Ka Nupepa Kuokoa, Volume XLIV, Number 4, 26 January 1906 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

HOOPUKAIA I NA KAKAHIAKA POALIMA APAU.

BUKE XLIV, HELU 4                      NUPEPA KUOKOA, POALIMA, IANUARI 26, 1906.     NA HELU APAU 3104

 

Kauka noike Kahua Ma'i o Molokai.

 

MANAOIA O KAUKA BRINCKERHOFF KE HOOKOHUIA MAI ANA.

 

E WAIHO MUA IA ANA NAE KEIA NINAU IA KAKAUOLELO SHAW NO KA APONO MAI.

 

.           O keia malalo iho nei ka hoike a ka meakakau o ka nupepa Advertiser e noho la ma Wasinetona, e pili ana i ka ninau o ke kahua imiola ma'i lepera i manao ia no ke kukulu ana aku ma Molokai.

            WASINETONA, D. C.,  Ianuari 8.-- Me he mea la o Kauka Walter Remsen Brinckerhoff, ka loea huli i na ma'i o ke Kula A'o Lapaau o Harvard, oia ke hoonoho ia aku ana no ka malama ana i ke kahua hou no ka lapaau ana i na ma'i lepera ma Molokai.  Ua hui pu aku o Kauka Wyman o ka Oihana Halema'i Marina me Kauka Brinckerhoff a kukakuka pu he mau la i hala a'e nei a ua ae aku oia e lawe i ua kulana la.  Eia na'e aole i waiho aku nei o Kauka Wyman i kana hoike ia Kakauolelo Shaw no kona apono mai.  Nolaila, a hiki i ka manawa e loaa a'e ai ke apono ana a ke Kakauolelo, aole he hoike mana aupuni i hoikeia a'e no ka hookohu ana.

            A hiki i ka wa e hoike akeaia a'e ai ka mea e hookohuia ana ma ia wahi ia manawa, ke manao nei o Kauka Wyman e hiki ana iaia ke hoike a'e i ka papahana ma kekahi mau mea ano nui no ka wehe ana aku i ua kahua la ame ka malama ana aku.

            He opiopio wale no o Kauka Brinckerhoff a he kanaka i loaa na kakoo maikai ana ma Bosetona.  He mau mahina pokole wale no kona hoi ana aku nei ilaila mai kana huakai no Pilipine, aka na'e ua ikeia kana hana loea huli i na ma'i, nolaila ua hookaawaleia he wahi nona o ke Kula o Harvard oiai oia e kaawale ana.

            Ua hanauia oia ma Nu Ioka i Iulai 4, 1874, a oia no ke keikikane a P. Remsen Brinckerhoff.  Ua hoonaauaoia oia ma na kula hele la o Nu Ioka, aka i ka manawa e malamaia ana ka hoikeike ma Kikako e noho ana kona makuakane malaila.  Nolaila, ua hoomakaukau iho la keia opio no ke komo ana aku iloko o na kula nui ma ke kula o Harvard.

            I ka 1897, ua komo aku la oia iloko o ke kula o Harvard mai ke kula akeakamai o Lawrence.  I ka 1901 loaa mai la iaia ka inoa hanohano M. D. mai ke Kula o Harvard, a hoi aku la kana lawelawe ana ma ka oihana kauka ma ka halema'i o ke Kulanakauhale o Bosetona.  Malaila ua lilo a'e oia i kokua kauka no ke keena huli ma'i, a he kanaka oia i hilinaiia e Kauka Mallory, ke poo o ke keena huli i ka 1905, ua noho oia ma ke kulana hope.

            I ka wa i puka a'e ai ka ma'i kamola poki ma Bosetona i ka 1902 ua hoolilo aku o Kauka Brinckerhoff i ka hapanui o kona manawa ma ka huli ana i na ma'i ma ka mokupuni o Gallups.  O Kauka Carson ke kauka o ke awa, ka mea iaia ka hoomalu ana ia manawa, a ua ae aku oia ia Kauka Brinckerhoff, Kauka Ernest E. Tuzzer ame Kauka Magrath e huli aku i ke ano o keia ma'i.

