Ka Nupepa Kuokoa, Volume XLIII, Number 51, 22 Kekemapa 1905 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

            NUPEPA KUOKOA POALIMA DEKEMABA 22, 1905              9

 

TISIA-O-ATICA

 

Ka Wiwoole O na

Wiwoole

 

Ke Ahikanana Nana i Ulaa ke Kanawai o ka Make o Ciretia.

 

MOKUNA III.

KE KAUA ME KA NEWAHAO.

 

                       Nui loa ka hoomaikai o na pio i ko lakou hoopakele, a ua makemake pu no hoi lakou e ike i kona moa, aole nae i loaa aku.

                       "Ua like no a like," wahi a ka wiwoole i pane hou aku ai, "ke ike ole oukou na ike mai la no kela i ka mea nana i haawi aku ia oukou i na hoopakele ana a nana no ia e kanana mai."

                        Ua hoopaa mai la ua poe kalepa nei no ka mahele like ana i ka waiwai i loaa kamahao mai ia lakou mai ko lakou Haku Lokomaikai aku a aole hoi lakou e hoohala i ka hoomanao ana nona.

                        Mahope iho o ka haawi ana he mau hana a pau pu me ke noi ana aku i ka poe oihana kalepa no ke kanu ana i ke kino o ka pilikua ua kamoe hou mai la ka huaka`i o na kamahele.  A hala wale ka auwina la ua hoea aku la lakou ma ka huina o kekahi mau alanui elua, a o kekahi e moe ana i kahakai a ilaila hoi i loaa aku ai ka poe lawaia o ia mau kaha ia lakou nei.

                        Nui ka mama o na lawaia i ka holo ma ka manawa i ike mai ai i na kamahele---holo, holo pololei i kai o kahakai.  Eia nae ua ku mai la no ua poe puiwa nei mamuli o ko ke kamahele alii hooikaika ana aku aole he poino e loaa mai iaia aku.  Nolaila i ka maliu ana mai o ua poe nei ua iho pu aku la lakou i kai o kahakai a hookahi ko ianei komo ana e kokua i ka poe lawaia ma ka huki ana i ko lakou mau upena iuka o ka aina.

                        Ua hookipa maikai ia mai na kamahele me ke ohaoha nui e na lawaia o ia kaha a mahope o ka pulehu ana i na i`a i loaa mai no ko lakou aina-ahiahi ua hooluana iho la lakou ma ka ha`i moolelo ana i na wahi like ole o ka moana a lakou i hele lawaia ai ia la.

                        I ke kakahiaka ae mahope iho o ko lakou ainakakahiaka ua haawi mai la na lawaia i ko lakou mau waa no ka lawe ana i na kamahele ma ka moana no kahi i makemakeia a ua haawi aku o Tisia alii i kona hoomaikai no ka lokomaikai i panaiia mai me ka hoike ana aole i makemakeia ke ala moana no lakou.

                         "Aka," wahi a ke alakai o na lawaia, "aole e palekana kou hele ana mauka o ka aina maloko o keia mau wahi aku nei me ka loaa ole mai i na poino i makaukau mua.  Ina e pii oe no Korino aole e nele kou hui mai me Polukula, ka weli o ia ululaau, a ina e hala kou make iaia me kana pahikaua alaila aole e nele kou koalaia iluna o ka moe hao kamahao ona.  He nui ka weli e kauia nei ma ia mau wahi nona."

                        "A ina e makemake oukou e hele ma keia wahi aku," wahi a Tisia i pane aku ai, "mauka no hoi o ka aina, mai kanalua i ko oukou hele no ka mea e hele no oukou ma ia mau wahi ma keia hope aku me ka lanakila, no ka mea ua make o Polukula i keia manawa.

                        "Na`u oia i pepehi aku a make me kuu mau lima nei no a na`u hoi hookuu aku i na pio i hoopaaia e ia."

