Ka Nupepa Kuokoa, Volume XLIII, Number 49, 8 December 1905 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

NUPEPA KUOKOA, POALIMA, DEKEMABA 8, 1905.     3

KULIANA

Ka Weli o Damaseko.

KA HOOKO MOEUHANE A KA U'I ULINA.

KE KANAKA ISERAELA.

MOKUNA VI.

"E Aboula Casema," wahi a ka moi, mahope o ka hala ana aku Iuda, "heaha ko'u manao no keia mea?"

"Ke manao nei wau e imi ana keia Isareala i kekahi papahana e hiki ai iaia ke hooko aku maluna o Kuliana mai keia manawa aku a hiki i ke kakahiaka o ka la apopo.  A ke manao nei no hoi wau, e kuu haku, aole he kanaka kupono e ae nana e hooko aku i kou makemake o keia Iuda wale no ."

I ke ahiahi okoa no hoi aku la ua moi la e hiamoe, a ia po holookoa ua hoanoeia kona moe ana mamuli o na moeuhane hoouluhua ; loaa aku iaia.  Ua moeuhane oia no elua a ekolu manawa ua aiheueia aku kana wahine hoopalau e Kuliana, a he hookahi hoi manawa ana i moeuhane ai i ike aku ai oia i ka lilo ana aku o kona nohomoi mai iaia aku.  I ke kakahiaka ae ua hooi loa ia aku kona makemake e make koke ka Weli Damaseko, a noho aku la oia me ka uluhua o ko Iuda hoea koke aku imua o kona alo.

I ka manawa a Iuda i hoike aku ai i ka moi e hiki aku ana oia me kana haina na hele aku la oia imua o ka moi, a hoike aku la e lawelawe ana oia i ko ka moi make make.

"Ina e holopono ana ka'u hana," wahi a ua Iuda la i pane aku ai, "e lohe koke no oe mai ia'u aku i ka wa e holopono ai.  Ina hoi e haule ana, alaila aole loa oe e ike ana ia'u."

"I ka wa hea oe e hooko aku ai i kau hana?" i ninau aku ai ka moi me kona iini nui.

"E hele koke no wau i keia la, e kuu haku.  I keia la no, ina wau e makaukau ana."

"He makemake anei oe i mau kokua nou?"

"E wae ae no wau i elua o kou mau koa i hilinaiia."

"E koho ana anei oe ia laua maiwaena ae o na poe i  hoonohoia ai maanei no ke kiai ana?"

"E kuu haku, aole.  Aole ia he mea e maalahi ai ka'u hana.  Malia o ike mai na powa ia laua.  e lawe no wau ia elua o na koa i hele pu mai me kakou mai Damaseko mai."

"E hana aku e like me kau i makemake ai, e Iuda.  E koho ae i kau mau kanaka i makemake ai a e hele pu aku no laua me oe."

Hoike aku la na kanaka Isaraela la e makaukau ana oia me kana mau mea i hoolala ai mamua o ka hoi ana aku o ka moi, a me keia hoopaa ana aku o na kanaka la i haalele iho ai oia i ke alo o ka moi.

I ke kokoke ana ae e awakea ua makaukau iho la ka huakai huli hoi a ka moi no Damaseko.  Ua hookauia aku o Ulina ame Alabia iloko o kekahi wahi pahu i hoopaaia maluna iho o ke kua o kekahi kamelo a kukuluia ae he hookahi haneri koa ma ko laua mau aoao.  O ke keena iho o na hoahele ua hooponoponoia ae e Aboula Casema, a o ke kali wale aku no o ka loaa mai o na kauoha a o ka hoomaka no ia o ka huakai e nee.  I ka makaukau ana o ka huakai, ua hoi hou aku la ka moi noloko o ka halealii, a malaila i loaa aku ai o Iuda iaia e hoomakaukau ana no kana huakai huli ia Kuliana, a me ia pu o Oma ame Selima, kekahi o na koa o ka moi, a he mau helehelena ko lana e hoike mai ana i ko laua ohohia i ka hana i waeia ai laua.  Ua hauoli loa iho la ka moi i ka Iuda papahana ame kona wae ana i keia mau kanaka i mau kokoolua nona.

