoohiamoe, a ua loaa pu aku nei ia'u ke keena paahao o ke kanaka opio a kaua e upu nei."

"Ae, ua poina i'o wau i ka hoike aku ia oe no ia mea, a ke haawi aku nei wau i kuu hoomaikai nui ia oe no keia lanakila nui o kau mikiona.  He hoaloha maikai a oiaio oe na'u.  A ua maopopo pono loa anei ia oe e ai ana na koa i kela mau meaai?"

"Ua ike aku nei no wau e ai ana," wahi a Kalia i hooiaio aku ai, "nolaila, aole he kanalua ana no ia mea.  Ina aole lakou e hiamoe ana mamua o ka manawa kupono, alaila-----"

"Aole he maka'u ana no ia mea," i kahamaha aku ai o Arienda.

"Ua ike au he pauda ikaika loa kela e poino ole ai nae ke ola.  Ina ua ai i'o aku nei lakou ma keia manawa, alaila, e pau ana lakou i ka hiamoe mamua o ka hora umi o keia po."

Ma ia manawa mai me he mea la he mau pule loihi ia o ke kali ana o ka hiki mai o ka manawa kupono e hoomaka ai ka hana a ke kaikamahinealii o Ciretia, a he nui hoi kau i ke kauki ame ka pihoihoi o ka hoea koke mai o ka manawa kupono.

A i ka manawa no ana i hoomaopopo loa ai ua maluhia ka halealii holookoa, ua lawe mai la oia he wahi kukui po uuku e hiki ai iaia ke pani ae i ka malamalama i na manawa apau ana e makemake ai pela, o kona hele aku la no ia.

Ma keia ala, he nui na ala-ololi kikekee a hauwili no hoi mamua o ka hiki ana aku i ka holo nui a mamua no hoi o ka hiki ana aku i kahi o ka halealii, malalo pono olaila, ka luapaahao i hoopaaia ai na paahao o Atenai.  A hala kekahi manawa o ka hele akahele ana ua hiki aku la laua ma kahi i makemakeia me ka loaa ole o na kuia.

Ma ia wahi ua komo aku la laua iloko o kekahi keena, kahi i loaa aku ai ia laua he kukui e kau ana iluna o ke pakaukau e a ana, a iluna o ka noho loihi ka lunakoa e hiamoe ana.  Alaila, pii ae la ka haalulu iloko o na wahine opio a elua, ke Kaikamahinealii Arienda ame ka wahineukali Kalia.  He haalulu ko Kalia no ka maka'u a he haalulu hoi ko Arienda no ke pihoihoi e ake ana o ka hiki koke aku i kahi o ka makemake e hakukoi ana.

"E paa aku oe i keia kukui," wahi a Arienda i hawanawana aku, a o kekahi no hoi, he maikai loa ka pouli no ka poe hiamoe."

A lilo ke kukui ia Kalia ua hoomau aku la na wahine opio imua.  A o ke kamaaina loa o Arienda i ka hele mau ana ma keia mau wahi, aole he pohihihi o ke alanui nona e hiki ai i kahi i makemakeia.  Ma na ipuka apau aole i kiia no ka mea ua kukuluia he koa kiai ma kela ame keia puka komo apau, a o lakou apau ua pau i ka hiamoe.

Aole no hoi i liuliu ka laua hoomau ana ua hiki aku la laua i ka papaku o ka halealii, kahi o ke keena o ka opio kane a laua e imi ana e loaa.  A ma ka puka o ua keena nei e hiamoe ana kekahi kiai me kana panikaua e lewalewa ana ma kona aoao, a o kana ihe hoi e waiho ana iluna o ka papahele o ka holo.  Ua paniia aku no ke panipuka o ua keena nei, a he pani kaumaha no ka manoanoa maoli no, aka aole i kiia, ke kumu i maalahi ai ka hana ma ka aoao o na wahine opio.

Iloko o ia keena e noho ana o Tisia alii, aole no hoi i hiamoe.  Ua hiamoe mua iho oia i ka hapamua o ke ahiahi no ke anomaluhiluhi a i keia manawa oia i ala ae ai, a o ka mea nana i hoohikilele koke ae iaia mamuli no ia o ka loaa ana iaia o kekahi moeuhane ano-e.

