Ka Nupepa Kuokoa, Volume XLIV, Number 2, 12 Ianuali 1906 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

HOOPUKAIA I NA KAKAHIAKA POALIMA APAU.

 

BUKE XLIV HELU 2.   NUPEPA KUOKOA, POALIMA, IANUARI 12, 1906  NA HELU APAU 3102

 

HUI HOU NA LUNAKIAI.

 

NUI KA HANA I NOONOOIA MA KA POAONO I HALA.

 

Aeia ke Noi Hoomaha Elua Pule a Lunamakai Kalana Brown.

 

            E like me ia i hoikeia aku ai ma ke Kuokoa o ka hebedoma i hala e pili ana i ka malama hou ana o ka Papa Lunakiai o Oahu i kona halawai ma ka Poaono i hala iho la, pela i hooko ae ai na lala o ia Papa, a ua nui maoli no na hana o ka po o ia la, ka manawa i malamala ai ia hana.

            O ka poe i akoakoa ae ma ia halawai oia no o Lunahoomalu Kamika, Lunakiai Adams, Luka, Cox, Archer, Paele, Moore, Kakauolelo Kalauokalani Jr. ame Mr. Buffandeau, Kakaupokole Aea.  Lunahooia Bicknell, Hope-Launahoola Sol. Mahelona, Kapena S. Johnson, Carlo Long, Geo. Nawaakoa, J. Belser ame ka poe kakau nupepa.

            Mahope o ka heluheluia ana o ka moolelo i hala a aponoia ua hooholoia ae keia mau haawina dala e like me ia malalo iho nei:

 

Apana o Waialua, alanui . . . . . . . .     $  859.92

Apana o Ewa ame Waianae, alanui .      1257.65

Apana o Waianae, alanui . . . . . . . .          27.23

Lolo Kalana . . . . . . . . . . . . . . . . . .          63.95

Puuku Kalana . . . . . . . . . . . . . . . . .        140.25

Lunahooia Kalana . . . . . . . . . . . . . .         14.30

Apana o Waialua, alanui . . . . . . . . .         30.00

Apana o Koolauloa, alanui . . . . . . .         200.40

Kakauolelo Kalana . . . . . . . . . . . . .          54.80

Malama Paka . . . . . . . . . . . . . . . . . .         23.35

Bana Hawaii . . . . . . . . . . . . . . . . . . .        97.45

Alanui o Pupukea . . . . . . . . . . . . . . .       470.53

Apana o Ewa ame Waianae, alanui . .        18.30

Waihona Auhau Alanui Kaokoa (Honolulu)  965.88

Keena Lawe Opala (ukuhana) . . . . . .       397.14

Keena Lawe Opala (ukuhana) . . . . . .       109.85

Keena Alanui (ukuhana) . . . . . . . . . .        641.79

Keena Alanui (ukuhana) . . . . . . . . . .      6,459.76

Apana o Koolauloa, alanui . . . . . . . .        106.38

Apana o Koolauloa, alanui . . . . . . . .        201.40

Apana o Koolaupoko, alanaui . . . . . .       230.50

Keena Makai . . . . . . . . . . . . . . . . . . .      1043.57

Waihona Auhau Alanui Kaokoa (Koolaupoko) . . . .     28.15

Apana o Koolauloa, alanui . . . . . . . . . . . . . . . . . . . .     32.50

Apana o Koolaupoko, alanui . . . . . . . . . . . . . . . . . . .   205.17

Apana o Koolauloa, alanui . . . . . . . . . . . . . . . . . . . . .   632.93

Alanui o Pupukea . . . . . . . . . . . . . . . . . . . . . . . . . . . .    21.88

Apana o Koolauloa, alanui . . . . . . . . . . . . . . . . . . . . .    37.50

 

            A mahope no hoi o ka noonooia ana o ka hoike o ka Oihana Makai ua ikeia iho la he 117 ilio i hopuia, a mai ia huina mai he 61 i pepehiia a make loa.  He hoike loihi kuponoia e hooaiai ana i na hana a ka Oihana Makai i lawelawe ai i ka makahiki i hala, ua noi mai la o Lunamakai Kalana Brown i manawa hoomaha nona no elua hebedoma, a ua aeia aku ka hoomaha nona.  He hoomaha keia o ka Lunamakai Brown, i loaa ai iaia he manawae holo ai i Molokai no ka hooponopono ana i kekahi mau waiwai ona ponoi iho.

