Ka Nupepa Kuokoa, Volume XLIV, Number 6, 9 Pepeluali 1906 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

            "Alaila, e ike koke no oia i ka mea i lilo ai kona mau lima i puukalahala no ke kaikamahine a Aboula Casema. O Ala Abasa ko'u inoa. Aole anei oe i lohe ia inoa mamua?"

            "Aole loa."

            "Ua kamaaina wau ia inoa," wahi a Alabia i pane aku ai.

            "A, pela anei, e kuu kaikamahine maikai?" wahi a ua Arabia nei i pane mai ai me ka nanaina hoihoi, "a heaha kau mea i ike ai no'u?"

            "Ua lohe wau i kela inoa, e ke kanaka Arabia, i ka manawa i haioleloia ai e pili ana i kekahi kanaka Arabia he powa kana hana, a ua lilo mai kana mau hana i mea e kau ai ka weli maluna o na poe e kaahele ana."

            Me he mea la ua hauoli ua kanaka Arabia powa la i keia mau olelo a Alabia, no ka mea ua minoaka iho la oia, a pane mai la:

            "Ua loaa mai la ia oe ka oiaio, e kuu kaikamahine maikai. Owau i'o no keia o Ala Abasa, ka powa; a ua kauia ko'u weli iwaena o ka poe i maka'u o lilo aku ka lakou mau dala. Aka, e kuu lede maikai," wahi a ua kanaka la i hoomau aku ai, e kamilio ana hoi ia Ulina, "mai maka'u oe no'u. Ua loaa mai nei ia makou kau mau wahi kenikeni; a ke ninau aku nei wau ia oe me ka hookamani ole iho, ina paha he mau mea makamae kekahi ou."

            Iaia i hoopuka mai ai i keia mau olelo, neenee loa mai la oia a kokoke i o Ulina la, a kau mai la i kona lima e noi ana. No Ulina ua hiki ole iaia ke hoole aku, a ua ike maopopo aku la no hoi oia he mea waiwai ole ka huna ana; nolaila lawe a'e la oia maloko a'e o kona poli i kana pahu waiho mea makamae, i hoopaaia me na kaei wai gula, a haawi aku la i ua kanaka la. Lalau koke mai la ua powa nei, a wehe a'e la, a i ka manawa i halawai ai kona lena ike me ua mau mea makamae la—o ka pohaku momi, ke daimana, ka emerala, topaza, opala ame na pohaku makamae e a'e—hooho a'e la oia me ka hauoli nui.

            "Ea, e kuu lede, ua hele mai nei no oe me ka lako. Na'u e malama i keia mau mea makamae nou, oiai ua oi aku ko lakou maluhia ina na'u e malama."

            "Ua maopopo aku la kou ano ia'u," wahi a Ulina i pane aku ai, iaia i ike aku ai i ke po'i ana a'e o ua kanaka la i ka pahu, a hookomo iho la iloko o kona poli. "Ua manao oe e paa iho i kela mau mea makamae o'u nau, e like hoi me ka oukou i hana mai nei i ka'u mau wahi kenikeni."

            "He loea maoli no oe ma ke koho ana, e kuu lede."

            "Ke manao nei wau ua loaa na hooiaio kupono no ka'u mea i hoike aku nei ia oe. E lawe oe ia mau mea, ina he nele kou; a ma ko'u aoao o ka'u noi wale no, e hookuu mai oe ia makou e hele. Ua hiki ia oe ke lawe aku i na mea i loaa iho nei ia oe a no makou hoi e hookuuia e hele aku ma ka makou huakai."

            "E hoomaha mua iho oukou mamua o ko oukou hele ana aku."

            "Aole o'u makemake e hoomaha loihi loa," wahi a Ulina.

            "Pela no hoi me a'u. Aka, no keia manawa, he mea pono ia oe e moe iho a hooluolu maluna o ka mauu, a e hiamoe iho hoi no kekahi manawa. E ike hou mai ana no wau ia oe i ko kakou manawa e hoomaka hou ai e hele." A iaia i hoopuka mai ai i keia mau olelo, ua huli aku la oia a hoi aku la me kona mau hoa.

            E hookuu ana anei lakou ia kakou?" wahi a Ulina, me kona hookau ana aku i kona poo maluna o kana Alabia.