A no ia mea, i ala ae ai oia iluna a okuu iho la me ka noonoo nui ana i ka manao o ia moeuhane, a e noonoo pu ana hoi i na anoai o na mea i hanaia mamua iho, a heaha ana la ka hopena e hiki mai ana.

O kona manaolana mai ka manawa ana i kau mai ai iluna o ka lepo o Ciretia aole i ikaika loa e like me ko kela oiai oia i Atenai.  Ua loaa iho la iaia ka ike ame ka hoomaopopo pono ana he lua liona hauhili maoli ka keia o na alanui, a oi loa aku kona ano-e mamuli o ka laweia ana o kana pahikaua punahele mai iaia aku.

A i ka wa i waiho aku ai kona poo iluna o kahi uluna i haawi ia mai ai no ka hooluolu ana i kona poo, akahi no oia a noonoo pono iho, a waiho aku la oia hoi, e haawiia mai i mau lako kaua nana i hiki ai iaia ke paio aku.

A iaia e hoomau ana i kana pule ana ame ka noonoo ikaika ana, me he mea la e paneia mai ana e na uhane ma ka leo hamau--he leo lohe oleia:

"E ka opio a Atira, ina he puuwai oiaio kou a he mau lima wikani o ka ikaika, alaila, e hoolana i kou noonoo."

A i ka manawa i hoi mai ai kona noonoo a ka mau, akahi no oia a hoomaopopo loa iho, aia ka ka pouli ke aakipaa la, eia nae, aole i liuliu ua hemo ae la ke panipuka o kona keena a o ana kekahi malamalama kukui iloko, e kau pono ana hoi maluna ona.

Ua hoopuiwaia oia e keia malamalama i maopopo mua ole iaia e hiki mai ana, a na ia malamalama i haawi aku i ka ike i kona mau maka i ka wahine ana e hakukoi ana.

I ka wa mua me he mea la he moeuhane kana, aka, a hala kekahi mau minuke ua hoi mai la kona noonoo a hooiaio iho la o ka mea ana e moeuhane ana aia imua o kona alo me ke kino maoli.

A o keia mea kino maoli i moeuhaneia e ka malihini paahao, oia no o Arienda, a Arienda no hoi i hoomaopopo koke iho ai, aia ma kona aoao ka hoolauna mau ana, no ka mea oia ke mea i hiki aku i kahi o kana makemake.  Ua hakapono aku la no kona mau amka maluna o ke kanaka malihini i lilo ai kona puuwai ana hoi e hoomaopopo nei ua oi loa ae kona u'i ma keia manawa ana e hui pu ana mamua o ka wa ana i ike ai iloko o ka huaka'i.

"E ke kanaka u'i," wahi a Arienda, "mai hoopuiwa ia oe ma keia hoea ana mai la o'u imua ou i keia po."  Mai nui aku kana mau olelo, aka, ua hapa-pu mai la mamuli o ka haka-nu iki ana o kona leo.

"Ma ke apo gula o Hoku Vinesa," wahi a ka opio malihini i pane aku ai, i kona mau maka e hoonuu ana i ka u'i o ka wahineopio, "ua hiki mai oe i o'u nei aole i aahuia me ka weliweli e lilo ai i mea hoopuiwa, koe wale no a hiki mai o Kupida a nana e hoaleale ae."

I ka pa-e ana mai o ka leo o ke kanaka opio oia ka wa mua loa o ka pa ana o ia leo iloko o na pepeiao o ka u'i o Ciretia a he haawi ana hoi ia i ka puuwai palupalu he ikaika hou.

"Aole au he hoku e hoolalahu aku ai i ke keiki a Vinesa, aka, owau no o Arienda, ke kaikamahine a ka Moi Mainosa."

"Alaila o oe maoli no ke kaikamahine i noho maoli ia e ka u'i." wahi a Tisia i hoopuka mai ai i kana mau olelo hooheno.  "A, ke ike la wau eia ka oiaio ke puka ae la."