"Mai loaa ole ia'u ka manao no laua nei," wahi a ka moi; "aka ua ike no wau e hooko ana no laua i kau mau kauoha.  Heaha na mea i koe au e makemake nei?"

"Aole he mea i koe," i pane aku ai o Iuda; "ua loaa na mea apau @i makemake ai, a ua makaukau wau no ka'u hana.  Ina e holo@o ka'u hana, e lohe ana oe mai ia'u aku i ka wa kupono; a i lohe ole oe mai iau aku, alaila e manao iho oe ua haule ka'u hana aole nae no ka nele i ka manao e hana aku nou."

Me na olelo hoolana manao pokole ua haalele iho la ka mai i kana kauwa e hooko aku i kana hana, a hoomaka aku la oia e hahai mahope o kana huakai, oiai aia ka huakai ke nee la; a mamua o ke kapoo ana o ka la o kekahi la ae, ua hiki aku la kana huakai no Damaseko, kahi hoi i hoihoi hou ia kau ai o Ulina e noho malalo o na kaupoku o kona home ponoi.  E pili ana hoi i kona mare, ua hoomaopopoia ae e hooko koke ia no ka berita laa mahope koke iho o ka pau ana o kona manawa kanikau, o ia hoi he elua pule i koe; a aole loa hoi oia e haalele iho i kona home a hiki i ka la o laua e hoohuiia ai, mamuli o ka manao ia o ike nui aku ua Ulina nei i na mea mawaho, mamua o ka lilo ana mai o na lima o ua kaikamahine la a Aboula i ka moi.

Maanei, he mea pono ia kaua e hoohuli ae i ko kaua lena ike a nana aku i ka Halealii o ke Awawa; kahi hoi a kaua i haalele aku ai i ka poe i liuliu iho no ka hele ana aku e huli ia Kuliana.  I ka hala ana aku o ka moi, ua hoike hou aku la o Iuda i na kauoha i manao ia na lakou e hana aku.  Aole e hele pu ana oia me kona mau hoa; aka e hele aku kona mau hoa mahope ona e like me ka lakou i aelike ai a e nana aku hoi laua ia Iuda me he mea la he malihini oia ia laua.

I ka auwina la o ia la wehe ae la o Iuda i kona mau lole apau, a kauoha aku la i kekahi o kona mau hoahele e hili iaia me ka ili i hoopaaia me na mea kalakala, a hiki i ke kakau ana o na maawe mai kona mau poohiwi a hiki i kona kikala.  Mahope iho o keia komo hou iho l aoia i kona mau lole, a i ka uhi ana mai o na eheu malu o ka po, u akau aku la oia maluna o kekahi lio holo loa, a holo aku la no ka akau, no ke kula hoi o Abilene.  Ua maopopo iaia o keia ke alahele a Kuliana ame kona mau hoa i hele aku ai, a ua manaolana oia e loaa koke aku ana o Kuliana ma iaia mamua o ka hala ana ae o kekahi mau hora loihi.  Ua hoomau aku la oia i ka holo awiwi ana a hiki i ke aumoe ana; aka mahope iho hele malie aku la oia me ka makaala loa, e kiei ana a e hoolohe ana, ma kona aoao akau ame ka hema iaia e nee ana imua.  Pela oia i holo aku ai a hiki i ka wehe na wanaao o kekahi la ae, me kona lohe ole a i ole ike paha i kekahi mea ano nui.  Aka nae ke neenee aku la oia i kahi e loaa aku ai kekahi mea ana e hauoli ai.  I ka wa a ka la i hoolei ae ai i kona mau kukuna malamalama maluna o na kuahiwi, ua hiki aku la oia ma kekahi ala hele ololi e waiho ana mawaena o elua pali kuhoho a e waiho mai ana hoi he awawa nani mamua, a iaia maanei ua paaia mai la kona lio e kekehi kanaka nui i nee mai hoi imua ona me ka ihe e paa ana ma kona lima, mai kekahi kumulaau nui."

"E ku iho!" wahi a ke kiai.  "Owai oe?"

"He mea auwana," wahi a Iuda i pane aku ai.

"E hele ana oe ihea?"

"No ka akau."

"Heaha kau e hele nei?"