                        I ka wa mua o ka hoike ana aku o ke alii opio i ka poe lawaia no ka make o Polukula aole i komo ka manaoio me lakou no ka oiaio o ka moolelo a ka opio i ha`i ai a no ka opiopio no hoi kahi ona, aka i ka manawa i hoike aku ai o Tisia i ka pahikaua a ka pilikua a Cario i paa pu mai ai, akahi no lakou a manaoio a mohala mai la ko lakou mau helehelena me ka olioli no ka lohe ana no ka hoomanao koke ana ae ua hala ke kanaka i kau nui ia e ka weli oiai he manawa powa wale no ko lakou i na manawa no apau e loaa ai lakou i ka pilikia.  O kolaila poe ua noho lakou me ka piliaiku mau. 

                        "Eia nae," wahi hou a ke alakai o na lawaia, "aole oe i pulumi pau aku i na poino apau, no ka mea, i ka`u nana aku e hele ana ka oukou huaka`i no Atica."

                        Ua hooia aku la o Aisia i ka pololei o ia koho ana.

                        "Alaila," wahi hou a ua alakai nei, "e komo aku ana oe iloko o ka poino i oi loa ae mamua o ka poino i hala iho la.  He mau mile no mai keia wahi aku a oukou e hele hikina ai, a kokoke no hoi ma ke alanui a oukou e hele aku ai aia malaila e noho nei kekahi kanaka loihi kino palaulau a ikaika maoli no a ma kona mau palena aole oia e hookuu wale i kekahi mea me ke ola iloko ona.  Oia no ka moi o koua wahi, wahi a ua kanaka powa nei.  A o kona inoa oia o Perifita---he inoa i kau nui ia e ka weli."

                        "He kanaka limaikaika mau oia," i hoomau aku ai ua alakai nei, "aole ana hoopakele ana i ka poe apau e hoea aku ana ma ia wahi---pau kaue ame ka wahine---pau keiki ame ka poe palupalu, a o kana mea kaua he newa hao nui no ia e hiki pono ole ai i na kanaka nawaliwali a liilii o ka ikaika ke hapai i ua newa hao nei a me ia mea oia e hakaka ai, aole he mea, hala i kana kiina, a o kona hale ua piha i na iwi kanaka a hapala me ke koko kanaka---he weli wale no ka nanaina o kona hale ke nana aku.  Ke noi aku nei wau ia oe e oluolu e maliu mai a e ae mai i ka`u, na`u e lawe ia oukou ma ka waa a hoopae aku i ke kapakai o Atica."

                        Ua lokahi koke ae la o Cario ame Casana i ka manao o ke alakai a e kau lakou maluna o ka waa i haawi lokomaikaiia mai.

                        "Pehea hoi keia e kuu mau hoahele," wahi a ka kaua wiwoole i hooho puiwa ae ai ma ka lohe ana i ka kona mau hoa hoike manao e lokahi pu ana me ka ka lawaia.  "Ina ua maka`u olua alaila ke haawi aku nei wau i ka hookuu oluolu ana ia olua mai ia`u aku."

                        "E kuu Haku aloha," wahi a Corio, "aole pela.  Aole o maua nana no maua iho; aka nou iho maua i makee nui ai a mau ke pihoihoi i na wa apau.  Ua ike wau o na mea i ha`iia mai nei e ka lawaia he oiaio.  Ua lohe pinepine wau i ke kauia o ka weli o keia kanaka o Perifita a`u i manao iho ai aole aku la he kanaka nana e hoopuhili i kona ikaika.  Eia no hoi kekahi, e hoopokoleia no ko kakou alahele ke hele kakou ma ka moana."

                        "E kuu Corio maikai," wahi a Tisia, me kona ku pu ana ae iluna a liki hou ae la i ka ili-kuapo gula e kaei ana ma kona puhaka, "ina o ko olua maka`u no`u ia ke ha`i aku nei wau ia olua e hoopau loa a e hoomama i ka uhane.  No`u iho ua makaukau wau no ka nee ana imua."

                        Ua loaa e no ka ike ia Corio ame Casana aole he waiwai o ka hoohuli ana i ka noonoo o ka opio alii, no ka mea ua paa-e no kona manao, aka, no ka nui makee o laua i kahuli ai ko laua kokua me na lawaia, alaila huli ae ua mau hoahele nei a ukali aku la i ko laua haku a hookahi ka hele like ana ma ke alahele.