A ia manawa hookahi no i ulupuni ae ai ka ula o ke kanaka u'i maluna o ka helehelena o Tisia alii, a i ka wahine opio hoi, he mea nui loa keia hui kino ana ona oiai ke aloha e noho ana iloko ona.

"Ua loaa ia oe kuu inoa," wahi a Arienda, "aka, aole a'u wahi ike no kou."

"E kala mai ia'u e ka lede.  O Tisia ko'u inoa, a owau ke keiki a Atira, ke kaikamahine a Pitiasa, ka moi o Torene.  A o kuu makuakane, aole au i ike iaia."

"Alaila, he alii oe ma ka aoao o ko makuahine," wahi a Arienda i hooho ae ai me ka hoihoi nui i ka wa ona i hoomaopopo ai i ke kulana o ke kanaka opio, he kulana hoi i like me kona.

"Ae.  A imua no wau o kuu kupuna kane moi kahi i noho ai, a imua no o kona alo ko'u hoonaauaoia ana."

"A ua ae a ua haawi mai anei laua ia oe i moepuu no ke kanawai weliweli o ka make o Ciretia a Atenai e hookupu makahiki mau nei?"

"Aole, e kuu lede," wahi a Tisia.  "O keia hiki kino ana mai nei o'u ianei, aole ia ma ak ulia wale, aka, ua koho maoli no wau e komo iloko o keia huaka'i o ka make.  Ua haawi au ia'u iho, a komo i'o no iloko o ka hailona o ka make, no ka manaolana, e loaa ana ka lanakila ia'u ma ka pepehi ana i kela poe liona apau, a ma ia mea hoi e make ai ke kanawai o ka make a hele kuokoa hoi kuu lahui."

"Aka, aole anei oe i hoomaopopo no kou lanakila ole?" i ninau aku ai o Arienda.

"Ae," wahi a Tisia, "akahi no wau a noonoo pono iho nei ia mea."

"A pehea, ua poho paha ka manaolana?"

"Aole, e kuu lede maikai.  E lilo ana kuu inoa i mea hoomanaoia e ko Atenai, hoomanaoia e ka makuahine keiki ole, hoomanaoia e ka lede u'i."

(Aole i pau.)

HOOMAIKAI NUI.

Ia Beke Ihihi, Lahaina, Maui:

I ka lede ahonui a kokua aloha i ke aupuni o ka Haku me ka manao kuio o ka hoopono:

Oiai, ua ike kumaka keia Ekalesia i ka nui o kou ahonui, ma okou lawe ana ae i ka haawe kaumaha i kau iho maluna o ko makou mau poohiwi, e pili ana i ka hoomaemae luakini, ame kahi mau pilikia e ae, a oia mau pilikia i hoomaopopoia $320, a i loaa pono mai hoi i kela ekalesia mai a oe mai.

Nolaila, no makou pakahi iho, a no makou i huiia ma o ko makou Komite la ka Ekalesia o Wainee, Lahaina, Maui.

Ke haawi aku nei i ko makou hoomaikai nui loa ia oe, no ia mau kokua aloha i loaa mai, a hoopau la ko makou mau kaumaha.

Ke pule nei makou i ka Haku aloha, e hoomaikai mai ia oe i na hoomaikai he nui o kona aloha, a nana no auanei e hoonui mai, a hoomau i kou mau pomaikai, ame kou ikaika kokua i kona aupuni iloko o ke ao nei.

O ke aloha o ka Haku pu me oe i na wa apau.

O makou iho no ma o ko makou Komite la.

S. KAPU,

D. W. K. WHITE,

D. KAHAUELIO,

G. W. KAUWENAOLE,

G. K. PAAOAO.

Komite,

Wainee, Lahaina, Kalana o Maui, Feb. 4th, 1906.

[graphic:  2 half-page-width photographs of vehicles in the style of parade 'floats' _, in floral robe, from hood-to-tire.  While the leftmost float is a no doubt a car, the other resembles a canoe on wheels.  Their captions: "MR. FUJIKAWA--MAKANA KAOKOA NO KA HOOHIWAHIWA." and "KO C. W. CHAPIN WAAPA, MAKANA ELUA." ]