"I keia manawa a kaua e kamailio nei ke huli ikaika nei wau i kahi e loaa mai ai ona ai na'u."

"He dala no anei kau iloko o kou pakeke?"

"He dala no e lawa ai no ka'u mea e makemake nei e loaa koke mai.

"Aole anei ou maka'u i ka lilo aku o ia mea mai ia oe aku?"

"Ma ke ano hae e lilo aku ai?"

"Ma kou loaa mai i na poe powa."

"Ina ma ia ano, aole o'u makemake e lilo aku ka'u mau wahi kenikeni.  He makemake no nae kou e hui me kekahi o keia poe powa."

"E halawai koke aku ana oe me lakou, a ia manawa e makemake ole ai oe i kou hui ana me lakou."

"Aole pela, no ka mea ke iini nei wau e ike aku ia lakou."

"Pela anei?  A heaha kau ia lakou?"

"Aole au ninau no ia mea.  Ina wau e halawai ana me lakou, e ike koke no lakou.

"Malia paha e hiki ana ia'u ke alakai aku ia oe imua o lakou."

"Ke manao nei wau e hiki io ana no ia oe; a e kuu hoaloha maikai, ina he hiki ke loaa lakou ia oe, a e alakai aku ia'u imua o Kuliana, e hoomaikai nui no wau ia oe."

"Ea, he kanaka kupainaha maoli no oe i ka hiki ana ke koho mai ia'u."

"Ua koho aku nei wau no ka puali oe o Kuliana, ka Weli:  a oiai he iini nui ko'u e ike aku iaia, ke nonoi hou aku nei wau ia oe e alakai aku ia'u i ona la."

Ua kunana iho la ua kanaka la i kana mea e hana aku ai, a i ka hope loa i pane mai ai oia, me ka hoholo ana ae o na minoaka maluna o kona mau papalina:

"He kanaka huna ole oe i kou manao, a ma ka nana aku aia he oiaio iloko ou; a ke manao nei wau e alakai no wau ia oe i ua kanaka la au e makemake nei.  Aka nae, e kuu hoaloha wiwoole, he wai manao kou o keia huli ana mai nei iaia."

"E alakai aku ia'u imua o Kuliana, a na'u no e hoike aku i ke koena o ka'u huakai."

"Ua pono; aole oe e hookikina hou mai ana ia'u.  E lele iho oe ilalo, a hahai mai mahope o'u."

Lele iho la o Iuda mailuna iho o kona lio a mahope o kona hoolou ana aku i ke kaulawaha o kona lio maluna o kekahi lala laau. hahai aku la oia mahope o kona alakai.  He hapalua mile mai keia wahi aku hiki aku la laua nei ma ka'e o ka ululaau nui, a malaila i ae aku ai ke kanka Isaaraela e polonia kona mau maka.  Aole oia i ake'ake'a ae, a ia manawa i hoomaka iho ai kona alakai e nekinaki i kekahi kuapo opu lole maluna o na maka o Iuda, a mahope iho o keia ua alakaiia aku la oia no kekahi wahi mamao aku, mahope no nae o ko laua hele ana ma kekahi alahele pakaawili, a i ka weheia ana ae o kona palulu, ike iho la oia iaia iho iloko o kekahi wahi awawa uuku, a e hoopunana iho ana hoi maluna iho o ua awawa la na liko launahele, a iwaena hoi o kekahi anaina nui o na kanaka he hookahi haneri i lako pono me na meakaua.  Hookahi iwaena o lakou--he kanaka u'i, a nanaina hoopono--i ku ae iluna a hele mai la i o Iuda la, a hoike aku la no hoi ke alakai i na mea i kamailioia ma waena ona ame Iuda.

"Ke makemake nei anbei oe e ike ia Kuliana? i ninau aku ai ua opio kanaka u'i la, me kona mau maka e haka pono ana maluna o ke kanaka Isaraela.

"Ae," i pane aku ai o Iuda, me ka hunahuna ole iho, ame ka pihoihoi ole no hoi, me he mea la oia pu no kekahi iloko o ko Kuliana auna.

"Owau no o Kuliana," i pane aku ai ka opio, me ka malie.

