Ka Nupepa Kuokoa, Volume XLIII, Number 46, 17 November 1905 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

NUPEPA KUOKOA. POALIMA. NOVEMABA 17, 1905.

 

NA WARENA.

- OPIO -

ILOKO O KA ENAENA O KA

LUKUWALE.

He Moolelo o ka Lukuwale Ana ia o na Pelekane ma Inia.

 

MOKUNA XX.

HOOMAHA MAHOPE O KE KAUA.

  Alaila hahai aku la o Dike i na hana hookalakupua i hookoia ai eia ma kela po poina ole a holo ai no Lukanao he mea hoohauoli nui hoi i kona luau'i ma ka lohe ana i kona moolelo imi kokua.

  Alaila hoomaka aku la ka makuakane i ka hoakaka ana i na anoai o ko lakou noho ana iho. oi loa aku i ka hoi hou ana mai o ke kulana hopohopo me Nede a hiki wale i ka hoea ana aku o na kokua a mamuli no hoi ia o ka waiho ana o ke kanaka nawaliwali iloko o ka wela o ka la me ka loaa ole o ka malumalu a ua mala maoli ke kino no ka wela.

  "A heaha kau e hana ai e papa?"  i ninau aku ai o Dike me na maka halo'ilo'i waimaka no ke aloha i kona kaikuaana.

  "He mea pono ia'u e hooko aku i na kauoha i waihoia mai na'u e hooko, e Dike," i pane aku ai ka makuakane me ka leo oluolu."  Oia hoi he mea pono ia'u ame Mekia Danalope e hiki aku i Agara no ka hui ana me ka puali i waihoia mai iloko o ka'u malama a alakai ana.  No Nede e malama pono ia ana oia a i ka wa e oluolu ai e hoounaia ai no Kalakata no ka hoi loa ana i Enelani a me ia oe e ukali pu ai a o na kaikuahine o olua na'u ia e hoouna aku ilaila i hui pu ai oukou."

  He mau la ka noho ana iho o na puali o Kolina mamua o ka hulihoi ana no Lukanao me ke kanaka opio nawaliwali a i ke kolu no hoi o ka la i hoomaka aku ai o Konela Warena ame Mekia Danalope no Agara e ukaliia ana e kekahi puali uuku a pili aku la no hoi o Dike me kona kaikuaana ma ka we ana mai o kona Kapena Pila.  A i ke kaawale ana o na keiki mai ka makua aku ua lilo ia i mea hookaumaha loa oi loa aku i ka wa waiho mai ana kekahi keiki. aka mamuli o ka hooko hana aole e hike ke alo ae,  aole i paa iho na waimaka o ka opio Dike ame ka makuakane no keia kaawale ana.

  No hookahi pule i waiho ai o Nede iloko o ka ma'i fiva nui a mawaena hoi o ka make ame ke ola a i ka hala ana o ia manawa ua haalele mai la ka ma'i iaia. a mai ia manawa i loaa ai na hoomaopopo ana i ka pomaikai o ka pii hou mai o kona ikaika kino o ka wa i hala a i ole mau aku no oia ma ke kulana nawaliwali no ke koena o kona ola ana.  Aka aole pela ka nee ana o kona kulana.  No ka ikaika ka nawaliwali ua ola hou mai la oia a ola loa ae la kahi ona i ku ai. i ka pu alaila ua hoounaia aku oia no Kalakata.

  Ua kelekalapa aku o Dike i kona kapena no ka hookuu ana mai iaia e ukali pu aku i kona kaikuaana no Kalakata a maka haawiia ana mai o ka ae i hooko io aku ai oia a ma keia manawa aia laua opio ma ke ala e hiki ai i Kalakata.  A ke hele la laua iloko o ka olioli mui a oi loa aku o Dike no ke ola loa ana o kona kaikuaana kona hoapili o ka au like ana iloko o ka hakoko a loaa like ia laua na kulana aliikoa o ka oihana koa.

  Ma keia hoi ana o laua ua maikai ke ala a malaelae hoi.  A hiki laua i Banaresa i kau aku ai laua maluna o ka mokuahi a holo no Kalakata a ma ka manawa i hiki aku ai ilaila oia hoi i ke kulanakauhale ua hiki loa ia Nede ke holoholo me ka ikaika e kokua ole ia mai ai e kekahi.