            Ma keia manawa i heluheluia ae aio ka hoike a Puuku Kalana Trent.  na ka Lunahoomalu i hoike mai i ka waiwai o ka hoomanao ana i ka puka pono ana mai o ke Kalana Oahu mai ka makahiki kahiko mai me ke koe koena no kona waihona no ka makahiki hou o $59, 584.07, a aohe ai-e.

            A aia hoi he huina pakui hou aku iloko o ka waihona Auhau Alanui Kuikawa o $9,256.  Ua heluia ke dala a ua ikela ka pololei e Lunahoomalu Kamika.  Lolo Kalana Dauthitt ame ka Lunahooia Bicknell.

            Na Frank L. Dodge, o ka Waiwai o Pauahi Alii, e noi mai ana e paia ka laina o ke alanui Kula hoi i hoomoeia iho nei mai ka Halepupule aku e oe ana no Kalihi, a nana no hoi I hoike mai i ka hooko ana o ka Waiwai o Bihopa i ka hoomaemae ana ia Kakaako, ma ka hanai ana ia o na halenoho o na aina o Bihopa ame ka hoopihaia ana.

            Mahope o ka hoolohe ana i ka haawi hoomaikai o ko Kaimuki Ahahui Hoomaemae, ua noonooia iho la ka palapala noi a Mr. Chas. Kukea, ka lunaalanui ame malama-buke o Waialua, no ka hoopii ana i kona ukuhana i ke $75 o ka mahina.  Aeia kana noi.

            Ma ka heluheluia ana ua ikeia iho la ka makemake o ia haole o Mr. T. J. Curby, ka inoa no Patterson, N. J., e hoouna aku i kii o ka Hale Kulanakauhale o Honolulu.  Ua kakauia mai ka leka mma ka inoa “Meia.”

            Mahope o ka noonoo ana i kekahi mau kumuhana ame ka hoopaneeia ana o na rula kapa-alanui o Luka ma ka ekolu o kona heluheluia ana, ua hoike mai la o Luka i ka makemake o kekahi mau luna aupuni kalana e hoopii ae i ko lakou mau uku.  Ua waihoia kekumuhana iloko o ke komike o na aia ame na loaa.  Hoopaneeia ka halawai a noho hou i ka hora 7:30 p. m. o ka la 16 o Ianuari.

           

            Inehinei iho la i hoohuiina ai o Mr. Oliver K. Poniaulani, o ka makani kololio o Waikapu, Maui, me Mrs. Ike Kaleo, o ka wailele o Hiilawe, Hamakua, Hawaii, ma ka berita maemae o ka male, ma kahi o ka wahine.

 

            Oke kihi ma ka aoao makai o ke alanui Moi a ma ka aoao Waikiki o ke alanui Betela e hanaia mai nei ma ka wawahi ana i na wahi halelaau apulu, oia kahi e kukuluia aku ai ka hale uinihapa nui o McCandless Building Company i hoopukala aku ai ma ke Kuokoa o na helu i hala koke iho nei, a he mau la hana wale aku no keia no ia hana hou, a ke paa ia hale nui o ka moekahi no ia o na hale pohaku nunui mai ia kihi o ke alanui Moi a ke kihi o ke alanui Papu.

            O ka hui i hoikeia ae nei maluna ua hookomo aku oia i kona palapala hoopaa me ke Aupuni Teritori no ke kukulu ana iaia ma ke ano hiu e ona ana i keia waiwai nui, ka hale uinihaa ae kahi e ku ai, a o na lala o ka hui o lakou no ka i lulu ae i kekahi hapa huina dala nui o $80,000 ma ke ano he kumupaa no ka hui i maheleheleia iloko o 800 mahele o $100 o ka mahele hookahi.

            O ka poe i komo ae iloko o keia nui a i komo hoi iloko o ka palapala hoopaa me ke Aupuni me ko lakou mau mahele oia o J. A. McCandless, 175 mahele; J. S. McCandless, 200 mahele; L. L. McCandless, 200 mahele; P. C. Jones, 150 mahele; ame Ella McCandless he 25 mahele, ua like ia me 750 mahele I luluia a he kanalima i koe no ka hoopiha loa ana.