            Ma keia huli ana a Kauka Brinckerhog ua nui na ike i loaa iaia ma ka huli ana ame ke kaha ana i ka poe i make, a o keia mau ike ona kana i hoouna aku ai ia Kauka Councilman, a ma ia hana ana i loaa ai ka anoano o ka ma'i kamola poki.  He eono mahina ka hooikaika ana o keia kauka e huli i na mea pili i kela ma'i.

            I Ianuari, 1904, i ka manawa i hooholoia ai e hoomau aku i ka huli ana no keia ma'i, ua hoounaia aku la o Kauka Brinckerhoff ame Kauka Ernest E. Tuzzer no Manila.  He hookahi makahiki a oi ko laua noho ana malaila, a huli aku la no hoi laua i keia ma'i ma ke keena huli ma'i o ka halema'i marina.  I Iune iho nei ua hoi aku o Kauka Brinckerhoff no Bosetona a hoomau aku la i kana hana ma ke ano he mea huli i na ma'i no ke kula a'o lapaau o Harvard.

            He kanaka loihi a moioio keia Kauka Brinckerhoff, i manao ia ua oi aku kona mau makahiki mamua o kona i keia manawa, a he kanaka hooioi ole hoi ma kana oihana e lawelawe nei.

 

NA HOOKOHU MAKAIA KEOLANUI

 

            HILO, Ianuari 19.--Ua hookohu a'e nei o Lunamakai Keolanui i kela mau makai malalo iho nei no ka oihana makai o Hilo:  Kapena, Henry W. Makini;  na Lukanela, J. Kaailua ame Simeon Kahana;  Makai Kepani, Yotaro; Makai Pake, Keaweahaku;  ma kai kaulio, Harry Knell.  O ke kapena (H. W. Makini), he hope-lunamakai oia no Kau mamua, a no Keaweahaku hoi ua loaa iaia ka ike olelo Pake iaia ma Kina malalo o ka hoonaauao ana a ke Aupuni Moi, malalo o ke kanawai hoonaauao i na opio Hawaii ma na Aina E.

 

He Hawaii i Hoao e Hoopakele i ke Ola o Kona Hoahana.

JIM MASON.

            Ua paa a'e iloko o ka nupepa Eagles' Aerie o Los Angeles, Kaleponi, ka moolelo o ka hana wiwoole a kekahi keiki Hawaii, ma ka inoa o Jim Mason, elike me keia malalo iho nei:

            Ma ka mahina aku nei o Dekemaba i make ai kekahi kanaka opio nona ka inoa o James Cozard, a he kanaka opio akamai keia i ka hookani piano.  O ke kumu o ka make ana o keia kanaka opio, mamuli no ia o ka pa ana o kona kino me kekahi uwea e mau ana no ka holo ana o ka uwila iloko ona;  a o ua uwea la no ka Hui Uwila Redondo Beach ia.  Ua moe mai hoi ia uwea iloko o ka pukui uwea o ka Hui Uwila Edison, oia hoi ka hui a ua kanaka opio poino nei e lawelawe hana ana.

            O ka hana a nei kanaka opio i make iho la, ame ke keiki Hawaii nona ka inoa o Jim Mason, e hooholo uwea ana laua maluna ae o na uwea telepona o ka Hui Uwila Redondo Beach, ma kahi kokoke i Centinella, he  wahi kahea telepona ia e kokoke ana i Inglewood.  O ko laua luna hana, oia o Jack Frost, ka luna nui o ua Hui Uwila Edison nei ma Redondo.  Ua hai mua aku hoi keia luna nui i ua mau keiki paahana nei e makaala loa laua i na "uwea ola" (oia hoi na uwea e holo ana ka uwila).  I kela wa nae a ua mau keiki lawelawe nei e kau ana iluna a e hana ana hoi i ka laua hana, ia wa i ikeia aku ai o James Cozard e waia kua mai ana, mai luna mai o kona wahi e ku ana, a hihia ae la, kona mau wawae i na uwea e moe ana ma ia wahi, a lewalewa iho ia kona kino ilalo, paa na wawae iluna.  O kona kokoolua, oia o Jim Mason, he keiki Hawaii, aia oia ma kekahi pou uwila okoa aku kahi i hana ai, mawaena no hoi o na uwea e hihipea ana.