            "Pela ko'u manao, e kuu haku. Aka na'e, aole e hiki ana ia kaua ke maopopo maoli i ko lakou mau manao aia wale no a oluolu mai lakou e hoike mai; a no keia manawa he mea pono ia oe e hooluolu. Ua maluhiluhi oe, e kuu haku, a he mea pono ia oe ke moe mai iluna o ko'u uha—elike me keia," hopu aku la o Alabia i ka a-i o kona haku, a hoomoe iho la i ko Ulina poo iluna o kona uha. "E manaolana mau kaua, aia no he wa e pono ana no kakou."

            Aole i liuliu iho mahope o ka pili ana o ko Ulina poo iluna o ko Alabia uha, o ka hiolani aku la no ia o ua u'i la. No kana Alabia aloha, aole i hiki hou aku i kona mau lihilihi maka ke kiai iho i kona milimili, a mahope o na hooikaika ana, ua hookuu aku la oia iaia iho e moe.

            I ka kaua mau opiowahine e hiolani ana, hele palanehe aku la o Ala Abasa, ame kona mau hoa, ma kahi o Ulina ma, a ku aku la lakou e makaikai ana i ka nani o Aipo.

            "Ea," i hooho a'e ai ke alakai o na powa, "he nani maoli no keia mau wahine! O Lede Ulina ka wahine u'i hookahi a'u i ike ai."

            "O laua a i elua he mau wahine u'i i kupono ole e hookuukuu wale ia," wahi a kekahi i puana a'e ai.

            "Ua oi loa aku ko laua kumukuai mamua o na mea makamae," i puana a'e ai kekahi.

            "Ua pololei oe," wahi a ke alakai i pane mai ai. "Ua hiki ke kuaiia aku keia kaikamahinealii no kekahi noho kalaunu ma o aku o ka waonahele o Serina. Aka e hookuu aku ia laua e hiamoe, a pau a'e ko laua maluhiluhi, e hele hou mai kakou e ike ia laua. Ina e hiki ana ia kakou ke hoolilo aku ia laua no ke gula, he mea pono ia kakou e hoolohilohi ole iho a mae kona nani."

            Mahope o keia hui kamailio ana o lakou, noho iho la ua poe la e paina i ko lakou aina kakahiaka; a i ka pau ana o ka lakou ai ana ua hoi aku la kekahi poe o lakou e hiamoe iloko o ka mauu.

            I ka hala ana'e o elua hora, ala a'e la o Ulina mai kona hiamoe a'e me ka puiwa, a hopu ino iho la i na lima o kona kokoolua, me ka puana ana a'e me ka leo nui:

            "O!—he moeuhane wale no ka. He weliweli maoli no nae hoi kona ano."

            "He moeuhane wale no ka hoi, e kuu haku, maka'u ka oe. Eia no kaua ke ola nei me ka maikai."

            "E hoomaikaiia na lani!" i hooho a'e ai o Ulina.

            I ka ike ana mai o Ala Abasa i ke ala ana mai o Ulina ma, hopio a'e la oia me ke kapalili elike me kana i hana'i ma ia wanaao, iaia i halawai ai me Ulina ma, a iloko o ka manawa pokole aia kona mau hoa ke ku la iluna. O na lio kekahi i lohe i ka hoailona, no ka mea ua ea a'e la ko lakou mau poo iluna, a hoi a'e la a huli i kahi hookahi, me he mea la ua makaukau e hooko aku i ka lakou mau hana pakahi.

            "Ke manao nei wau ua hoomaha oe a ua pau kou luhi," wahi a Ala Abasa i pane aku ai ia Ulina, me kona hele ana mai imua ona.

            "Ua hooluolu i'o no wau," wahi a Ulina i pane aku ai, me kona haalulu iaia i nana aku ai i na helehelena paele o ua kanaka la.

            "Nolaila, ua makaukau oe e kau hou iluna o kou lio. He mea pono ia kakou e hoomau aku i ka kakou huakai mamua o ke kau ikaika ana mai o na kukuna owelawela o ka la."

            "Ke manao nei wau aole makou e hele pu aku ana me oukou," wahi a Ulina.

            "E hele like aku ana kakou e like me ka loihi o ka moe like ana o ko kakou alahele, e kuu lede maikai. Me he mea la aole paha hoi au hoohalahala ana no ia mea."