            A ke pau na mea apau, alaila oia no ka manawa e maopopo pono ai na hoolala ana no ke kumuwaiwai piha o ka hui o ke kukulu ana i keia hale nui a ua hoonohonoho mua ia ae nae na mahele waiwai like ke kela malalo iho: Waiwaiio o ka aina, $39,900; ko ka hale uinihapa hoi he $40,100, a o ka piha no hoi ia o ke kumupaa o ka hui i ka $80,000.

            A ma na oihana kalepa ano nui na hana o keia hale e hoohanaia aku ai.

 

HE MAU LA HOOKAHE KOKO HOI KEIA.

 

            He mau la hoi keia e hookaheia mai nei ke koko, a e hanaia mai nei na hana karaima eleele.

            Ma Waialua i ka Poakolu i hala, i hana iho ai o Frank Johnson, i kekahi o na karaima eleele loa maluma o kekahi wahi keki uuku loa o eha wale no makahiki, ma kona pepehi ana a okiokila ke kino a kaawale kekahi mau lala mai ke kino mai; o ke poo, na wawae ame na lima, a kanu aku iaia iloko o kekahi wahi lua uuku i eliia no e ka mea hana i ke karaima, me ka manao e nalo, O Simeon Wharton ka inoa o keia keiki uuku i pepehiia ai.  O Frank Johnson, ka mea nana i hana i ke karaima, eia ke paa mai nei iloko o Kawa, a ua waihoia aku kona hihia iloko o ke kau kiure e hiki mai ana.  O ka lunahalepaahao o Waialua, ua hoopauia aku e Makai Nui Henry, mamuli o kona malama ole i kana hana i ka wa i makemakeia ai oia ma keia hihia pepehi kanaka o Frank Johnson.

            Pau hoi ia, hoea a’e ia hoi he hou pahi ma ka po Poaono nei ma ke alanui Muliwai, a he Pake hoi keia ma ka inoa o Ah Nam i houia.  He like ole ka moolelo i loaa’e, a mamuli o ia like ole, ame ke ano o ka hoike ana a ua Pake ia, ua manaola ua loaa keia poino mamuli o kona komo ana iloko o kekahi haunaele i ala a’e mawaena ona ame kekahi mau hoa lahui ona, aole hoi elike me kana i hoike a’e ai, he Poko Riko ka mea nana i hou iaia.

            Ua loaa aku oia ia Makai Rose, a nana i hoouna aku i ka lohe i ka Halewai, a holo aku ke kaa a lawe ak la i ua Pake ia no ka Halema’I Moiwahine.  Ke imi nei ka Oihana Makai i keia hana kimopo, ina na’e he hana kekahi o ia ano.

            Hala hoi ia me kona weliweli, loaa aku la o Kelekolio, he kanaka Hawaii, e waiho ana iloko o ka ehaeha mai na palapu i loaa aku iaia, ma ka wanaao Sabati nei, e waiho ana ma ke alanui Liliha, e kokoke ana i alanui Moi, ua okiokila kona poo i ka pahi.  Ua laweia a’e oia no ka Halema’i Moiwahine, kahi i wa-hila a’e ai kona mau palapu.

 

HE MAU KOMOLIMA DAIMANA I NALOWALE.

 

            No elua makahiki i hala a’e nei, makai a’e nei o ka uwapo o Waila Ma. ua lawe aku ia kekahi o na haole hana mea makamae i kekahi pahu uuku, a iloko o ua wahi pahu nei he mau komolima daimana elua, no ka hoouna ana aku i ka mea nona ua mau komolima la.  Ua waihoia aku keia pahu ma ka lima o kekupakako o ka mokuahi Likelike, a ua loaa mai no hoi ka likiki e hooia ana i ka loaa ana aku i ua kupakako la ua pahu nei.  Haalele iho ia ka moku i ka uwapo, a iaia e holo ana no ka hoopuka ana iwaho o ke awa, ike iho la ke kupakako he elua puolo i nalowale, a o keia pahu komolima daimana kekahi o ia mau puolo.  Hoike aku la ke kupakako i keia mea i kona mau poo a’e o ka moku, a na lakou aku hoi i ka Hui o Waila Ma.  Ua hoikeia aku keia mea i ka haole nana i hoouna aku, a waiho a’e la oia i kana koi i ka hui mokuahi, a ukuia, me ko ka hui lawe ana a’e mailoko a’e o ka ukuhana o ke kupakako.  Ua huliia keia mea a hiki i ka loaa ole ana.