                        Ua haohao nui no hoi na lawaia a me na maka aa ko lakou ku nana ana mai i na kamahele a manaoio iho la i ko lakou nele ole i ka halawai aku me ka poino.  Aka me ke kanaka opio aole ka maka`u iloko ona no keia kanaka powa hou i haiia mai ai iaia. 

                        I ke awakea ua hiki aku na kamahele ma kekahi waipuna a hala ia mahope iho o ke kena ana ua loaa aku la he puaa ahiu ma ke ela a ma ka eleu nui ka hoahele Corio i ku aku ai ka holoholona hihiu i kana kiina ihe a loaa iho la ko lakou paina-ahiahi.  A iloko o kekahi oawa hohonu i hoaumoe iho ai lakou ia po no ka hooluolu ana.

                        I ke kakahiaka nui okoa no i ala like ae ai lakou a mahope o ko lakou paina-kakahiaka ua hoomau aku la no lakou i ka huaka`i.  A hele no hoi a ku pono ka la i ka poai-wela a o ke awakea no hoi ia ua ike aku la lakou i ka holo puahia ana mai o kekahi lio kanaka me ka ikaika nui a mai hala loa no ina aole i alaiia ke alanui e na kamahele e hoomau aku ana i ka pii ana.

                        "Ma ka inoa o ka manao aloha e na keonimana," wahi a ke kanaka maluna o ka lio i pane mai ai me ka nui o ke aho a ano paupauaho, "ke noi aku nei au ia oukou aole e hoopoino mai ia`u.  He mea au i hemo mai la mai ka make mai."

                        Iaia i pane mai ai ia wa hookahi no hoi oia i kaohi mai ai i kona lio, a i ke ku aua iho o kona lio me he la e hina aku ana oia no ka nui ikaika loa o ka holo ana.  I ka nana aku aia na hiohiona kau e ka weli iluna o ka malihini---e pukala-ki ana kona lauoho, a ua nahaehae kona lole a ua poholehole kekahi wahi o kona kino, me he la i ka hakaka oia.

                        "Aole a makou noonoo e hoopoino aku ia oe," wahi a Tisia i pane aku ai.  "O ka makou wale no i makemake ai oia ka ike i ke kumu nui o kou holo ikaika ana i ka lio e like iho la pela, a iloko hoi o keia ululaau."

                        "O, e na keonimana maikai," wahi a ka malihini hololio, "ina he mau kanaka i`o oukou, alaila e oluolu e hoolohe mai i ka`u, oia hoi, maanei no huli hoi aku, a hookahi ko kakou pakele like ana.  He elua paha mile o hope aku nei i halawai mai ai au me kekahi kanaka nanaina pilikua maoli a weliweli no hoi ke naua aku no ka mea aole ke aloha me ia a oia hookahi paha ke kanaka o ia ano a ka honua e malama nei.  A no ka mama holo launa ole mai o kuu lio ke kumu o`u i pakele ai."

                        "Alaila, ua halawai mai nei oe me ke kanaka nui Perifita?" i ninau aku ai ka kaua wiwoole.

                        "Ae, e ke kanaka opio u`i, a he keu kela a ke kanaka nanaina weliweli ke nana aku.  I kona helehelena no kau-e no ka weli.  A ke hui ae me ka newa hao nui ana he mea-e ka weliweli a ua lawa ia no ka hookaawale loa mai iaia mai."

                        Ma ka maopopo ana ia Tisia na mea o mua aku ua pau ae la kona ninau hou ana a mahope o ka hookuu ana i ka malihini kaulio ua nee aku la ka huaka`i o na kamahele.

                        He hapalua hora paha ia o lakou i hele ai me ka olelo ole ua hoomaha iho la lakou no ko lakou aina-awakea, a ia lakou e ai ana ua ike iho la ka opio alii i ka haalulu maka`u o kona mau hoaloha.

                        "E hoolohe mai ia`u," wahi a Tisia, mahope iho o ka pau ana o ko lakou ai ana.  "Ina ua maka`u maoli olua alaila e noho no olua ianei ia`u e hele au a hui me keia kanaka nui powa e oleloia nei.  No`u iho aole au i makemake e lawe ia olua i kahi o ka poino a olua i maka`u ai."