            Iaia i ike mai ai i ka pilikia o kona kokoolua, ua iho iho la oia ilalo me ka hikiwawe loa, ma kana pou e kau ana a hoea ilalo, a holo aku la ma kahi a kona kokoolua e lewalewa iho ana.  Pii aku la oia ma ka pou telepona e pili koke ana i kahi a James Cozard e lewalewa iho ana.  Pii aku la oia ma ka pou telepona e pili koke ana i kahi a James Cozard e lewalewa ana, e alo-alo ana me ka eleu nui mawaena o na uwea e holo ae ana ma kahi ana e pii aku nei.  I kona hiki ana iluna, ua hoohei mai la oia i ke kino o James Cozard me kekahi kaula a hei, alaila, ooki iho la oia i ka uwea i paa ai ka wawae o kona hoa a hookuu iho la ilalo.  A ua kokua ia keia hana ana e ka luna nui.

            Ua hala kahiko ka hanu ola o James Cozard, a ua lilo na hoao ana e hoihoi hou mai i ke ola iloko o kona kino i mea ole.

 

Nuhou o Na Aina=E.

 

MAKEMAKE E MALAMA I KA MEA KAHIKO.

            WASINETONA, Ianuari 21.--He palapala noi no ka malama ana a e ku-e ana i ka wawahiia o ka mokukaua Kumukanawai o Amerika, a i kakauinoaia e kanakolu kaukani poe o ka Mokuaina o Makekukeka, ka i waihoia aku nei ia Peresidena Rusewela.  Ua hoike a'e ka Peresidena i kona manao e hana hou ia ua moku la a hoouna aku no Anapoli.

 

HOOKAHI HORA O KA NOHO AUPUNI ANA.

            GUAYAQUIL, Ecuador, Ianuari 21.--He hookahi no hora o ke ku ana o ke aupuni o Moreno.  Ua ala a'e ka haunaele mahope koke iho o kona lawe ana a'e i ka mana, a he lehulehu na poe i make.  Alaila kapae a'e la na makaainana ia Moreno, a kuahaua a'e la ia Generala Alferno, ke alakai o ka poe hoohaunaele, i peresidena.  I keia manawa ke kau nei ka maluhia.

 

AIA IA BANNERMAN KA HOOMALU.

            LADANA, Ianuari 21.--Ke wanana e ia nei e paa ana malalo o ka mana hoomalu o Bannerman he 533 balota iloko o ka Ahaolelo, a ma kekahi aoao hoi he 137.

 

PIOO ILOKO O KA HALEPULE.

            PILADELEPIA, Ianuari 22.--Ma ak la inehinei ua puka a'e la ke ahi iloko o kekahi halepule hoomana Bapekike o na Paele a mamuli o keia ahi i pioo ai na mea apau.  He umi-kumamawalu poe i make a he kanaha i eha mamuli o keia.

 

PIHOLO IA MOKUKAUA.

            RIO DE JANEIRO, Ianuari 22.--O ka mokukaua Brazila Aquiban ua piholo iho i keia la mamuli o ke pa-hu ana o ka lumi waiho pauda.  He ekolu haneli poe luina waiho pauda.  He ekolu haneli poe luina ame eha hope adimarala ame ke Kuhina o na Marina ka i pau a'e i ka make.

 

POHO KA HUI MOKUAHI OCIANICA.

            KAPALAKIKO, Ianuari 23.--Ua koho hou a'e nei ka Hui Mokuahi Ocianica i kona mau lunanui mua no keia makahiki e nee aku nei.  O ke poho i keia makahiki he $183,344.  Me he mea la e hookauia ana he auhau o elua dala maluna o keia ame keia mahele.

 

IKE OLE KO VENEZUELA I KA MEA I HANAIA.

            WILLEMSTAD, Ianuari 23.--Aole loa i maopopo i na makaainana o Venezuela ke kulana maoli o ka aina i keia manawa.

 

HOLO NA MOKUKAUA FARANI.

            PORT OF SPAIN, Ianuari 23.--He 2 mokukaua holomama o Farani i haalele iho ianei i keia la malalo o na kauoha i uwepaia, aka na'e ua manao ia aku no Venezuela no ka laua huakai no ka hooko ana aku i na koi a ke Aupuni o Farani i waiho aku ai maluna o Venezuela.