            "Aka hoi, he makemake ko'u e hele aku no ka muliwai o Papa."

            "O ka'u no ia i koho mua iho nei no Papa ka oukou huakai; nolaila aole au i koho hewa. Ua makaukau ko olua mau lio, a e kauoha ana au e laweia mai maanei."

            Ua hookau mua ia a'e o Subala iluna o kona lio, a ike aku la no hoi o Ulina i ka nakinaki ia mai o kana kauwa, a pahaohao iho la oia no ia mea.

            Me ko Ulina maopopo ole i kana mea i hana'i, ua ae aku la oia i kona hapaiia ana a'e a hookauia aku iluna o kona lio; a iloko o ka manawa pokole hoea mai la o Alabia ma kona aoao.

            "Heaha hoi kau i nakinaki aku nei ia Subala iluna o kona lio?" wahi a Ulina i ninau aku ai i ke alakai o na powa.

(Aole i pau.)

 

Kenekuria Umi-kumamaiwa

AME

Kana Mau Hana Kamahao.

(Kakauia Simeon K. Nawaa.)

MOKUNA XXIV.

KEKAHI MAU MEA ANO NUI O HAWAII NEI

            Oiai ua hooko aku ke Aupuni Hawaii i na koi a Kapena Laplace he mea hoi nana i moeuhane mua ole ai, ua kakau hou ia iho la he olelo aelike hou e ua kapena la a waihoia a'e la i ka moi ma ka hora 5 ahiahi o ia la no, a ua koiia hoi ka moi e kakauinoa i ua aelike la mamua o ka aina kakahiaka o kekahi la a'e. Aole i ae ia mai e hoololi a e pakui paha i na manao o ua aelike la; aka e kakauinoaia e ka moi elike no me ia i hoounaia aku ai iaia. Ua noi aku ka moi i manawa nona e hui pu ai a noonoo me na 'lii, aka ua hoole loa mai la o Kapena Laplace. O na pauku ano nui ma keia aelike hou o ia no na pauku eha ame eono; o ka pauku mua e hoike ana aole loa e hookolokolo ia kekahi makaainana o Farani no kekahi karaima, koe wale no imua o kekahi kiure o na lahui e i kohoia hoi e ko Farani Kanikela, a o ka lua iho o ka pauku, e koi ana e hookuuia na waiwai o Farani, o ka oi aku no na'e o ia ka waina a i ole balani paha, e komo mai iloko o Hawaii, a e kauia hoi na auhau dute aole e oi aku mamua o elima keneta. Mahope o ka pau ana o kana hana i hele mai ai, ua haalele iho la ka moku "Artemise" i ke awa nei ma ka la 30.

            KU MAI O KOMIDOA READ.—Ma ka la 19 o Okatoba, 1839, ku mai la ka mokukaua Amerika "Kolumebia," malalo o Komodoa Read, ame ka mokukaua "John Adams," malalo o Kapena Wyman, ma Honolulu nei, a noho iho la maanei a hiki i ka la 4 o Novemaba. O na koi poho a Mr. Dudoit ame Mr. French, no ko laua mau poho mamuli o ka paaia ana o ka moku "Clementine" maanei i ka 1837, ua hoihoiia aku la ia Komodoa Read nana e hooponopono mai, a ma ka la 25 o Okatoba, ua pau a'e la ia ninau mamuli o ka uku ana a'e o ke aupuni ia laua he ekolu kaukani dala pakahi. Ua noi pu ia aku no hoi ua Komodoa la e malama i aha nieniele, e imi pono ana hoi maluna o ka ninau, "ua pau anei ko na kumu misionari noho makaainana ana no Amerika Huipuia, aole paha, a i ole o lakou anei na kumu i ala mai ai na hoinoia." Ua hoole a'e ua Komodoa Read nei mamuli o ka lawa ole o ka manawa nona e noonoo ai; aka, ua hoike aku la oia i kona manao ua makaukau ke Aupuni o Amerika Huipuia e hoomalu mai ia lakou.

            He umi-kumamaono o na aliikoa o keia aumokukaua i kakauinoa a'e malalo o kekahi olelo kuahaua e apono ana i na kumu misionari, a haawiia a'e la no hoi ke kauoha e pa'iia i hookahi kaukani kope o ua kuahaua la me ka moolelo piha o na hana a ka mokukaua "Artemise," a e hookuu ana i na kumu misionari mailoko mai o na hoohihia ana a ke Aupuni o Farani.