"Ina pela," i pane aku ai ka malihini, me kona kunou hoohaahaa ana aku, "imua ou ke waiho aku eni wau i ka'u noi."

"O ka ninau mua--owai la oe?"

"O Iuda ko'u inoa, a he kaua wau no ke aloalii o ka moi o Damaseko."

"A pela anei?"  Mai oi loa aku ka pono ina i hakilo pono loa aku o Kuliana maluna o ka helehelena o ua kanaka la, aka nae aole oia i puiwa ae i keia pane.  "Ua olelo mai nei oe e pili ana i ke noi.  Heaha la ua noi la?"

Wehe ae la o Iuda i kona aahu, a waiho mai la me ka moakaka imua o ua Kuliana la na moali kaula e kau ana ma ke kua ame na poohiwi o ua Iuda maalea la.

"Ke ike mai la anei oe i ko'u kua?" i puana ae ai ua Iuda la me ka naka haalulu ame ke aki ana iho o na niho.  "Ke ike mai la anei oe i kahi i aiia ai e na maawe huipa menemene ole?  Na Horama, ka moi o Damaseko i kau mai ia mau mea maluna o'u.  He makemake anei kou e hoike hou aku wau ia oe?"

"Ke manao nei wau he makemake kou e panai aku i keia mea maluna o ka moi" i pane aku ai o Kuliana.

"Ua aa loa wau ma na ano apau e kukuluia wau imua loa o kekahi pualikoa e paio ku-e aku ana ia Horama, a na'u ponoi no e pepehi aku iaia, a i ole e hookau no wau i na poino apau maluna o kekahi mea i onaia e ia.  Aole wau i hanauia ma Damaseko, a aole hoi malaila ko'u @wai.  E hoohui no wau ia'u iho me ka poe e hahai ana mahope o Kuliana, a o ko lakou poino o ko-u poino no ia, a ina hoi he pomaikai no-u pu ia pomaikai."

Mahope iho o keia i hui kuka iho ai o Kuliana me kekahi mau hoa ona, a aole no hoi i liuliu iho i hoike aku ai o Kuliana ia Iuda, ua hiki no iaia ke noho iho me lakou; a ina e hiki ana ia Iuda ke hooiaio iaia iho o ia kona manawa e hooliloia ae ai i hookahi me lakou.

Haawi aku la ua kanaka Isaraela la i kona hoomaikai no ka aeia ana mai o kana noi, a hookuu koke ia aku la oia e hele iwaena o ko Kuliana mau kanaka.  No elua la i ai pu ai oia me lakou, a e huipu ana hoi iloko o na hana hooikaika kino; a iloko o keia mau la ke ike la no oia i kona hakilo loa ia.  Eia nae ua like no a like kona makaala me na kiu e hoohalua ana iaia, a i ke kolu mai o na la, ua holiloia ae la oia i lala no ko Kuliana pohai.

I kekahi la ae ua laweia mai la e kekahi koa kiai o Kuliana he wahi kanaka paele, a hoike ae la ua paele la o Oma kona inoa, a ua olelo ae hoi oia ua holo malu mai oia mai kekahi hakuhana hanaino o Alepo.  Ua hoiek hou aku no hoi keia kanaka he hoaloha kona aia ma kekahi wahi o ka ululaau kahi i pee ai.

Mamua o ke awakea ana aena hoea mai la ua hoaloha la, a hoike ae la o Selima kona inoa, a i ka manawa i ninaninauia ai laua, na like loa ka laua mau moolelo i hoike ae ai:  mamuli o ke ano oiaio ua aeia mai la laua e noho ma ke kahuna hoomoana o ko Kuliana mau hoaloha; a i ka hope loa no hoi he mau kauwa na Kuliana.

Aole he mea a Iuda e hoohalahala ae ai no keia mea; a na hooholo iho la oia mai ia manawa aku e hoomoe aku ai oia i kana upena a paa pono me ka maikai.

Auwe no hoi e!  Ua moeuhane anei o Kuliana i ka poino e hoopuni ana iaia iho i kela manawa!

MOKUNA VII.

KOMO I KE PUHI.

