Ka Nupepa Kuokoa, Volume XLIV, Number 2, 12 January 1906 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

     NUPEPA KUOKOA,  POALIMA, IANUARI 12, 1906.     @

 

KULIANA

 

Ka Weli o Damaseko.

 

KA HOOKO MOEUHANE A KA U'I ULINA.

 

MOKUNA IX

KA HORA O KE AUMOE.

            Aole i loihi loa komo ana kekahi kanaka loihi iloko o ka lumi. E kulou haahaa ana kona poo i ka manawa ana i komo mai ai, a i kona ike ana mai ia Ulina, moe koke iho la oia ilalo a kokolo mai la.

            "E kuu lede maikai," wahi ana i pane aku ai, "ua hoike mai o Alabia ia'u he hana kau i makemake ai na'u e hana aku. He wa i hala ae nei ua hoopakele ae oe ia'u, a o ko'u ola nei nou ia mai ia manawa mai. E haawi mai i kau kauoha a owau no e hana."

            I kinohi na hoopuiwaia o Ulina i ke komo ana aku o keia kanaka paele, aka i kona manawa i noonoo ae ai i kana hana i makemake ai na keia kanaka e hana mai nona, a i kona ike pu ana aku no hoi i na helehelena oluolu o ua kanaka la. hoi mai la kona mau noonoo maikai.

            "Aole wau e kauoha ana ia oe, e Oma; e noi wale aku no wau ia oe e kokua mai ia'u,Malia e hiki ana no ia oe ke lawelawe mai no'u aoe paha. Aka aole wau e paa iho ana ia oe me na olelo waiwai ole. Aole paha oe i maopopo i ko'u kumu o ke kauoha ana aku nei ia oe?"

            "Aole wau i maopopo, e kuu lede maikai."

            "O oe paha hoi kekahi i kokua aku i ka laweia ana mai o ka haku o na powa no Damaseko nei?"

            "Ha--nawai i ha'i mai ia oe ia mea?" Aole no ka maka'u ka puiwa ana o keia kanaka; aka ua pahaohao oia i ka ike ana o Ulina ia mea.

            "Ua ike anei oe i kekahi kanaka ma ka inoa o Hobadana?"

            "Ae, e ka lede maikai. Oia ka lua o na alakai o na powa."

            "Ianei iho nei oia, e Oma, a ua koi mai oia ia'u e hoohana aku i kahi mana i loaa mai ia'u no ka hookuu ana aku i kona haku. Aole wau e hoike ana i na mea apau ia oe, aka ke hoike aku nei wau i ko'u iini nui e hoopakele ae ia Kuliana mai ka mana ae o ka moi. E hiki ana anei ia oe ke kokua mai ia'u?"

            Kulou iho la ua kanaka la ilalo, a aole no hoi i liuliu iho ea ae la kona poo iluna, a ku pu ae la no hoi iluna, me kona pane ana mai:

            "E ka lede maikai, ua kokua io no wau i ka hopu ana iaia; aka i ko'u manawa i ike ai i kona ano, ua oi aku ko'u makemake e lawelawe aku nona ina i loaa ia mana ia'u mamua o ka moi. Ua ike wau iaia he kanaka oluolu, lokomaikai, a oiaio no hoi a ike koke iho la wau i ke aloha iaia; aka nae ua paa wau malalo o kekahi hoohiki malalo o ka makemake o Iuda, a nolaila, ua hiki ole ia'u ke alo ae mai iaia. Ua loaa ia'u ka iini e hoopakele ae ia Kuliana."

            "E hiki ana anei ia oe e Oma ke hana mai pela? Aole o'u makemake e pepehi ka moi iaia. Ua manao mana malia paha ua loaa ia oe ka mana e komo aku ai iloko o kona wahi e hoopaaia mai nei--e hiki ai no ia oe, i kekahi manawa kupono ke hookuu aku iaia."

            "Pela i'o no, e kuu lede maikai; aka na'e aole wau e ku kiai hou ana a hiki i ke ao ana."

            "A i ka la apopo o ka make no ia o Kuliana!" i hooho a'e ai o Ulina me ke kaumaha. "Ina aole e hiki ana ia oe ke kokua mai ia maua o ka pau a'e la no ia o ko maua manaolana."

            Kuemi hope aku la o Oma a pili aku la i ka paia, e kau ana hoi kona lima maluna o kona poo.