 

Na Makaukau o ka Hololio

            Pa-u no Feberuari 22, 1906.

RICE & PERKINS RICE & PERKINS

RICE & PERKINS RICE & PERKINS

1. KE KOMO PA-U ANA. 3. ANEANE PAU PONO.

2. KA HOOPONOPONO ANA. 4. MAKAUKAU NO KE KAU ANA.

 

            KE KUMUKANAWAI MUA O HAWAII NEI.—I ka 1839 i kakau mua loa ia ai ke Kumukanawai o Hawaii nei ma ka olelo makuahine ma Lahaina e ka ahakuka, i kokuaia hoi e kekahi mau haumana i hemo mai ke kulanui o Lahainaluna.

            Ua kakauinoa iho la ka moi i ke Kuahaua o na Pono, a hoopukaia ma ka la 7 o Iune, 1839, a aia iloko o keia kuahaua kekahi mau mamala olelo elike me keia: "Ma keia ke haawiia aku nei ka malama maluhia ia ana o ke ola o na kanaka apau, pau pu me ko lakou mau aina, ko lakou mau pa-hale, ame ko lakou mau waiwai apau, ia lakou e malama ana i na kanawai o ka aina, a aole hoi e laweia o ka aina, a aole hoi e laweia mai kekahi mea mai kekahi kanawa mai, koe wale no malalo o na manao o na kanawai."

            O ka loaa ana o keia Kuahaua Pono, o ka loaa ana no ia o ka maluhia i ka waiwai o ke kanaka, he mea hoi i loaa ole mamua aku, a o keia no hoi ke keehina mua o ka loaa ana o na aina i na kanaka. Maloko pu o ua kuahaua nei, ua haawiia ka pono i na mea apau e hoomana i ke Akua elike me ko lakou manaoio, a o keia kekahi mau lalani o ua kuahaua nei e hooiaio ana ia mea: "O na kanaka apau o na hoomana apau e malamaia no ma ka hoomana ana ia Iehova a hookauwa aku laia elike me kana i ike ai a manaoio ai."

            Ma ka la 8 o Okatoba, 1840, ke kuahaua mua loa ia ana o ke Kumukanawai. Iloko o ua Kumukanawai la ua kukuluia ka oihana kuhina nui ame na kiaaina eha a Kamehameha I., i hookumu ai, a hoakakaia no hoi ka lakou mau hana ame ko lakou mau mana. Ua kukulu pu ia a'e no hoi ka ahaolelo, nona na lala he umi-kumamalima i waeia maiwaena a'e o na 'lii ame ehiku lunamakaainana, a ua hui a'e keia poe iloko o ke keena hookahi i kela ame keia makahiki. O na lunamakaainana ua kohoia e na makaainana. Na ka ahaolelo no hoi e hookohu a'e i na lunakanawai eha, a o lakou me ka moi ame ke kuhina nui o lakou na lala o ka Aha Kiekie hoohalahala hope loa.

            NA KANAWAI HOU.—Ua hooponopono hou ia a'e na kanawai kahiko a pakuiia aku la i mau kanawai hou, a i ka houluuluia ana'e o keia mau mea apau, ua pa'i buke ia a'e la a hoopukaia i ka 1842. Ua kauia na auhau kaulike, a hoopauia hoi na kanawai ame na auhau hookaumaha. Ua hoopauia no hoi e keia mau kanawai na kanawai hookikina ame kela o na hookapu kai lawaia. A o na kanawai kula mua loa ua hooholoia ae iloko o 1841.

            Eia nae, ma ka makahiki mamua iho, 1840, i kukuluia ae ai he kula ohana no ka hoonaauao ana i na alii opio o ka aina a he umikumamalima o na alii kiekie loa o ka aina i noho ae iloko o ia kula a ma ka hoonaauao olelo Beritania ka hooikaika ana ma kahi o umi makahiki.