Ma ka hooliloia ana ae o keia mau hoa o Iuda i mau kauwa na Kuliana, ua loaa iho la ka mea a Iuda e akahele loa ai a e noonoo nui loa ai.  Aole loa oia i manao mua e lawe ae ana o Kuliana i kona mau hoa a hoonoho aku ma kahi i kokoke loa i kona pono iho, a i kona manawa i ike ai i keia mea a Kuliana i hana'i o ka manao mua loa i komo mai iloko ona oia ka hoohakalia ana i kana hana i ole e ala mai na hoohuoi ana no Selina ma.  I ka hala ana o kekahi mau la pokole hoopau iho la o Iuda i kona mau manao maka'u oiai aole he wahi hoohuoi i loaa aku ia Kuliana nona a i ole no kona mau hoa paha, a hoohuli ae la oia i kona noonoo no ka hana nui e waiho mai ana imua o kona alo.

( Aole i pau.)

TISIA - O - ATICA

Ka Wiwoole o na

Wiwoole

Ke Ahikanana nana i Ulaa ke Kana

wai o ka Make o Ciretia.

MOKUNA II.

KA HOLOPONO MUA I LOAA.

"A malia paha," e hoike pu mai ana oe no na mea e pili ana i kuu makuakane.

"Aole loa pela," i luliluli ae ai ke poo o kona kupunakane, "aia ia malalo o ko'u malu.  E hookaka aku au ia oe i kou alahele e hiki ai ma ke kulanakauhale o Atena."

"Alaila," i pane hou aku ai o Tisia.  "Ke kanalua loa nei au, aole he waiwai o kau papa hoonohonoho hana."  Ua ike mau no maua me Cirio i kau alahele.  "Pehea," e kuu moopuna; "i uwa leo nui mai ai kona kupunakane Pitiasa."

"Alaila," ua manao anei oe e hele oe ma ka aina no ke kulanakauhale o Atena?"

"Ae," ua paa kuu manao pela.  Ma ka puali aku o Korino kuu alahele.

"Aole, aole loa pela e Tisia kuu moopuna.  E holo aku ana oe ma ek kaikuono o Saronica.  Maluna oe o kekahi moku maikai e holo ai me kekahi mau luina.  Oiai o ka puali o Korino e komo aku ai, ua piha pono i na poino ame na popilikia a hiki ma kela aoao o ke kulankauhale o Atena."

"He mau popilikia anei ka;u e imi nei."

"Oia mau poino lehulehu au e hoakaka mai nei ia'u, he mau moeuhane palaualelo wale no ia.  O na powa e noho ana ma na mauna, ame na holoholona hihiu apau o ka ululaau, he mau mea liilii wale no ia."

"Oia ko'u makemake," wahi a Tisia i hoomau mai ai me ka leo kuoo.  "E hoolilo no au i na powa, ame na holoholona hihiu o na ano apau i paepae no kuu mau kapuai wawae."

"Aka, e kuu moopuna," ua lakou pono na powa he mau miliona ko lakou heluna e noho ana ma na awawa, a ma na mauna me na mea make kiana pauda e hiki ole ai i kekahi mea kino kanaka ikaika loa malalo iho o ka la ke ku a paio aku no kona lanakila."

"Nolaila, e noonoo oe me ke akahele loa, a mai hele oe me ka hemahema nui."

"Ua pau pono ia'u ia mau alahele elua i ka noonoo ia," a ua paa kuu manao e hele au ma ka aina, ina e loaa ana ia'u he hoapaani ma ko'u alahele.

"Aole au e maka'u ina he kanaka ikaika kekahi malalo iho o ka la; a ina e halawai au me kekahi ulia pakalaki ma ka aina nei, ua oi aku ia mamua o ke alahele moana, aohe mea nana e hoonioni na io huki.  Ma ka puali o Korino kuu alahele mua.  Nolaila e hoomaha i ko kaua kamailio ana no ia mea.  A heahou ae ia kamailio au?"

Ua lilo njui iho la ka moi Pitiasa i ke kamailio ana me kana moopuna ma ke alahele moana; aka, e lilo ana no nae ia mau mea i oleloia ae la imua o kana moopuna i mea hoopau manawa.