            I ka wa i hoomakaia iho nei ka eli ana i ke awa ma kahi i ku ai ka mokuahi Likelike, ua loaa iho la he pahu, a iloko o ua pahu la i loaa aku ai e waiho ana no kekahi o na komolima, a hoolahaia keia mea maloko o kekahi o na nupepa o keia kulanakauhale.  O ke kupakako o Likelike i nalowale ai ua pahu daimana la, ua haalele aku oia i ka hana he manawa i hala a’e nei; aka i kona wa i heluhelu ai i ka moolelo o ka loaa ana o keia pahu me ke komolima daimana iloko olaila, ua hele aku la oia e ike i ka haole nana i hoouna, a hoikeia mai la iaia ua hiki no i ka haole hana mea makamae ke hooia i ke komolima daimanake ike oia.  Mailaila aku i hele aku ai ke kupakako no ka Halewai, a hoounaia ka makai i ka poe hana o ke kao eli awa, eia na’e ka mea apiki aole i loaa aku.

 

KAKOO OLE O CARTER IA ROBIKANA.

 

            Ua hoihoi hou a’e o Kiaaina Carter i kona kakoo ana ia Lunakanawai W. J. Robikana e noho houno ka elua o ka manawa ma ka noho Lunakanawai Ekolu o ka Aha Hookolokolo Kaapuni o ka Apana Kaapuni Ekahi.  Pela oia i hoike a’e ai ma ke ahiahi o ka Poakahi iho nei.  O ke kumu mamuli no ia o kekahi mau hemahema i hala iloko o ka Aha Hookolokolo.

            Ua hoike pu a’e no nei o Kiaaina Carter, ua hoouna aku nei oia i ka lohe i ka Peresidena e haalele ana i kana kakoo ana no Robikana, a ua ike pu ia aku no hoi ke Kiaaina e hui ana me Lunakanawai Matthewman o ka Aha Hookolokolo Kaapuni o na Kona, Hawaii.  Me he mea la ina maluna o keia ninau ka laua mau kukakuka ana, alaila, o ka puana a ka moe o Lunakanawai Matthewman ke hookohuia a’e ana malaila.

 

HOLO AKU NO WASINETONA.

 

            Ma ka mokuahi Sierra o ka Poalua iho nei i haalele iho ai o W. O. Smith, ka lunahoomalu o na elele mai Hawaii nei aku no Wasinetona ma keia ninau e pili ana i ke kanawai hoihoi loaa o ka Teritori nei, a Elele Kalanianaole i hookomo aku nei i ka Ahaolelo Nui.  O kona mau hoa iho e ka’ulua iki iho ana maanei a ka la 19, a kau aku malunma o ka mokuahi Mongolia, a no Wasinetona ka pahuhopu.

            Ma ka hora 4 o ka auwina ia Poakahi nei, ua malama a’e la na elele i halawai na lakou a ma ua halawai ia i hoike a’e ai o W. O. Smith i kona manao e holo e mamua o kona mau hoa.  Mahope o ua halawai la i ike aku ai oia ia Kiaaina Carter.  I kona halwai ana me ka meakakau o ka Advertiser, loaa mai la ke kumu o keia hele e ana, oia hoi no ka hoomakaukau ana no kona mau hoa i manawa no lakou e hui ai me ke komike o ka Ahaolelo Nui i waihoia aku ai keia kanawai hoihoi loaa, a no ka hui pu ana no hoi me ko kakou Elele no ka hoololi ana a’e i ka bila mai ka elima makahiki a i ka iwakalua makahiki o ia ka loihi o ka manawa e hookaawale ia ma ua kanawai la e uku mai ai ke Aupuni Federala i ke 75 pa-keneta loaa makahiki o keia Teritori.  Aole wale o ia, aka ua manao o W. O. Smith, he mea pono iaia e holo e i houluulu a’e i na hoike kupono e loaa ana ma Wasinetona maluma o keia ninau hookahi.

 

KA HOIKE A KA OIHANA MAKAI.

 

            Ma ka hoike a ka Oihana Makai o ke Kalana o Oahu nei no na mahina eono i hala aku nei i ikeia iho ai ka manoanoa o na hihia i loaa i keia oihana, ame ka nui o na poe i pakele aku, na loaa o na hihia, ame na dala maoli i loaa mai no ua mau hihia la.