 

ILI KA MOKUAHI VALENCIA.

            VITORIA, B. C., Ianuari 24.--O ka mokuahi Valencia, e holo ana mai Kapalakiko no Puget Sound, me hookahi haneri ohua maluna ona ame na luina he kanakolu-kumamalima, eia iluna o ka puu pohaku he umi mile ma ka hikina o ka Lae Beale.  Ua hiki a'e kekahi waapa me eono poe olulo ma Beale, a ua hoike a'e me he mea la o na ohua ame na luina aku i koe iluna o ka moku e make ana lakou.  He nui na poe i piholo ia lakou i hoa'o ai e haalele aku i ka moku.

 

            Ua hoounaia aku kela moku mai Kapalakiko aku e ka Hui Mokuahi Aekai Pakipika ma ka la 6 Ianuari, e lawe ana hoi i ka makalua o ka mokuahi Kulanakauhale o Puebio, i hoihoiia a'e hoi iloko o ke awa he elua la mamua iho me ka pilikia.  He moku keia nona na tona he 1198, a e noho kapena ia ana e Kapena Cann.

 

            O ka Lae o Beale, kahi hoi i hoikeia malaila kahi i ili ai o keia moku, aia no ia ma ke komo ana aku o ke Kai Barclay, ma ka aekai o ka Mokupuni Vanacoua, a o ka moku e hoao ana e komo ma ke ko-wa o San Juan de Fuca a ili malaila me he mea la ua mamao loa io no ia moku mai kona alahele aku.

 

            I ka wa e laweia ana na koa Amerika no ke kaua o Pilipine o keia kekahi o na moku lawekoa i kipa pinepine mai maanei, a ua kamaaina no i ko Honolulu nei poe.

 

MAKEMAKE I AHAOLELO KUMUKANAWAI MONOKAKE.

            SANA PETEROBORO, Jan. 24.--Ua kukaia ae nei ka poe kakoo kumukanawai ma ka ahaelele i ko lakou makemake i Ahaolelo Kumukanawai Monokake.

 

EWALU HORA HANA MA PANAMA.

            WASINETONA, Jan. 24.--Ua hooholo ae nei ka Hale o na Lunamakaainana e hooholo ana ia i ka pauka ewalu hora hana ma ka bila kanawai o Panama, a aole hoi e loaa aku i ke Komisina Alawaioki e manao ia nei ka uku kaulele i manao ia.

 

Kaikamahine o Honolulu i Lilo Mai Nei i Loea.

            "BERKELEY, Ianuari 12.--O ka ikeia ana aku e kekahi i kino palupalu ma ke kulana loea huli i na mea pili i ka lepo, e hele pu ana me kekahi kanaka aoo i loloa na umiumi ma ke kahua o ke kula mahiai, he mea ano hou ia iloko o ka moolelo o ke kula nui, a o ua mea la e ikeia aku ana oia no o Miss Alice Thompson, a e ike ana oia i ka manawa e hookohuia ae ai oia i kokua huli i na mea pili lepo honua, ma ke Keena o Kauka Loughridge, ma ka ia 15 Ianuari nei."

            "E hookohuia a'e ana o Miss Alice Thompson e na Kahu ma ia kulana, a oia ana ka wahine mua loa o ka loea huli i na mea pili lepo honua e lawelawe maoli ana ma na mea pili mahiai.  Aole he wahine opio mawaho a'e o Miss Thompson e ikeia ana maluna o ka aina o ke kula e lawelawe ana i keia hana, a ua loaa mai hoi iaia keia ike ma ke ano he makana mailuna mai ame na makahiki i huliia ai ka naauao ma ia oihana wale no.  No ekolu makahiki ua noho haumana aku oia malalo o na Polopeka Jaffa, Coly ame Loughridge, a pela no hoi me Polopeka Hilgard, ka mea mana nui ma na mea pili lepo honua iloko o ke kula."