                        Aka ua hoole loa aku laua i ka haalele ana i ko laua haku a ina nei no ka poino e poino like no lakou apau, aka, aole a laua manao kuemi, a ina aia he noonoo maka`u ko laua alaila ua ulu mai ia mamuli o ko laua minamina i ko laua haku, a ma ia mea i haawai aku ai ke Keikialii Tisia i kona hoomaikai i kona mau ukali no ia manao makee, a hoomaka hou aku la ka lakou huaka`i.

                        Pii malie aku la no lakou oiai he wahi puu ia a lakou e hoopii ana a i ke kau ana iluna ua ku iho la o Tisia me ka holoi ana i ka hou o kona helehelena, a ku pu iho la no hoi na hoahele ona, no ka hoomaha pu ana, a huli ae la o Corio a ike aku la i ka pa kiekie o ua kanaka powa nei e oioi ana maluna o na laau.

                        "O kahi kela o Perifita," wahi ana i hawanawana aku ai i kona haku; a i ka lohe ana o ka opio ua pii koke ae la ka ulupuni iloko o kona kino holookoa me he uwila la i anapu ae i ka hikiwawe o ka noonoo uilani i loaa koke iho ai iaia.

                        "Ke manao nei wau ke olelo nei oe i ka mea pololei," wahi a Tisia, a ia manawa hookahi no hoi i hoalu iho ai oia i ke kuapo-ili kaei ona.  "I ka koke no e haalele mai ai ka uhane kau nui ia e ka weli o Powa Perifita, ka pakaha hao-wale a hoi aku oia i kahi mau "keia po e lilo no ke alaloa o ka anemoku o Korino i alanui no na mea apau me ka loaa ole o na hoopoino a e hele kuokoa no lakou me ka maka`u ole a no ka pono o ka lehulehu e make ai oia e pono ai a no ka pono no hoi o ka lehulehu e paio aku ai au iaia e pono ai, a i ole oia e hoi i ka honua alaila o ka Makuahine Alii Atira ke hooneleia i ke keiki ole."

                        "E hahai mai mahope o`u a aole hoi e huli aku ko kakou mau maka no hope a hiki i ka wa e hala ae ai na poino omua a pulumi pau ia lakou mahope o kakou."  O ka pane keia a ka kaua wiwoole iaia i huli ae ai no ka hele ana imua a aole no hoi i li`uli`u ua hiki mua aku la oia i kahi kalaneo kokoke i ka pa alii o ua kupua nei.

                        O ka hale, he hale nui ia me kona mau pa i kukuluia a kiekie a i ka nana aku ua kukulu manoanoaia nona ka ikaika e hiki ai ke ku aku i ka paio mai o na enemi me ka hiolo ole.

                        I ka opio kane i hookokoke loa aku ai i kahi e hapala ana i ke koko ua ike aku la oia i kekahi mau kino kanaka e waiho make ana a he ku maoli no i ka mainoino ke nana aku.  Me ka uilani o ka manao huhu i ulu koke ae iloko o Tisia alii no na hana mainoino i kauia aku maluna o na kino make e waiho ana imua o kona alo ua kukala leo nui ae la oia me ke koi ikaika ana e ike i ka mea nana i pepehi ia lakou.

                        Aole no i loihi loa kana ku ana ma ia wahi no ke kali ana i kona makemake e ike i ka mea nana i pepehi no ka mea ua hoea koke mai la ke Aliipowa o ia mau kuahiwi---o Perifita i makau nui ia, a i ka nana i`o ana aku no a ka kaua wiwoole he ku i`o no i ka maka`u ka helehelena i ka nana aku a maluna o kona kino i hoholo ae ai ka lia eeke.

                        Ma ke kiekie, he kanaka kiekie i`o no oia i kaa iki ae maluna o ke kiekie mau o na kanaka a o kona poohiwi aole e nele ka ike ia o ke kihikihi i he kulana ikaika maoli no kona mau lala a ke hoohui ae i na mea apau he kanaka kino nui a ikaika maoli i`o no o Perifita.