            "E kuu lede maikai," wahi ana i pane mai ai mahope o kona noonoo ana, "he wahi manaolana no ko'u. O Selima, kuu hoa i hele pu ai no ka hopu ana ia Kuliana, oia ke ku kiai ana ia Kuliana ke hiki aku i ke aumoe. Malia paha o hiki no ia Selima ke kokua mai ia'u. Ina oia e kokua mai ana, malia o hiki no ke hoopakeleia a'e o Kuliana. E hoi koke aku no wau i keia manawa a hooikaika aku e like me ka hiki ia'u."

            "A i ka manawa hea e loaa mai ai ia'u ka hopena o kau misiona?" i ninau aku ai o Uliana.

            "E loaa no ia oe he elua hora mahope o ke aumoe," wahi a Oma. "O ia hoi, ina he hopena i'o kekahi e loaa mai ana. Ina aole e holopono ana, aole paha wau e hoi hou mai ana."

            "He elua hora mahope o ke aumoe," i pane aku ai o Ulian, "o ia ka manawa o Hobadana e hoea mai ai ma ka malapua. E halawai no auanei oe me ia malaila."

            "Ae," i pane hou aku ai o Oma, mahope o kona noonoo ana, "ina e holopono ana ka'u hana aole loa wau e maka'u ana ke halawai aku me ka lukanela. Ina aole wau e hoea mai iloko o ka malapua ia manawa, a i ole ma kauwahi paha o ia manawa, e hoomaopopo iho oe ua hana aku wau i ka mea i hiki ia'u. He mau mea aku anei kahi i koe au i makemake ai?"

            "Aole,  e Oma. E hele aku oe no kau hana, a e hana aku i ka mea i hiki ia oe,"

            Hoopa hou mai la ua koa paele la, alaila huli aku la a haalele ino la ia Ulina, a na Alabia i lawe aku iaia iwaho ma kekahi puka uuku a hiki i ka malapua, a puka aku la ma kekahi puka huna o ka pa.

            "E Alabia," wahi a Oma i huli mai ai a pane mai ia laua e ku ana malalo o kekahi pi'o mawaho o ka pa. "aole i moeuhane mua ko hakuwahine i ka pilikia a'u e lawe nei maluna iho o'u ma keia hana; aka, e oiaio ana wau i ka'u i hoopaa ku nei iaia, a e hana ana wau e like me ka hiki ia'u. Ina aole e kokua mai ana o Selima ia'u, o ka pau a'e la no ia; aka ina oia e hui pu mai ana me a'u, alaila o ko maua mau ola pu kekahi iloko o ka poino, a malia o ka holopono no ia o ka'u hana. He manaolana no na'e ko'e e holopono ana."

            Ke aku la o Alabia a nana aku la ia Oma e hele ana a hiki i kona nalo ana aku, alaila pani aku la oia i ka puka pa, a hoi aku la no ka lumi e noho mai ana kona haku.

            Maanei e huli kaua a nana aku i ka kaua Kuliana. Ua hoopaaia aku oia iloko o kekahi o na lua paahao puanuanu a paa loa o ka halealii, ua hoopaaia kona mau lima ame na wawae i na kaulahao paa loa, a hoopaa pu ia iho la no hoi kona mau wawae me kekahi mau lina hao i hoopaaia iluna o ka papahele. Aole i maopopo iaia ka loihi o kona manawa i hoopaaia ai malaila. Ua like no ka po ame ke ao iaia. He ekolu manawa i laweia mai ai kana mau meaai ame ka wai inu, a he kanaka hoi i hu-naia kona helehelena ka mea nana e kii mai i na pa. Iloko ona i kela manawa he hookahi wale no manaolana no kona pakele a'e, a o ua manaolana la he powehiwehi kona ike ana aku. Noonoo a'e la oia ina e loaa ana i kona mau hoa kona wahi i lawe ia mai ai, malia o hoao mai lakou e hoopakele a'o iaia; aka i ka nana ana a'e i na mea apau, ua hiki ole iaia ke hooiaio iho ina paha e aa ana kona mau hoa e kii mai iaia. Ma ka hoopokole ana a'e, ua hooholo iho o Kuliana ua kokoke loa mai kona manawa e make ai.