  I Kalakata na hui hou aku na kaikunane me na kaikuahine o lana a he mea e ka hauoli o na opio i ka hui hou ana mahope o ka manawa loihi o ke kaawale ana a he kaawale ana no hoi iloko o ka pihoihoi nui ame ka piliaiku nui.  o na la eha a lakou i noho like ai he mau la ia o ka hauoli nui mawaena iho o lakou; alaila hoomaka hou ae la ke omamalu hou ana ino o ke kaumaha mawaena o lakou no ke kaawale hou ana.

   No ka mea. ma ka mokuahi Orienatala i kau aku ai na kaikuahine ame Nede a hoi no Enelani. ia Dike i noho hou iho ai he po hookahi i Kalakata a i kahi la ae i kau aku ai oia maluna o ke aumokukaua Pelekane o na kai o Kina kahi o kona mokukaua ponoi i hoopaa ai no ka oihana kaua moana.

  Ma keia wahi i kaawale ai ka ohana holookoa a kauliilii koe o Nede me na kaikuahine. a o Konela Warena makua hoi aia oia he wahi okoa e malama ana i kona kahua i haawiia aku ai nana e malama a o Dike hoi maluna o kona moku e au hele ana iloko o na kai hanupanupa o Kina.

  Aka, he elua makahiki mahope mai ua akoakoa hou ae la lakou apau oia hoi ka poe i akoakoa mua ai oiai i Sanadinafa i ka wa i hoomaka ai ka lukuwale o na Inia - he hui hou ana keia o lakou apau aole i Inia kipi aka ua hui hou ae lakou i Ladana.

  O na pupuaniani ame na waiwai makamae i lilo mai i na Warena Opio ma ke kuai ua lilo ae i mea waiwai nui.  O na Messrs. Garada ka poe i hoounaia aku ai ua mau waiwai makamae nei no ka huli pono aua i ke kumu waiwaiio ua haawi mai lakou no ke kuai ana i lilo aku ia lakou no hookahi haneri ame kanakolu kaukani paona (dala Pelekane) ua like hoi ia me $632,800 dala Amerika. a me ka olioli nui i aeia aku ke kumukuai.

  A o ka ninau nui oia no ka mahelehele ana. mahope iho o ke kakau leta mau ana mawaena o na keiki ame ka makuakane ua waiho mai la o Konela Warena na na keiki e hooponopono no ia mea.  Ma keia ninau na koi aku na keiki i ka makuakane e lawe oia i kanalima kaukani paona ua like me $243,000 a o ke koena iho i koe he 80 kaukani paona e mahele ia mawaena o laua kaikunane ame na kaikuahine elua (hookahi kaikuahine ponoi a hookahi kaikuahine hoahanau) ua like ia me $97,200 na ka mea hookahi o lakou eha.

  Na keia mahele ana i maikai ai ka malama ana i ke ola o ke kaikuahine hoahanau Miss Hatefoda a he kokua ana hoi ia iaia mahope mai ma ka mare ana ia Kapena Mena kekahi hoa hooikaika iloko o ka lukuwale a loaa ai iaia ka eha i hiki ole hi iaia ke komo hou ana iloko o ka oihana koa.  A pela no hoi o Miss Warena i mare ai me Mekia Danalope mahope iho o ka pau ana o ka manawa o kona komikina oihana koa o ka haawina i loaa mai na kaikukane mai a hui me ko Mekia Danalope ua lawa ia no ka malama ana ia laua.

  No Nede hoi ua maopopo loa ka hiki ole hou iaia ke komo hou iloko o ka oihana koa ma ke ano i koa.  A i kona hiki ana i Enelani na ike iho la oia i kona kauia ana iloko o ka papainoa o na aliikoa wiwoole o Pelekane ma ka mahele kulana mekia mai ke anuu kapena mai e hoaiai ana i kona mau hana wiwoole i kukuluia e ia maloko  o na wa o ke kaua lukuwale o na Inia ma Inia.

  I ka wa mua no nae ua haawiia aku iaia he hookahi makahiki hoomaha aka i ka wa i hala ai ia manawa ua hooholo mua ae la ka

(E nana ma ka aoao elima.)