                        O kona mau maka e hulili ikaika ana iloko o ka huhu a hae i ke koko---iloko o kona mau maka aole ka oluolu ame ke aloha, aka i ka mea e kilo akahele ana ia mau onohi e ike ana oia ua hui pu ia aku ka hae i ke koko me ka haowale e ake ana i ka lako o ha`i nona wale no.

                        Ma kona lima akau e paaia ana he pauku hao nui---oia ka newa kaulana o ua Perifita nei a i kau nui ia hoi ka weli, a ma ke poo o ua hewa nei he mau kakala oi, na oioi e loaa aku ai ke kanaka me ka haehae liilii ia a lilo ka i`o i mea weluwelu.

                        I ka nanaina no o ke kupua Perifita a i ka nanaina no a kana newa hao ua kau e ka maka`u me na hoahele o ke keikialii, aka aole laua i ae i ka maka`uwale e lankila maluna o laua no ka nui makee i ko laua haku, ke kumu i hui pu aku ai laua me ka opio no ke kokua ana iaia, eia nae, ua papa aku la o Tisia me ka hoonoho ana aku ihope.

                        "Ku aku malaila," wahi a Tisia i leo nui aku ai i kona mau hoa, "koe wale no ina e ike olua e lanakila ana oia nei maluna o`u oia auanei ka manawa e hoolele mai ai i ka olua mau pua i na maka o ka powa haowale."

                        "Heaha keia," wahi a ke kupua o ke kuahiwi, iaia e nee haa mai ana me ka wiliwili mau ana i kana newa a i kekahi manawa ua hu nui ae la ka makani no ka iakiak o ka owili ana, "maihea mai oe e kuu wahi keiki ai waiu?"

                        "Ua hele mai au mai ka aina mai o Agolisa," wahi a Tisia, "a e hele aua no Atica."

                        "Ho, ho, hele no Atica ea?" wahi a Perifita i hooho ae ai me ka akaaka hoohenehene ana; "aole hoi i ka awiwi loa.  E pokepoke aku wau i na iwi ou iloko o kuu ipu.  Ua hemahema loa kou hele ana mai nei ma keia wahi, aka, aole me a`u ia hewa.  Nolaila, e pani oe i kou mau maka no ka mea ua hiki mai kou wa hope."

                        No na hoahele hoi o ke Keikialii Tisia ua manaoio iho la no laua i ke komo aku o ko laua haku iloko o ka poino i ka wa`i ike ai laua i ka newa e wiliwiliia ana me he mea mama la, nolaila i hoomakaukau e iho ai laua i ka laua mau pana ame na kakaka no ka hoolele koke no mamua o ke kau lihi iki mai o kekahi poino maluna o ko laua haku.

                        Me he anapu ana la o ka uwila i lele koke ae ai o Tisia no ka alo ana i ka pauku hao o ka weli o ke kuahiwi, a ina no i loaa mai, ina no ua nele ka Makuahine Alii Atira i ke keiki, aka aole nae pela, no ka mea, ua hala ae la ka ha-una mua a puehu liilii ae la ka lepo o ka honua i ka halulu ana iho o ua pauku hao nui nei ilaila.

                        Me ka eleu nui no hoi i hoohala koke ole iho ai o Tisia o ka manawa kupono loa no kana pahikaua punahele e hoohanaia ai, alaila, i ka iho ana iho o ka oioi o ka aulii na loaa aku la ka pulima akau o ua weli nei a oia no hoi ka lima e paa ana i ka newa a na ia eha i hoolelo iho ai kona lima a hemo aku la ua newa hao nei a koheoheo ana i kahi-e.

(Aole i pau.)   

 

KULIANA

Ka Weli o Damaseko.

KA HOOKO MOEUHANE A KA U`I ULINA

 

MOKUNA VII

KOMO I KE PUHI.