            Heaha no la hoi kana e ola ai? O ke ola aku paha la no ka paio ku-e mau ana ia Horama. Aole ona mau makua--aole hoi  he i'o ponoi--aole loa he kuleana nona ponoi iho maluna o ka honua e hiki ai iaia ke hoolilo aku i kona manawa malaila. Malia paha aia no iloko o ka kulanakauhale he wahi ohana nona e ola ana ia manawa: aka aole oia i ike ia mea. Ua aloha oia i kona mau hoa o na hana hoonaueue i ka nohoalii o Horama, he poe na'e i hiki ke lawelawe no lakou iho me ko ianei kokua ole aku, oiai he poe kino ikaika lakou a koa no hoi. Heaha hou aku ko ianei mea e ola ai? Aia he poe ilihune e noho ana iloko o na ululaau--he mau hoaloha hoi e noho ana ma na kula--a he poe kakaikahi hoi i hilina mai maluna ona no ke kokuaia aku e noho ana ma kahi e kokoke ana i ke kahawai o Papa; aka nae ua hiki no ia Hobadana ke lawelawe aku no lakou. Heaha hou aku ka mea i koa?

            Kulou iho la ke poo o ua Kuliana la, a kau a'e la i kona mau lima kaumaha maluna o kona puuwai. Aia he hookahi mea ana e noonoo ana--he mea hoi nana i manaolana mau ai e hiki hou mai ana he manawa ana e ike aku ai--he mea hoi nana i kaomi iho i kona puuwai me ka pumehana o ke aloha. Aka hoi heaha la kona mea e noonoo ai no ua mea la? Heaha hoi ka u'i nohea a Aboula Casema nona? Iloko o na la pokole e lilo a'e ana ua u'i la i wahine na kona enemi ino loa.

            Pela iho la i noho iho ai ua Kuliana la a kaua a noonoo. e ku pololei ana hoi me kona mau lima e paa ana i na kupee hao, a e puili ana hoi mamua o kona umauma, ia manawa i hoopuiwaia a'e ai oia mai kona mau noonoo a'e i kona manawa i lohe aku ai i ka weheia ana mai o ka laka o kona lumi, a aole hoi i liuliu iho hemo mai la ka puka o kona lumi e hoopaaia ana, a komo aku la hoi ka malamalama o ke kukui iloko. He elua kanaka i komo mai iloko me ke pani ana aku i ka puka mahope o laua; eia na'e mamuli o ka noho ana o ua Kuliana nei me ka pouliuli, ua hiki ole i kona mau maka ke ike pono aku i na helehelena o keia mau kanaka elua i komo aku iloko o kona lumi. Aole na'e i liuliu iho, a i ua mau kanaka la e kamakamailo ana, hoomaopopo aku la oia o na kanaka paele no keia nana oia i kumakaia, a o ka noonoo mua i loaa aku iaia oia kona hapai a'e i na kaulahao e paa ana i kona mau lima a haua iho maluna o laua : eia nae aole he kokoke mai o ua mau kanaka la.

            "E Oma--Selima," wahi a Kuliana i puana a'e ai, "o olua anei keia?"

            "Ae, e kuu haku," wahi a Selima i pane aku ai.

            "I hele mai nei anei olua no ka pepehi ana iho iau?"

            "Aole."

            "No ka lawe ana aku anei ia'u imua o ka moi?"

            "Aole."

            "Alaila, heaha ka olua? O olua anei na kiai nana e malama mai ia'u?"

            "Ae."

            "Alaila, aole ka paha he maka'u o ka moi i ka hilinai ana mai ia olua?"

            "Ke ike mai la no hoi oe i kona hilinai ana mai ia maua."

            "Ae--e like me a'u i hilinai aku ai ia olua. O, o olua kekahi mau kanaka puuwai eleele loa. Ia olua i hele a'e ai imua o'u iloko o ka ululaau, ua hilinai aku wau i ka olua mau moolelo kaumaha. a aloha iho la hoi ia olua; a ua paa hoi ko'u manao e hana maikai aku no olua, a hoolilo a'e ia olua i mau kanaka hauoli. Ua nana aku wau i ko olua mau maka, a manao iho la wau he mau kanaka oiaio la olua. Aole wau i hilinai aku ia olua mamuli o ka olua mau moolelo kaumaha, aka mamuli o ko'u ike ana aku i kela mau nanaia oiaio o olua. Eia na'e hoi ua hala ia. Ano heaha ko olua makemake?"