 

Kenekuria Umi-Kumamaiwa

- AME -

Kana Mau Hana Kamahao.

(Kakauia e Simeon K. Nawaa.)

 

MOKUNA XIX.

(KAU POO EKOLU.)

HAWAII MALALO O KAAHUMANU.

 

Kau aku la ka moi maluna o ka moku L'Aigle. me kona mau hoahele Kamamalu. kana wahine. Boki ame kana wahine. Liliha. ma o Kekuanoa la, Kapihe. Manuia. ame Kimo Young. a haalele iho la lakou ia Honolulu ma ka la 27 o Novemaba. 1823.

  Ua waiho aku ka moi ma ka lima o Kapena Starbuck. ke kapena o ka moku. he iwakalua-kumamalima kaukani dala. ma ke ano nana e malama. a i ka hiki ana o ka moku ma Rio Janeiro. ua hookipaia mai la ka huakai a ka moi e ko Pelekane kanikela nui ame Emepera Dom Pedro i hoikeia ma ka mokuna maluna(e).  Ma ka huakai holomoana. ua hoowalewaleia me ka ikaika na kaukaualii ame ka moi e komo iloko o na hana piliwaiwai ame ka inu rama: nolaila i ka hiki ana o ka moku ma Portsmouth. Enelani. ma ka la 22 o Mei. 1824. ua hoolele aku la o kapena Starbuck i ka huakai a ka moi o Hawaii i ka aina me ka hoolako ole ana ia lakou.  I ka wa i hoikeia aku ai ka lono i ke aupuni o Pelekane. ua hookoku koke ia ae la o Hon. F. Byng i kahu nana e malama ia lakou nei. a uku hoi i na lilo apau oiai ka moi ame kona mau hoa e noho ana ma Pelekane.

  I ka manawa i wehe ia ai ka pahu dala ma ka Banako o Pelekane. ua loaa aku lahe umi-kaukani wale no dala e waiho ana. a aole hoi he hoike oiaio a Kapena Starbuck i waiho ae ai no ke koena aku o na dala; aka ua hoike ae oia ua hooliloia no e ka moi ame kona mau hoa oiai lakou e ku ana ma Rio Janeiro. a pela no hoi ia lakou ma ka huakai no Pelekane.  O Rives, he kanaka Farani. ka mahele olelo o ka moi, a mamuli o kona lawelawe pono ole i kana hana ua hoopauia aku la oia, a hookohuia ae la o Kimo Young ma kona makalua.

  Ua hookipaia mai ka moi me ka hanohano ma Ladana. e laweia ana hoi e hoomakaikai ma na wahi like ole o Pelekane.  Ma ka la 10 o Iune, loaa iho la o Manuia, ka a-ipuupuu o ka moi. i ka ma'i ulalii. a mahope koke iho o keia na loohia iho la lakou apau.  Ua ola keke ae la na hoa o ka moi. aka no ka Moiwahine Kamamalu ua pii mahuahua ae la kona ma'i a hiki i ke komo ana iloko o ka umauma. a iloko no o na lawelawe lapaau naauao ana ua make iho la oia ma ka la 8 o Iulai.

  Na keia mea hookaumaha i hoanoe loa ae i ka moi. a ma ka la 14 o ia mahina no make iho la oia.  Ua malama maikai ia ae ke koena iho o kona mau hoaloha. a hookipaia hoi lakou e Moi Keoki IV. ma ka la 11 o Sepatemaba, a nana i a'o mai e hoolohe na kanaka Hawaii i na a'o ana a na kumu misionari. a hoopaa mai la no hoi ua moi la o Pelekane e loaa no na malama ana i ke aupuni Hawaii mai ke aupuni o Pelekane.

  O kekahi o na hana wiwoole i hanaia i ka 1824, oia ko Kapiolani uha'i ana i ke kapu o Pele.  O Keaweamauhili ka makuakane o Kapiolani, kekahi hoi o na 'lii o Hilo, Hawaii.  O Naihe, ke kakaolelo Hawaii oia kana kane, a he keiki hoi na Keaweaheulu. o Kaawaloa.