            "Ua noho haumana o Miss Thompson ma ke Kula Kiekie o Berkeley, ma ka papa o 1906.  Ua hemo mai oia me ka palapala hookuu maikai ma ka la Kalikimaka, a i keia manawa ua makaukau oia e komo aku ma ka hana i waihoia na kekahi kino wahine loea e hooko aku.  Ma ke ano he hope no Polopeka Loughridge, e hoolilo aku ana o Miss Thompson i kona manawa ma ka huli ana i na meahuna o ka lepo, na mea pohihihi e pili ana i ka hookahekahe wai, hoopuepue ana ame na mea apau i pili i ka oihana mahiai."

            I ka wa o keia kaikamahine e noho ana me kona mau makua ma ke Kula Kamehameha, o kana kumu mua oia no kona makuakane, a ua hoonaauaoia oia ma ka ike akeakamai.  O keia hookahi ke kaikamahine i puka mailoko mai oia kula me ka papa o na keikikane, a ua komo aku oia ma ke Kula o Punahou no kekahi manawa, a hoouna loa ia oia no Amerika no ka hoomahuahua ana aku i kona ike, a o ka mea i ikeia ua pii a'e oia a lilo he loea huli i na meahuna o ka oihana mahiai.  Hauoli ka manao o keia mau makua na laua keia kaikamahine oiai ua pii ma kekahi kulana e kaulana ai ka inoa o kona mau makua.

MISS ALICE THOMPSON.  Penei kekahi hoike i loaa a'e e pili ana i ke kaikamahine hanau mua a ka hope-kumupoo, Poloeka U. Thompson, o ke Kula Kamehameha o na Keikikane:

 

KOMISINA MALAMA OLA O HAWAII.

            Aia he Komisina Malama Ola o ekolu lala e kukuluia aku ana iloko o Hawaii e ke Aupuni Federala, a na ke Kiaaina hoi o Hawaii e alakai a e hoomalu a e hoohana ia komisina no ka huli pono ana iloko o na ma'i lele oloko iho o Hawaii, e puka ae ana mai kahi manawa a kahi manawa.

            Ua ulu koke mai keia mau hooponopono ana no ke kukulu ana i keia komikina malama ola i ka Aupuni Repubalika o Amerika mamuli o na mea i ikeia a he kumuhana no hoi keia i noonooia no ka hooko aku mawaena o na aupuni a elua--ka Federala ame ka Teritori nei.

            O keia komisina malama ola o Hawaii nei, e kohoia ana he hookahi aliikoa pualikaua, a he hookahi mai ka Haukipila Moana mai, a o ke kolu, me he mea la e kohoia ana maiwaena ae o na kauka kuloko o Hawaii nei, a ke Kiaaina e wae ae ai.

            A o keia lunakoa mua i oleloia ae nei e waeia mai ai mai ka oihana kaua aina mai oia no ka Lukanela Ekahi J. R. Slattery o na Puali o na Anaaina.  U. S. A., e noho hana nei maloko o ia keeia maanei.  A o ko ka Haukipila o ka Oihana Moana me he la, aole e nele ka waeia ae o Kauka Amerika L. E. Cofer, ka mea iaia ia kuleana, a malia oia no hoi ke noho ae ana ma ia wahi.

            O ka hooulu ana ia o keia hana mamuli no ia o ka Kiaaina Carter hoala ana i waihoia aku ai hoi la Peresidena Rusewela no ka noonooia mai, ke kumu i lawe ae ai ka Peresidena i ke kumuhana a noonooia me kona mau hoa hana, oia hoi, na poo o na oihana aupuni Federala.

            O ka hua o keia hana oia no ka loaa ana mai he leka mai ke Kokua Kakauolelo o ke Keena Puuku, e hoike mai ana i ke apono o ka Peresidena i ka manao o ke Kiaaina (Carter) e kukuluia i komisina o ia ano.

            Ua loaa pu mai hoi he leka nui mai ke Keena Kaua mai o Amerika, a iloko o ua leka nui nei he leka mai ke Kakauolelo o ke Keena Puuku, e noi mai ana e waeia i lunakoa o ka pualikoa no ua komisina la, a no ka Oihana Keena Kaua o Amerika, ua hookohu maoliia mai o Lukanela Slattery i komisina, ma kona (Keena Kaua) aoao iho.

            O ke kukulu ana ae i keia komisina malama oia no Hawaii nei, he hana maikai ia no na kumuhana malama ola ana e hapaiia ae ana, a maloko no hoi o ka hoii pono ana i na ma'i lele e ulu ae ana iloko o ka Paeaina, e huliia ai hoi me ka noeau loa.