            "E ko maua haku maikai," wahi a Oma i pane aku ai me ka oiaio, "mamua o ko'u hoike ana aku i ko maua kumu i hiki mai nei ianei, e hoike mua aku wau ia oe aole maua he mau kanaka i nele i ke aloha, a aia no iloko o ko maua mau puuwai he wahi oiaio no. I ko maua hele ana aku i kou wahi e hoomoana ana, ua hele aku maua malalo o ka hana a kekahi kanaka okoa, a maua hoi i hoohiki ai e hooko aku. Ua hoohiki iho makou e hopupio ia oe ina ia he mea hiki. Aka, e ko maua haku, mahope o ko maua ike ana ia oe, a hoomaopopo hoi i kou ano, mai hoopau no maua i ua hana la ina ia he mea i hiki ia maua ke hooko aku. Ua noi aku maua ia Iuda e hookuu a'e ia maua mai ka maua i hoohiki ai, aku ua hoole loa mai la oia."

            "Ma ke kumu hea e hoike mai nei olua i keia moolelo i keia wa?"

            "I ike ai oe i ke kumu o ka maua mea i hana aku ai."

            "Na ka olua hana no e hoike a'e nona iho. E nana mai i keia mau kaulahao ; a e hoomaopopo mai hoi i ka pilikia ame ka make e kau nei maluna o'u."

            "Aole au i manao no ka maua hana i hala, e kuu haku ; aka no ka maua hana e hooko aku ana."

            "Ka olua hana e hooko aku ana?"

            "Ae, Ua hele mai nei o Selima ame a'u no ka hoike ana aku ia oe i kou hookuuia a'e mai keia wahi aku. Alia--i mau olelo pokole wale no ka maua e hoike aku ai, oiai he pokole ka manawa. Ua ae aku maua e alakai aku ia oe mai ka mana aku o Horama ina ia he mea hiki ia maua."

            "Iawai olua i ae aku ai?" i ninau koke aku ai o Kuliana.

            Kuha'u iho la ua mau kanaka la. Ua maopopo ole ia laua ina he kuleana ko laua e hoike aku ai i ko Ulina inoa; nolaila, pane aku la o Oma:

            "Eia o Hobadana iloko nei o ke kulanakauhale, a ua hoounaia aku nei ko maua ae iaia. Aka na'e, he mea hou aku no koe. Ina maua e alakai aku ana ia oe mai keia wahi aku, ua hana aku maua pela me ko maua ike aku no i ka pilikia e kau mai ana mamua o mana. Ua hooponopono mua maua no ia mea, a ua haawi maoli maua i ko maua mau ola no ia hana. Aka ina e lanakila ana ka maua hana, a hemo hoi oe, aole e hiki ia maua ke hoi hou mai no Damaseko nei. Ina maua e hele pu aku me oe mai keia lua aku he mea pono ia maua ke hele pu aku me oe mai keia kulanakauhale aku, a e noho pu hoi me oe."

            Manaoi'o iho la o Kuliana ke hoike aku nei laua i keia mau mea apau iaia me ka oiaio:

            "Pela," wahi ana i pane aku ai. "ina olua e alakai aku ana ia'u a lanakila mai keia mau kaula nana e paa nei ia'u e haawi no wau i na mea apu a olua e makemake mai ai, e hiki ana ia olua ke noho pu mai me a'u, ina pela ko olua makemake, a i ole e alakai aku no wau ia olua me ka maalahi no Sariana."

            "Ke lawe nei maua i kau mau olelo, e kuu haku: a mai keia manawa aku e lilo no o Selima ame a'u i mau kaua nau. Ua hoololi a'e maua i ko maua haku, a e hoikeia ka oiaio o ka maua hana ma ka maua mea e hooko aku ai. He mau pilikia ke halawai mai ana me kakou, e kuu haku."

            "Mai hoopuki i kekahi olelo no na pilikia e ili mai ana," wahi a Kuliana i pane aku ai. "E wehe a'e i keia mau kaulahao: e haawi mai ia'u i pahikaua; a e alakai aku ia'u iwaho: a e ninau hou ole mai ia'u. Ke hooiaio hou aku nei wau ia olua ke hilinai nei wau ia olua: a ina e hooiaio loa mai ana olua, e pili no ko'u aloha no olua no ka wa pau ole."