 

                        I keia manawa i lohe aku ai o Kuliana i ka nehe ana mai o kekahi mea mahope ona, eia nae aole oia i huli koke ae, a mamua o kona huli ana, ua loaa mai la oia i kekahi puupuu ikaika loa ma ka aoao o kona poo nana i hoohina koke aku iaia ilalo.  Ua ano maule oia i kela manawa, a mamua o ka hoi pono ana mai o kona noonoo maikai, ua pau iho la oia malalo o kekahi mau kanaka ekolu, a na lakou i nakinaki iho i kona mau lima ame na wawae me ka awiwi, uolaila aole i hiki ia Kuliana ke pale ae iaia i kona manawa i pohala ae ai. 

                        "E ka powa," wahi a ke kanaka Iseraela i pane iho ai maluna o ka kaua Kuliana iaia e moe ana iluna o ka lepo, "he pio oe na`u, a mai keia wa aku e kaa no oe malalo o ka`u malama ana a hiki i ko`u mauawa e waiho aku ai ia oe iloko o na lima o ko`u haku.  Aole oe e pakele ana mai ia`u aku, nolaila mai hoao oe e hoopakele ae ia oe iho." 

                        "O oe no ia e luda?" i ninau iho ai o Kuliana.

                        "Ae, owau no keia."

                        "A o keia mau kanaka a i elua o laua no na kanaka i hoike mai ai ia`u mai Alepo mai laua?"

                        "Ae."

                        "A o oukou a ekolu he poe lawelawe oukou no ka moi o Damaseko?"

                        "Ua koho mai la oe i ka oiaio."

                        "E Alahe," i puana ae ai o Kuliana, me he mea la e kamailio ana iaia iho, "mai pono loa ina i koho mua wau pela.  Ua makapo wau.  Ua hana aku wau e like me kekahi keiki nuku.  Aku nae aole no wau i pio malalo o oukou.  Eia no wau ma kahi e hiki ai ke loaa mai na kokua ana mai-------------"

                        Aia no ke kanaka Isaraela ke kiai pono la ia Kuliana i kela manawa, a i kona manawa i ike ai ua manao o Kuliana e kahea aku i mau kokua nona, ua lele aku la oia maluna o Kuliana a paa aku la i kona waha.

                        "Mai hoahewa ia oe iho, e Sir Powa.  Ua hana mua no o Iuda o Damaseko i kekahi mea oi aku o ka pohihihi mamua o keia; a he mea pono ia oe ke manaoio iho, i kona manawa i hele ai ma kana hana i hoounaia mai ai, ua maopopo mua no aole oia e hoi nele aku ana.  A, eia ae o Selima ke hele mai nei na lio.  E holo lio ana oe, ame ka awiwi pu no hoi; a i kou manawa e ku aku ai imua o ke alo o kamoi na hiki ia oe ke noi aku imua ona e like me kau i manao ai.  Aole o`u manawa e hoolohe aku ai i kau a aole no hoi owau ka lunakanawai @a e haawi aku i ka olelo hooholo."

                        Iloko o na la e ikaika ana no na lala, aia hoi ua Weli la o Damaseko he pio na keia mau kanaka ekolu, a ma kahi hoi he mau haneri wale no kapuai ka maomao mai kona mau hoa mai, aole hoi he mea nona e pakele a`e ai.  O kela mau aahuki konahao ona ua hiki ole ke moku a`e i na maawe kaula paa loa i hoopaaia aku ai oia, a ua hoopihaia aku hoi kona waha me ka lole a hiki ole ai iaia ke kuhea aku i kona mau hoa.  Hapaiia a`e la oia elike me kekahi wahi puolo uuku a hookauia aku la maluna o ke kua o ka lio e Selima ame Oma, a nakinakiia iho la oia a paa, a iloko o ka manawa pokole, aia oia ko laweia ala mai kona mau hoa aku---e laweia ana hoi no ke kulanakauhale o Damaseko, kahi e noho mai ana kona enemi ino loa.

                        E huli a`e kaua, e ka makamaka hoinainau o keia nanea, a nana aku i ka halealii o Horama.

                        E aneane aku ana i ke awakea o kekahi la, aia hoi ka moi o Damaseko ke noho ia iloko o kona lumi-moe, a o Aboula Casema kekahi me ia.  E kamakamailio ana laua maluna o ka male  hanohano e hoea mai ana.