Ua lilo nui noonoo o Tisia e imi nei i mea e loaa ai iaia ka holomua ma kana mau hoolala hana ana; a ua pale aku oia i ke a@ahele moana a kona kupuna kane i makemake loa ai.

Ma ia po iho, ua hele aku la oia e ike hope i kona makuahine aloha, a mahope iho o ka hala ana o ka hora hookahi o kona luana ana ma ka aoao o kona moe--ua haawi aku la oia i kona aloha hope loa.  Ua honi mai la kona makuahine iaia, a hoolana mai la me ka haawi pu mai i na hoomaikai palena ole maluna o kana lei aloha; me ka lana no o ka manao e hoohui hou ia aku ana no laua ma ke kulanakauhale o Atena.

Ma ke kakahiaka nui okoa no o kahi la ae i ala mai ai ka opio, he la malaelae hoi, a hoomakaukau koke iho la no ka nee ana o ka huakai me kona mau hoahele.  Ua makemake ke kupunakane Pitiasa e ukali ia lakou aka aole i ae aku ka moopuna.  A ua haawi mai no hoi ka moi elemakule i mau koa no ka ukali like ana no kekahi mau wahi aku omua aole no i ae mai ka opio.

"A, e kuu moopuna," wahi a ka moi me ke kulou luliluli ana o kona poo e hoike ana kona poo i kona kaumaha no keia paakiki o ka opio, "aole oe i hoomaopopo i ka nui loa o na popilikia o kou mau ala o mua aku nei a hoi iho no hoi aole i hala ka manawa kupono e noonoo ai no ke kupono ame ka ole no kou nee ana imua."

Ua minoaka iho la no ka opio alii i ka wa ona i pane aku ai i ke kupuna-alii a mahope o ke apo puili aloha ana i ka moi aloha moopuna ua huli ae la ke kanaka opio a kamoe aku la ma kona huakai.  Aia na palewawae gula ma kona mau wawae ame ka olioli nui no hoi oia e hele la me kona mau hoahele.

"Me he la ia'u e hele nei aia wau iluna o ke ea, i ka hele ka hoi a mama pu," wahi a ka opio alii.

"Pela io no i ka nana aku o mana ia oe," wahi a Cirio.

"Ae," wahi a Tisia, "me he la na keia mau kamaa i ka'ika'i mama ae i kuu mau wawae."

"A o kekahi," wahi a ke kanaka Atenai i hui pu aku ai ma keia hoomahele kamailio ana, "no kou ike no he meau kamaa laua no kou papa."

"Pololei oe e kuu Cirio maikai," wahi hou a ka opio alii.

Mamua no o ke awakea ua nalo ae la na hiohiona o ke kulanakauhale alii o ke kupunakane a ma ka manawa i uhi mai ai na eheu o ka malu po ua komo koli'uli'u loa aku la na kamahele iloko o ka hihipe'a o ka laau, kahi no i maa ia lakou i ka uhai holoholona.  A malalo o kekahi kumu laau nui i ho'a ae ai lakou i ahi nui no ka pulehu ana i na manu i loaa ia lakou ma ke ki ana o ka hoahele Casana a mahope o ka paina-ahiahi ua haule aku la lakou a hiamoe no ka hoomaha ana i ka luhi o ka la i heleia.

I ke kakahiaka okoa no i ala ae ai o Tisia a mamuli nae ia o ka halulu ana mai o kekahi mea a ma ka manawa ona i ku koke ae ai ua ike aku la oia i kekahi puaakanae nui ahiu he mau i-a ka mamao mai a lakou aku e holo mai ana no nae ma kahi o na kamahele i hookahua ai.

"A pela iho la ka kona poino i hoouna mai ai ia oe," i meaai no makou," wahi a ka opio i pane iho ai iaia iho no no ka puaa nae; a e like me ka mea i kamaaina i na meakaua a i lehia ma ia mau mea i lalau koke aku ai oia i kana ihe a hookahi no owili ana o ka lele aku la no ia o ka mea make a ku pono ana ma ka umauma o ka puaa kahi hoi i makemakeia e ku aku.

Ua loaa pono aku ka puaa ma ia wahi a puka pu ma kahi aoao no ka ikaika lua ole o ka pahuna ihe ana, a i ka wa i ala ae ai o Cirio