            Ua manao pu ia no hoi, e hooponopono hou ia ae ana kekahi mau rula malama ola i ikeia he kupono e hookoia ma kekahi mau ano e ulu ae ana iwaena o ka lehulehu.  Ua oleloia, o keia mau rula malama oia, he mau loina hoi o ka hoomaemae ana i na mea hoomailo i ka nohona ola o ka lehulehu, ua hoohanaia ae e na lunanana me ke limaikaika ma kekahi mau wahi a ma kekahi mau manawa i ikeia nae i ke kupono ole o ka hookikina ana la o ia rula maluna o ka lehulehu ma ia manawa.

            A o ia mau kina'una'u no nae, ka keia komisina malama ola a malama i ka maemae o ka nohona ola o ka lehulehu, e hooponopono ai no Hawaii.

 

"LANAKILA NO O KUHIO."

            "Ke manao nei wau o Kuhio no ka mea e waeia a'e ana i elele,"  wahi a Senatona Achi i ka Poalua nei.  I kona manawa i ninauia aku ai no McCandless ina oia kekahi o na moho, ua hoomau mai la ka Mea Hanohano.  "Ae, o McCandless i'o no kekahi moho, a eia oia ke hooikaika nei, eia na'e aole ona wahi pono mawaho aku o Oahu nei, a he pomaikai no ka loaa iaia o ka hapalua o na elele mai keia mokupuni mai.  Aole no he wahi pono no Alika Robikana.  O Kuhio ka mea nona ka noho, a oia ana ka elele.

            "O keia hoolahaia ana o ka'u mau olelo iloko o ka Advertiser he mau ia i hala a'e nei ua kokua mai ia ia'u ma kekahi ano.  Ma ia hoolahaia ana i ike maopopo iho ai ko'u mau hoaloha i ko'u ake ole e hoi hou i ka Senate.  Ua hoike pinepine aku wau ia mea ia lakou he mau manawa i hala a'e nei, aka na'e ua manao lakou he mau olelo paani wale no ia na'u.  I keia manawa ke ike mai nei lakou ua paa kuu manao."

 

            BIRMINGHAM, Ianuari 18.--Ua kohoia o Joseph Chamberlain i ka Ahaolelo a o kona mau balota oi he 5,000.  O na mahele ehiku apau loa o ke kulanakauhale ua puka mai no ua laia Uniona.

 

O Venezuela a me Farani.

 

KE KUMU ONENE MAWAENA O KEIA    MAU AUPUNI NUI A ELUA.

 

HOOIKAIKA KO AMERIKA KANIKELA E ALA OLE AE KA LIKE OLE, AOLE NAE I KO.

 

            Ma na lono telegarapa e loaa mai nei i o kakou nei, ua maopopo loa ka mahae ana o ka pilina hoaloha mawaena o Farani ame Venezuela, a ma ka la 22 iho nei, loaa hou mai la he lono hou e hoike ana ua haawi aku o Amerika ia Farani e hana aku eliko me kona makemake ma Venezuela, he mea hoi na ke Aupuni o Venezuela i moeuhane mua ole ai, oiai ua manaoio o Peresidena Castro o Venezuela aia kona pono i ke Aupuni o Amerika Huipuia, malalo o ke Kanawai a Monroe.

            O keia malalo iho nei ka mea i loaa a'e ma Wasinetona e pili ana i ke kumu i ala mai ai keia hoopau launa ana mawaena o na aupuni elua:

            "WASINETONA, Ianuari 12.--Oiai o ka mahae ana a'e nei o na launa ana mawaena o Farani ame Venezuela, he mea ku-e pilikino la no M. Taighy, ko Farani mea i hoomanaia ma Caracas, o ka ninau nui maoli, elike me na mea i hoomaopopoia maanei, o ia no ko Peresidena Castro paa ana i na waiwai ame na pono o ka Hui Telegarapa Farani.  Ua olelo a'e o Peresidena Castro ua haawi aku ka Hui Telegarapa i na kokua ana i ka poe hoohaunaele o Matos.  Nolaila, ua hoomaka a'e la oia o e hoopii iloko o na ana i ka hui a ua hoohalahala pu a'e no hoi oia i ko ka hui uhaki ana i na manao o kona pono kukulu hui mamuli o ka hoomoe ole ana o ua hoi la i na uwea telegarapa ae kai, o ka oi aku no na'e mamuli no ia o ka hoomoeia ana o ka uwea ma ka aina ma ka mokupuni o Santo Domingo a ma i ano ua loaa mau na akeakea ana i ka wa i ala a'e ai na haunaele ma ua mokupuni la.  Ua apono a'e ka aha i ko ka Peresidena manao, a lawe koke a'e la i ka mana ma ko lakou mau lima i ke keena oihana o ka hui ma kekahi mau wahi alaila komo akeakea a'e la ke Aupuni o Farani.  I ka wa e kaawale ana ko Farani kuhina, ua waiho aku la o Mr. Taighy i kekahi hoohalahala i kakauia i ke Aupuni o Venezuela.  Ua manao koke iho la o Peresidena Castro he palapala hoohaahaa keia i kona aupuni a hoole aku la i kona launa ana me Mr. Taighy.  Aka na'e aole i ae ke Aupuni o Farani e hoolilo a'e i keia ninau i mea pilikino a kukala koke a'e la o ko M. Taighy waiho ana aku i ua palapala la ua kakooia e kona Keena o na Aina E.

            "Maanei i komo a'e ai o Mr. Russell, ko Amerika Huipuia Kuhina e noho ana ma Caracas, e akeakea no ka makemake e maluhia, a mahope o na launa lehulehu ana me ka hoomanawanui, ua manaoia ua hiki mai i ka hopena o kana lawelawe ana me ka holopono a ua pau keia ninau.  Aka iaia e koi ana ia Peresidena Castro e huki aku i kekahi leta e hoole aku ana i kona launa kukai ana me M. Taighy, a o ua leta la hoi ka Farani i lawe a'e ai ma ke ano he hewa, ua hiki ole iho la i ko Amerika Kuhina ke hoomalu aku i na launa ana me ko Farani mea i hoomanaia.  Ua aia i'o mai la keia hopena ma ka la Hape Nuia, a ma ia la no hoi i ike a'e ai ke Aupuni o Farani i ko Venezuela Kuhina e noho ana ma Parisa, me ka manao hoi ua pau keia ninau, a ma ia hui ana i loheia a'e ai ua hoole o Peresidena Castro i ka ike ana a'e ia M. Taighy ma Caracas.  Mamuli o keia i piena a'e ai o Farani, a manao iho ia ua lilo oia he pio o na hana kolohe ame ke apuka, a hoike koke a'e la ko Farani Amebasoda e noho ana ma Wasinetona i keia mea i ke Keena Mokuaina.  Ua hoike a'e la o Mr. Russell i ka hiki ole ana iaia ke akeakea, a o keia ka mea nana i hoolilo a'e iaia i kanaka hilinai ole ia ma Caracas, a mahope mai olaila i loaa a'e ai ka leta a Farani e hoike ana ua moku ke kaula nana i hipuu a'e ia laua iloko o ke apo hookahi."

            I ka Poakahi iho nei no hoi i loaa mai ai he lono telegarapa mai Parisa mai; e hoike ana aole e lawelawe koke a'e ana o Farani ma keia ninau a hiki i ka wa e loaa aku ai ka M. Taighy hoike.

 

KUAHAUA ALII O KINA.

            Penei ka lono telegarapa o ka Poakolu nei mai Pekina mai;

            PEKINA, Ianuari 24.--Ua kauoha ae nei ka Emepera Wahine e hiki ae na keikialii apau loa i kuleana i ka nohoalii ma ka halealii, no ka wae ana i ka mea e pani ana i ka hakahaka o ka Emepera.

            O keia ka hoike mua loa i loaa ae mahope o ke aia kaua a na Pake Boxer e hoike ana ua maikai ae ka Emepera Kwang Hsu.  I ka manawa i aia ai ke kaua ua hoikeia ae ua hanaia ka Emepera i ka laaumake, a ina he oiaio ua hanaia kekahi mea o keia ano, alaila ua malama malu loa ia, a i keia manawa ua hoikeia ae nei ua ola mai oia.