                        "He ekolu la i koe," wahi a Horama i pane aku ai, " a e lawe mai no wau ia Ulina i wahine na`u.  E Aboula Casema, ke ninau aku nei wau ia oe; oiai o oe ka mea i ike, aole anei opiopio a`e nei wau mai ka manawa a`u i haalele aku ai i ka`u mau wahine?  Aole anei he ikaika hou a kulana uwila ko`u keia manawa?"

                        "He oiaio kau i pane mai nei, e kuu haku," i pane aku ai kona kuhina.  Ua paneia aku keia mau huaolelo me ka hoihoi, a ma ke ano hoi e hoopaapaa ole aku i kona moi.  "Ke manaolana nei wau e loaa mai no na hua ohaha maikai no kou manaolana, a ke pule nei hoi wau e loaa mai he hua mai ko Ulina puhaka mai, he keikikane hoi, a ma ia ano e hoohauoli a e hoopomaikaiia mai ai kou mau la kanikoo."

                        "E kuu Aboula maikai, he hilinai wau i kau mau olelo.  Ke manao nei wau ua ikaika wau a ua hoi hou mai ko`u mau la opio.  Ha! heaha hoi keia?  Owai keia imua o ko kaua alo?"

                        "E kuu haku," i pane mai ai ke keiki lawelawe o ka moi, "o ke kanaka Iseraela, o Iuda, aia oia mawaho, a ua makemake hoi oia e kamailio pu me oe."

                        "Pehea!" i hooho a`e ai ka moi.  "O Iuda no anei keia a`u i hoouna aku ai mai ke awawa aku o Lukania?"

                        "Oia no, e kuu haku."

                        "Ina pela, e olelo koke aku iaia e hele mai imua o`u.  Ma o na anela la, e kuu Aboula, aole paha i holopono kana misiona i hoounaia aku ai; aka aole na`e wau e manaolana loa ana pela."

                        "E pono ia kaua e manaolana aia he hopena maikai," i pane aku ai kona kuhina; aka mamua o kona hoomau loa ana aku i kana olelo, aia hoi hoea ana o Iuda imua o ko laua nei alo.

                        "Ha, e Iuda,---ke ike nei wau ua hoi koke mai oe.  I hoi mai nei anei oe e hoike mai ia`u ua haule kau misiona i hoounaia ai?"

                        "Aole, e kuu haku." i pane aku ai ua kanaka Iseraela la; "ua hele mai nei wau imua ou no ka lawe ana mai i ke alakai o na powa no Damaseko nei."

                        "Ua paa anei oia ia oe?"

                        "Ae, e kuu haku."

                        "Me ke ola no?"

                        "Ae, e kuu haku."

                        "A eia oia maanei?"

                        "Ae, me ka makaukau e laweia mai imua ou i na manawa apau au e makemake ai."

                        "Ua paa anei oia i ka nakinakiia?"

                        "Ae, e kuu haku."

                        "Ina pela e lawe koke mai iaia maanei.  Ma o na mea laa o Puloto, e ike aku no wau i keia kanaka.  Alia---ho!  Ke kiaiia nei anei oia?"

                        "Ae, e kuu haku.  Aia o Selima ame Oma me ia."

                        "O laua wale no ka?"

                        "He mea waiwai ole ka hoonui wale ana aku, no ka mea na paa ua pio la i ka nakinakiia a paa loa e hiki ole ai iaia ke ku-e mai."

                        "Ina pela, e lawe koke mai iaia maanei; a e lawe pu mai hoi ia Selima ma."

                        "Auwe no hoi e!" i hooho a`e ai o Horama i ka manawa i nalo aku ai o Iuda mai ia laua aku, "heaha ana la ke ano o keia kanaka a kaua e ike aku ai?"

                        "Aole e hiki ia`u ke koho aku," wahi a Aboula i pane aku ai.

                        "Ke manao nei wau he pilikua---i like aku hoi kona pupuka me ko Caikolepa.  Aka ua paa oia i ka nakinakiia, e Aboula---ua paa oia i ka nakinakiia; a e kiaiia no oia e keia mau koa ikaika o`u."

                        Aole i loihi loa, hamama hou ana ka puka, a komo mai la o