            O ka nui o na poe i hopuia no ka ona rama mai Iulai a hiki i Dekemaba he 489.  He eha haneri o lakou i hoopaiia a’e, a he 36 i hiki ke hoike a’e i ko lakou hewa ole.  O ka loaa o ke Kalana ma keia mau hihia he $1393.

            No ka ona rama ua komo na apana apau iloko o ia mea, a koe ka Apana o Koolauloa, a he hoike maikai keia no ia apana ma ia mahele.

            He 1184 ka nui o na poe i hopuia no ka piliwaiwai, a he 821 poe i hoopalia, a o na dala hoopai ua hiki aku i ka $4853.  Mailoko a’e o keia huina he $2612.75 i ukuia a’e.  H $689 na loaa o na pela i haaleleia.

            Ma ua hoike la ua hookaawaleia na poe i hopuia no ka loaa ana aku o na kukuku ki-pa me lakou mailoko a’e o ka poe i hopuia no ka piliwaiwai, a he hookahi haneri ame umikumamaono poe i hopuia pela; aka an’e he 56 wale no poe i hoopalia.  O ka huina nui o ka hoopaiia i kaula he $2360 a he $379.80 i ukuia a’e.

            He kanakolu poe i hopuia no ke kuai waiona me ka laikini ole, a he iwakalua poe i hoopaila.  O ka loaa ma keia he $1368.50, o ka mea hilu no na’e aole loa he wahi pokeokeo i nakeke a’e ilokoo ka waihona o ke Kalana no ia mau hihia oiai ua pau nui aku i ka hoohalahala i ka aha maulna’e.

            O ka huina nui o a poe i hopuia iloko o ia mau mahina he 2990, a o ka poe i hoopaiia he 2044.  O na dala hoopai ame na koina o ka aha ke hoohuila a’e he $14,539.70 wale no i hookaaia a’e.

 

            Ua hala aku o Lunahooia Fisher ma ka mokuahi Kinau o ka Poalua nei no Hilo ma kana huakai pili i kana oihana.

 

Na Lono Like Ole O Na Aina-E.

 

KE PAONIONI LA NO O KELEMANIA AME FARANI NO MOROKO.

 

Wahiho ae o Peresidena Rusewela he Koi Iloko o ka Ahaolelo Nui e Huliia ka Ninau o ke Alawaioki o Panama.

 

NA ONENE KALAIAINA O PELEKANE.

            LADANA, Ian. 6. – O ka Eale o Morley, ka Hope Lunahoomalu o ka Hale o na Haku, ua puka amaka a’e nei ma ka hooikaika ana i ahaolelo i kohoia kona mau lala no ka lawelawe ana i na hana o Irelani malalo o na kauoha ana a ka Ahaolelo Nui o Pelekane.

            LADANA, Ian. 6. – I ka manawa e haiolelo ana o Kuhina Nui-i-pau Balfour i ka po nei ma Manchester, ua pinepine na manawa ona i hookuikuiia mai ai e na poe hoohaunaele.

E HAALELE ANA.

            SANA PETERBORO, Ian. 6. – Ua hoikeia a’e nei ua hoopaaia e haalele ana o Kuhina Nui De Witte i kona noho i ka manawa e hui a’e ai ka Ahaolelo Rukini.

HAAWINA DALA NO KA HOIKEIKE MA KAPALAKIKO.

            WASINETONA, Ian. 7. – Ua waiho aku nei o Lunamakaainana Kahn he hila e hookaawale ana i haawina o $5,000,000 no na hoolilo o ka hoikeike e malamaia aku ana iloko o Kapalakiko i ka 1913, ka wa hoomanao no ka loaa ana o ka Moana Paikipika ia Balboa.

KANAWAI NO SIBERIA.

            SANA PETERBORO, Ian. 7. – Mamuli o ke kuhuluku haunaele o ke kulana ma ke alahao o Siberia, he umikumamahiku mau apana i hookauia aku ke kanawaikoa.

KE PII NEI KE ANONINONI NO MOROKO.

            Ladana, Ian. 7. – Ke paa nei no k Kelemania, ilokomo na’e o ko Farani ku-e, maluna o ka hoomalu lahui ana o na palena aina o Moroko.

KAUMAHA MA MEKIKO.

                        MAZATLAN, Ian. 8. – Eia na kanaka e noho nei maanei ke ku nei imua o ka wi mamuli o ka hoopoinoia ana e ka waikahe ko lakou mau oo huita.  Ua hohoia aku e loaa ana he mau miliona dala ke poho ma keia mea.