            Me ke kualehelehe hou ole iho hoomaka koke aku la o Oma i kana hana i hele mai ai. Paa aku la o Selima i ke kukui helepo, oiai o Oma e wehewehe ana i na kaulahao i hoopaaia ai ko Kuliana mau lima ame na wawae; a aole i liuliu iho ua hemo laelae a'e la ua Kuliana nei a kaua.

            "Aole he manawa e hoopau wale ai." wahi a Oma i pane mai ai iaia i waiho iho ai i na kaulahao iluna o ka papahele. "Eia he mau pahikaua maikai me kakou a no ke koena aku o ka hana he mea pono ia kakou ke hilinai i ko kakou maalea ame ko kakou ikaika. Aia he mau pilikia mawaena aku o keia lua ame wahi aku nei; eia na'e ua makaukau wau e halawai aku me lakou"

(Aole i pau)

 

TISIA-O-ATICA

 

Ka Wiwoole o na

Wiwoole-o

Ke Ahikanana Nana i Ulaa ke Kanawai

o ka Make Ciretia.

 

MOKUNA IV.

UWILA HOU KA HANA A KA NEWA HAO.

 

            A hiki no hoi lkou i ke kiekiena o ka puu a Cario i ha'i mua ai ua halawai io aku la ko lakou mau maka me na hiohiona o ke kulanakauhale o Atenai; a ma o aku e waiho kahela mai ana ke kaikuono kaulana o Saronika. A ma ka aoao hema iluna pono o ka lae pohaku e ku ana ka papu palekaua o ke kulanakauhale nona hoi na pa paia manoanoa e olino ana i ka pa iho o ka la.

            A ma ka aoao akau hoi o ke kulanakauhale e ku ana ka puu kaulana o Masa nona hoi ke alo i paa i na home o na kupa o ka aina a he kilakila maoli no na hale nunui oluna pono o ka piko i ka nana aku. Aka, no ka opio wiwoole aole oia i hookuha'u iho i ka hooholo ana i kona manao maluna o ke ano o ke kulanakauhale oiai aia oia ke mahalo la me ka pane ikaika ana iloko iho ona i ka lua ole o ka nani o Atenai ana i ike ai ke hookukuia me na kulanakauhale e ae ana i ike ai. O ka oi aku keia, a me ia noonoo i iho aku ai oia no ka owawa.

            Aia ka la i ke awakea i ka wa i komo ai na kamahele iloko Atenai a ma ka ipuka pa o ke kulanakauhale i hui aku ai lakou me kekeahi koa a ninau aku la o Tisia no Oreta ka mea hanadala, ua hoole mai nae ke koa i ka hiki iaia ke lawe ia lakou no ka mea, aole oia i ike i kahi noho ai oiai nae oia i lohe nui ai i kona inoa.

            Alaila nee hou aku la na kamahele iloko o ke kulanakauhale me ka loaa ole o na kuia a halawai aku la lakou me kekahi wahi elemakule a ninauia aku la no hoi e like me ka uiia ana o ke koa.

            "Ae, ua ike au." wahi a ua wahi elemakule nei iaia i huli mai ai a nana i na kamahele malihini me na maka oluolu. "Ua kamaaina hoi paha au ia Oreta, ke kanaka hanadala, no ka mea, he hoa noho pu ia o kahi hookahi--o kona hale noho aole i mamao loa kau mai ko'u wahi papai aku."

            "Ua hui kamailio pu au me ia i keia kakahiaka iho nei no," wahi a ke kamaa ua hookipa malihini i hoomau aku ai i kana ohaoha, "me kuu ike pu no hoi iaia e hana ana i apana waidala no Cupida e like me ka mau. O ke kanaka akamai hookahi keia o Atenai nei ma ka hana o na mea makamae dala, a e ha'i aku wau ia oe e ka opio u'i, ina he mea makamae dala kahi au i makemake ai e hanaia, o ke kanaka kupono loa keia, e hoohala ole ia ai e oe e pono ai."

            "He hana io no ka'u a'u i makemake ai nana." wahi a Tisia i pane aku ai, "a ua makemake loa wau e ike iaia i keia manawa a no, ina he mea hiki ia oe ke lawe aku ia makou i ona la."

            "Ina e uhai mai oe ia'u e ka opio u'i nohea, aole oe e kali loihi me ka ike ole iaia. Na'u no e alakai aku ia oe a hiki maoli i ka ipaka o kona halenoho, a ina makemake oe, na'u no e lawe ia oe imua o kona alo."