  Mamua aku o ko Kapiolani huli ana i ka pono oia kekahi o na wahine paakiki, eia nae mahope mai o kona huli ana i ka pono, ua heluia aku oia ma ka papa kiekie loa o na aliiwahine i kakou ikaika loa i ka pono. a makaukau hoi e hooko i na mea maikai apau.

  Iloko o Dekemaba, 1824, i hooholo iho ai oia e wawahi i ke kapu o Pele. ke Akua hoi a na kanaka Hawaii i maka'u loa ai.  Iloko no o na kaua ikaika ana a kona mau hoaloha ame kana kane. ua pii aku la no oia no ka Luapele mai Kealakekua aku, ma kona alahele no Hilo Iaia i kokoke aku ai i ka Luapele, ua halawai aku la oia me na kahu o Pele, a na lakou i kaua mai iaia aole e hookokoke aku i ka lua. a wanana ae la no hoi lakou e make ana oia ke wawahi iho i na kapu o Pele.

  "Owai oukou?" i ninau aku ai o Kapiolani i ua mau kahuna la.

  A i ko lakou pane ana mai, i pane aku ai oia:

  "Owau nei ka ke Akua oiaio i noho mai ai."

  I ko na kahuna hoao an mai e ha'i mai i na kauoha a Pele, o ia no hoi ka manawa a Kapiolani i waiho aku ai i kekahi pauku o ka baibala e hoike ana o Iehova wale no ke Akua.  Mahope o na papaleo loihi ana, ua paa iho la na waha o na mau kahuna la. alaila hoomau aku la o Kapiolani i kana huakai no ka lua. a malaila oia i halawai aku ai me Mr. Goodrich. he haole hoi e hele ae mai Hilo. Ma ka aoao hikina o ka lua i kukuiuia ae ai i hale no Kapiolani. kahi hoi ana i noho iho ai i ka po. a i ke kakahiaka o kekahi la ae i iho aku ai oia ilalo o ka ina. me kanawalu poe mawaho ae ona.  Iaia i hiki aku ai i ka papa oiaio. ai iho la oia i ke poha i hoomanaia na Pele a kiola aku la i ka pohaku iloko o ke ahi e lalapa ana ma kona pane pu ana aku:

  "O Iehova ko'u Akua.  nana e hoopio iho i keia ahi.  Aole o'u maka'u ia Pele.  Ina wau e make mamuli o kona inaina. alaila e maka'u oukou ia Pele: aka ina wau e hilinai ia Iehova. a malama mai hoi Oia i ka wa a'u i wawahi ai i kona Pele mau kapu. alaila e maka'u oukou Iaia wale no a e hoomana aku Iaia wale no."  Alila hui pu ae la ka ahakanaka a mele iho la i mele hoonani i ke Akua oiaio. a pepelu iho la ko lakou mau kuli a hoomaikai aku i ka Mea nana i hana i na mea apau.

  Ma ka la 21 o Mei. 1825. i hooleleia mai ai i ka aina nei na kino wailua o Liholiho ame kana wahine. a waihoia aku la iloko o kekahi hale kupapau kahi hoi i waihoia ai no kekahi manawa.  Ma ko laua anaina hoolewa ua hanaia ae na hana pili hoolewa i maa i na kanaka Hawaii. a ua huipa iloko o ia mau hana ko ke au naauao a na ilikea i lawe mai ai.

  Ma ka la 6 o Iune i malamaia ae ai ka ahakuka lahui ma Honolulu nei. no ka noonoo ana i ka mea nana e noho ae i ka nohomoi. a ma ia aha o ka Haku Byron kekahi.  Ua kuahaua koke ia ae la o Kauikeouli i moi malalo hoi o ka inoa Kamehameha III: a hoomauia aku la no hoi o Kaahumanu ma kona kulana kuhina nui oiai o Kauikeouli e noho opio ana no.  Ua apono ae ka Haku Byron ia mea. a pela no hoi me na hana a na kumu misionari Amerika. a haawi iho la no hoi he mau a'o naauao ana i na 'lii o ka aina.  Malalo no hoi o kana mau a'o ana i kakauia ae ai na rula no na awakumoku o Hawaii nei.