HOOKUI HE MAU MOKUKAUA.

            NU IOKA, Ian. 8. – Oiai e haalele iho ana i ke kaikuono nei ua hookui aku ia ka mokukaua papa ekahi Alabama me Kentucky.  He wahi poino uuku ko Kentucky.

KO KE KOI KAI LAWAIA.

            WASINETONA, Ian. 8. – Ua hoopuka mai ka Aha Kiekie o Amerika Huipuia i ka olelo hooholo ma ka pooii a J. O. Carter ame na kahu e a’e malalo o ka Palapala Kauoha a Bernice Pauahi Bihopa ku-e i ka Teritori o Hawaii, e kakoo ana i ka aoao ku-e.  Ua hooleia ka olelo hooholo a ka Aha Kiekie o ka Teritori.

            Ua waihoia na hihia kai lawaia iloko o ka aha kuloko no aneane eha makahiki e kali ana i ka olelo hooholo maluna o ka hihia i hoikela a’o nei maluna.  E hooloheia aku ana lakou apau a he mea pono malalo o ke Kanawai Kumu o ka Teritori o Hawaii e waihoia a’e ia manawa i hoopii @ hoahewaia ia mau mea i loaa mai ai na pono no ka pomaikai o na makaainana o Amerika Huipuia.

KOI E HULIIA KA NINAU O PANAMA.

            WASINETONA, Ian. 9. – Ua hoouna aku o Peresidena Rusewela he palapala i ka Ahaolelo Nui inehinei iho la e koi ana e huliia na hana i lawelaweia ma ka ninau Alawaioki o Panama.

            Ua hoike a’e oia ma ua palapala la ana o na hauwallau hoonune i hoikeia ua hanaia he mau hana hoopilimeaai a ku ole i ka pono e pili ana no ua ninau ia aole o lakou mau kahua.

OLOHANI NUI.

            NU IOKA, Ian. 10. – O ka hui lahui o ka oihana kukulu hale ua hooholo iho nei e kuahaua aku i kona mau iaia apau e puka a’e a olohani ma ka Poaha.  He elua kaukani poe limahana e loaa ana i keia haawina.

MAHA KA MANAO.

            SANA PETERBORO, Ian. 10. – Akahi no a loaa ka manao hilinai i ke aupuni ua hala aku na ao hakumakuma me ka holopono ma keia kau anu.  Eia na’e ua kukala a’e na poe Socilika, eia ke nee nei i keia manawa ma hoolala ana i ka hoala kaua me na meakaua.

AIA NO KE HAUNAELE LA.

            RIGA, Ian. 10. – Iloko no o na hooikaika ana a na koa e kinai i na hana pakaha, eia no na kauwa ke hoopino nei i ka aina, e oki ana i na alahao me ka hoopoino pu ana i na kaa-ahi ame na ohua.  He nui na kakela i hoopoinoia e na kauwa.

KAUIA KA HOOPAI.

            MOSEKAO, Ian. 10. – He umi-kumamawalu poe i hoahewaia no ka hoala kaua kuloko i pepehiia maanei i ka la inehinehi.

KU KA HUI PALAKI-KAMAA A KO HONOLULU POE KAMALII.

 

            Ma ke ahiahi o ka Poalua i hala iho la i kukuluia ae ai he Hui Palakikamaa e ko Honolulu nei poe kamalii palaki-kamaa ma ka akoakoa ana ae ma kahi o iwakalua kamlii opiopio iloko o ka lakou halawai mua no ia hana o na lahui like ole, mai na oiwi Hawaii ponoi a na lahui o na aina okoa, e laa ka Poko Riko, Pake, Pukuku, Paela a pela aku.

            Iloko o ka malama ana i ka halawai ame ka hoohana ana i na hana ua hooholo iho la no lakou iloko o ke ano kanakamakua me ka nele ole nae o ka ulu nui ana o na walaau e like no me ke ano mau o na kamlii, eia nae ka mea hilu, ua ku ae la ka lakou hui.

            Ua koh a oia ae o Henry Thomas he Hawaii opio i peresidena, a o Paele Joe Everett, i kakauolelo a o J. K. Kalani, i puuku, a o Joe Kidero he Poko Riko, i lunahooia.  Ma kahi kahi-umiumi a ako-lauoho o H. Jeffs iloko o Honolulu Hale i malamaia ae ai ka halawai, a o kekahi ninau ne nui o ka noonoo ana ia oia no ka ae ana i na kamalii Pake ame ka ole, iloko o ka hui.