            A ma ka makahiki 1842 i kukuluia ae ai he kula ma Punahou e ka Papa Misiona Amerika a i kapaia ke Kulanui o Punahou. A o ka unuhi ana ame ke pa'i ana i ka Palapala Hemolele ma ka olelo Hawaii ua hoopau pono ia ae ia a hoolahaia ma ka makahiki 1839, a o ka hoolala ana no ke kukulu ana i ka luakini o Kawaiahao, ua hoomaka mua ia ma ka makahiki 1836 a mahope mai i hooholo loa ia ae ai a hoomaka ka lulu laulima ana o na alii ame na makaainana hoahanau o ka ekalekia a hiki i ka piha ana o eono kaukani dala, he hapa nae o ia huina i hookupu ia ae e ka moi. Hoonohoia ka pohaku kihi i ka la 8 o Iune, makahiki 1839, a paa no hoi ka hale i ka makahiki 1841.

            NA ELELE MUA I NA AINA-E.—Iloko o ka malama o Feberuari, 1842, ua hoea mai la o Sir Geo. Simpson ame Kauka McLaughlin i Honolulu nei, he mau alakai no ka Hui Hudson Bay, i hele mai laua no ka hana ma ka aoao o ka laua hui, i ka noho like ana me na kanaka ua ike iho la laua ua kaa ka hemahema ma ka aoao o ko laua hui.

(Aole i pau.)

 

Ka Huaale

            Helu Ekahi

            O na kane ame na wahine o na papa like ole ame na kulana like ole: na poe eli lanahu, na loio, na kahunapule, na mekanika, na kelamoku, na poe mahiai, na haumana, na kupakako, na poe kaahele, na poe holo makaikai,—ina no ia ma ka moana, ma na papu pale palena aina, iloko o na lua maina, keena oihana a i ole kula hoonaauao paha; iloko o ke kulanakauhale a i ole ma na kuaaina,—e ike ana no lakou o na Huaale a Ayear's oia ka helu ekahi no ka hoomaemae ana mamua o kekahi mau laau e ae, a ma na ma'i hoi apau i kupono no ka hoohemo ana.

Huaale a Ayer's

he hoohemo kana me ka maikai; ke hoola nei keia mau huaale i ka eha iloko o ke poo, manawahua ame na pilikia apau oloko o ka opu. Ua hanaia me ke ko momona.

            Aohe he mau huaale maikai loa i like aku me na HUAALE A AYER'S.

            Ua hoomakaukauia e Dr. J. C. Ayer & Co., Lowell, Mass., U. S. A.

 

HOOLAHA I KA POE AIE O KA WAIWAI O LILY MAIOHO RICE.

            O ka mea nona ka inoa malalo iho nei, William O. Smith, ma kona hookohu ponoia ana mai i lunahooponopono waiwai me ka palapala kauoha o ka Waiwai pakuiia o Lily Maioho Rice, mea i make, o Kalaupapa, Molokai, ma keia ke haawiia aku nei ka hoolaha i ka poe apau he mau koi ka lakou e ku-e ana i ka Waiwai o Lily Maioho Rice i oleloia e waiho mai ia mau mea iaia ma kona keena oihana, keena 206, Judd Building (Hale) Honolulu, Oahu, maloko o eono mahina mai ka la aku o ka hoolaha mua ana o keia "Hoolaha," a i ole, e hoole mau loa ia aku no lakou.

            Hanaia ma Honolulu, Ianuari 5, 1906.

            WILLIAM O. SMITH.

Lunahooponopono Waiwai me ka Palapala Kauoha Waiwai Pakuiia o Lily Maioho Rice, i make.

            3102—Jan. 12, 19, 26, Feb. 2, 9.

 

HOOLAHA I KA POE AIE.

            O ka mea nona ka inoa malalo iho, ke hoolaha aku nei i na poe apau i aie i ka waiwai o H. K. Kahele, i make, o Lihue, Kauai, e hookaa koke mai lakou: a o ka poe he mau koi ka lakou i ua waiwai la e waiho mai lakou ia mau koi i hooiaio pono ia, ina ua hoopaaia ma ka moraki a ano e ae paha, i ka mea nona ka inoa malalo iho, ma Lihue, Kalana o Kauai, iloko o eono malama mai keia la aku, o hoole loa ia.

            MILEKA KAHELE.

Hooko Kauoha o ka Palapala Kauoha ame ka Waiwai o H. K. Kahele, i make.

            3105—Feb. 2, 9, 16, 23, Mar. 2