  Malalo o na a'o ana a ka Haku Byron. ua hooikaika iho la na'lii o ka aina e kinai i na hana ha'iha'i kanawai ame kona mau makaainana.  Ma na awa o Honolulu ame Lahaina ua ikaika loa keia mau a'o ana. a na ia mea i hoala koke ae i na haunaele mawaena o na kanaka Hawaii ame na poe o na aina e.  O keia poe o na aina e oia no na kapena moku ame ko lakou mau sela, a o ka lakou olelo kaulana. oia iho keia:  "Aole he Akua ma keia aoao o ka Lae Hona."

  O ka haunaele mua ma Lahaina no ia. i Okatoba 3, 1825. a na ka poe sela o ka moku "Daniel."  Kapena Buckle. i hoala ae ia haunaele.  I ko lakou hiki ana ae ilaila a lele hoi iuka o ka aina. na ike iho la lakou i ka loli anoe ana o ka aina mai ka lakou i ike mua ai.  He elua la mahope mai ua komo aku la kekahi poe sela ma ka home o Mr. Rikeke ame kana wahine a hooweliweli aku la iaia e make ina aole oia e hooikaika e hoopauia ae ke kanawai awakumoku i kauia.  Ma ka la 7, ua lele hou aku la keia poe sela me na pahi ame na pu panapana no ka pepehi ana ia Rikeke ma, aka na halawai mai la lakou me kekahi puali Hawaii malalo o ke alakai ana a Hoapili. a nana i hookuemi aku ia lakou. a kiai hoi ia wahi a hiki i ka haalele ana o ka moku.

  Ma ka la 23 hoi o Ianuari. 1826. hoea mai la ka moku "Dolphin" malalo o ke alakai ana a Lukanela John Pereival. ma Honolulu nei, mai na Paeaina Makala mai.  I keia manawa no hoi ua ili ae la ka moku "Ladana" ma Lanai. a holo aku la keia moku no ke kokua ana.  I ka hoi hou ana mai no Honolulu nei i Feberuari 22. na hele aku la o Lukanela Pereival e ike ia Kaahumanu. a hooikaika aku la iaia e hoopau ae i ke kanawai nana e kinai ana i na hana ino a na poe o na aina e ma na awakumoku o Hawaii nei. a e hooweliweli ana hoi i ka moiwahine.

  "He ukulii ko'u wahi moku." wahi a na ilikea la. "aka na like oia me ke ahi."

  Ma ka la 26 na lele ae la kona mau kanaka a hoopoino ae la i ka hale o Kalanimoku. oiai oia e waiho ana maluna o kahi moe me ka ma'i. a komo wawahi ae la no hoi lakou i kahi o na misionari. mamua o ko lakou hoopuehaia ana aku.  Ua hoopakeleia ae o Mr. Binamu mai na lima ae o keia poe e na kanaka.  I ke ahiahi na kipa ae la o Pereival imua o na 'lii. a hookonokono hou aku la no oia e hoopauia ae ua kanawai la.  Mahope. mamuli o ka ani hoomaka'uka'uia. ua ae aku la o Kiaaina Boki ame Manuia. ke kapena o ka papu. e hanaia na hana ha'iha'i kanawai. a ua oleloia. ua hooho hauoli ae na kela o na moku la i ka aeia ana aku.  I'a ku iho la na moku nei maanei no elua pule hou aku. a he mea hiki ole i keia makapeni ke hoike ae maanei i na hanaino i hanaia e na kela o keia moku.

  I ka huli hoi ana o Lukanela Pereival no Amerika. na noho ae la he aha nieniele nona ma Kalekona. Makekukeka. iloko o Mei 1828. no kana mau hana ma Honolulu.  He kanakolu kumamaono la i noho ai keia aha. ma ia aha i loaa ae ai na hoike oiaio e ku-e ana iaia.

  I keia makahiki hookahi no hoi i hoopae mua loa ia mai ai ka Makika ma Lahaina. na ka moku "Welinetona. a mai San Blas. Mekiko mai hoi.

(Aole i pau.)

 

MOKUKAUA VICTORY (LANAKILA) O BERITANIA NUI. KO ADIMARALA NELEKONA MOKUKAUA LAWE HAE MA KE KAUA

KAULANA O RAFALAGAR.