            "Ina pela e alakai aku e ka hoaloha", i pane aku ai o Tisia me ka olioli nui.

            Me ka eleu loa ua huli ae la ua wahi elemakule nei e hele a hoomaka aku la no hoi na kamahele i ka ukali ana mahope ona i kahi hina'i e paaia ana e kona (elemakule) lima hema me ke ano kaumaha. A no ka ike ana aku o ke kanaka opio i ke ano kaumaha o ua hinai nei, ua noi aku la oia ia Cario e lawe i ka hinai no ke kokua ana i ka hapauea.

            "He haawi ana mai ia ia'u i ka oluolu o ke kaawale aku o kena hanai kaumaha mai a'u aku." wahe a ke alakai hapauea ia Cario i lawe mai ai i ka hinai nana e lawe: "a ke manao pu nei no hoi wau aole oe e ai ana i kekahi huaai oloko o ka hina'i, no ka mea he kanaka ilihune wau a ke kau mai nei na maka o ka'u wahine ame na keiki pu no ko'u hiki koke aku."

            Aka, ua hoolana aku la o Tisia alii i ka elemakule ma ka hoike ana aku nana no e uku i na poino apau no na hua e aiia ana. a i ole nalowale paha. a olu iho la ka noonoo o ka elemakule me ka hele auau ana.

            Mahope iho o ka aloalo ana iloko o na alanui ua hiki aku la lakou mamua pono o kekahi hale nui i hoopuniia me kekahi pa kiekie a manoanoa no hoi--e ku ana malalo pono iho o ka papu palekaua o ua kulanakauhale nei. A ma ke alo iho o ka puka-pa i ku iho ai ua wahi elemakule nei.

            "O ka hale noho anei keia o Oreta, ka mea hana dala?" i ninau aku ai o Tisia.

            "Oia ia," wahi a ka pane.

            "He hale nui maoli kona a i paa pono i ke kiaiia e kona pa nui," wahi hou a ka opio o Atica.

            "A, e kuu keiki maikai," wahi a ka elemakule, "e hoomanao oe he kanaka oia i piha me na waiwai dala a e paa kona hale e pono ai, i hiki ole ai na limaikaika ame na powa e komo ai no ka hao ana."

            "Ma kuu ola ana," i hoomau aku ai ka hapauea,"e waiwai no ka poe aihue ke komo lakou iloko o keia hale me ka lanakila no ka mea he piha maoli no i ka waiwai."

            "Heaha ka waiwai?" i hoomaopopo hou ia aku ai oia.

            "He dala no hoi paha," wahi hou a ka elemakule me ka nanaia o ka haanui e halii ana maluna o kona helehelena; "he dala mai anei kela o ka uuku nei--he nui paha keia e waiho mai la!"

            Aka, mamua o ka hoonui hou ana aku o ka kakou wiwoole i na ninau ua hamama koke mai la ka puka-pa a ku ana he kanaka imua o lakou apau.

            "Aia no anei kou haku i ka home?" wahi a ke alakai elemakule ninau aku ai.

            "Ae, eia no oia," wahi a ke kauwa.

            "Eia he mau keonimana i makemake loa e ike iaia," i pane hou aku ai ke alakai, alaila, huli mai la oia a pane mai la i ke Keikialii Tisia: "E kuu keiki maikai, na keia kanaka e lawe aku ia oukou imua o Oreta ka mea hana dala. E ike no wau ia oe i ka la apopo ke mau kou noho me ia a ia manawa."

            "Ke hoomaikai aku nei wau ia oe," wahi hou a ka elemakule i hoomau aku ai, "no ka lokomaikai i haawiia mai ma ka lawe ana i kuu hina i kaumaha. I kuu wa opio e like me oe aole he ninau ana no ka ikaika a he ukana mama wale no keia ia mau la." Alaila huli ae la oia ia Cario a haawi pu aku la i kona hoomaikai, a me ia mau olelo i hopu hookuanui aku ai oia i ka hinai.

            Mamua o ka hele ana o ka elemakule ua haawi aku la o Tisia he mau wahi kenikeni a mahope iho o ka hoomaikai hou ana o ka elemakule no ka lokomaikai i panai wale ia mai ua huli ae la ka elemakule ma kona ala, a ukali aku la no hoi na kamahele mahope o ke kauwa e kali ana.