            “E ae anei kakou e hookomo i na Pake iloko o keia hui?” wahi a kekahi lala i kakauinoa i ke kumukanawai ame na rula, i uku ole nae i kona ukukomo he hapaha.

            “Ua komo mai nei o Jim.” i pane ae ai kekahi.

            “O, he Hapa-Pake oia,” i hooho ae ai kekahi lala.

            “Heaha ka like ole?” i ninau ae ai kekahi lala.

            “He nui na like ole,” wahi a ka mea nana ka ninau mua, “a o ka Hapa-Pake he koko Hawaii kahi iloko ona.”

            “Eia nae hoi,” wahi a kekahi hoa palaki-kamaa, “aole keia o Kina, a aole no hoi keia o Kapalakiko.”

            Alaila, hooholo like ia ae la e ae aku i na kamalii Pake e komo pu me lakou iloko o ka hui.

            He nui na mea i noonooia ae – a na kekahi i hooho ae e hakula i mele no ka hui, a i mau pihi hulali wahi hoi a kekahi a he nui aku na hookomo hana @na a kaa loa au maluna o na auhau palaki-kamaa ka noonoo ana e like me ka hapaumi no ka manawa hookahi o ka palaki ana. – Mai ka Advertiser o Ian. 10 iho la.

 

HOIKE HAPAHA KULA SABATI O KAPAA, KAUAI.

 

            Ua malamala ae ka hoike hapaha o ke Kula Sabati o ka Lulu o Moikeha, Kapaa, Kauai i ke Sabati la 24 o Dekemaba, 1905.  Me ka ohuohu o na papa me na haumana, mamuli no ia o ka hooikaika o na makua ake pono, e kokua pu ana i ke Kahukula Sabati Apana, C. K. Haae, a he koo ikaika hoi no ke Kahukula Sabati Nui, ma na hanma hoonee i na haa pono imua, oia no ka mea i ku i ke aloha i ka ke Akua hana.  J. M. Kaneakua, Mr. Kalawaia ame ke kahu oiaio, Rev. J. K. Kaauwai, na lunakanawai.  E na makua, hooikaika ia na hana Kula Sabati imua me ka hauoli, he poe hana kakou no ka Haku Aloha Kristo.  Ke haawi aku nei au i ko’u mahalo nui ia oukou, na hoa paaua pu a ka Hoola Kristo.

            E na haumana o na papa Kula Sabati, hoolohe ia ka leo o na makua e a’o mai ana i ka pono oi ae, oia ka pono uhane, o ka ka Haku a’o i ka poe Parisaio ame na Sadukalo.  E hua ae oukou i ka hua e ku i ka mihi, o ka manao o ka Haku no kela, a ua pili mai hoi ia kakou; e haalele loa i ka hewa, a e malam i na kanawai o ke Akua.  Imua i mau koa oiaio no ka Haku Aloha, i noho ka hanohano maluna o ka aina, me ka mahalo nui.

            Na hana hoike, ma ka hoomalu ana a ke Kahukula Sabati Apana, C. K. haaem ame kona hope, J. M. Kaneakua.  Hoomaka i ka hora 11:30 kakahiaka me ka pule a ke Kahukula Sabati Nui.  Papa pokii, hui me ke alakai, 10: Opio 11, papa no Kapahi mai 7, papa Makuahine 12, Makuakane 16, ua loaa ka huina i keia la hana, he 5@.  Mahalo.  He mau olelo paipai e hoohake ana i ka wai o ka hauoli mai ke Kahukula Sabati Nui mai, J. M. Kaneakua, Mr. Kalawaia, Rev. Kaauwai, Mr. Opio ame C. K. Haae, a ua haawila ae he makana waiwai nui, i ka papa pokili, na na Kahukula Sabati ma o ke komike ala, Mr. Kalawaia.  Hookuuia na bana me ka maluhia, me ka pule a ka Haku.

WM. HUDDY,

K. K. S. Nui o K. H.

 

            Ma ka pule i hala, ma ke poo meahou, “He Mau Inamona no na Home.”  ua komo hewa ka huaolelo “Amerika” ma ka inamona elua.  O ka pololei, he “Amonia.”