Ka Nupepa Kuokoa, Volume XLIII, Number 44, 3 Nowemapa 1905 — Page 1
| This text was transcribed by: | Kailianu V. Michaels |
| This work is dedicated to: | In loving memory of my father, Mervin Apana Lee Kwai |
Ka Nupepa Kuokoa
KE KILOHANA POOKELA NO KA LAHUI HAWAII.
HOOPUKAIA I NA KAKAHIAKA POALIMA APAU.
BUKE XLIII, HELU 44. NUPEPA KUOKOA, POALIMA, NOVEMABA 3, 1905. NA HELU APAU 3092
KA HOIKEIKE MANU A HOEA MAI.
Ka Liuliu Mai Nei ka Ahahui Hanai Manu o Hawaii Nei.
He Nui na Makana e Haawiia Ana no na Hoikeike Helu Ekahi a ke Komite e Wae ai.
E malama ae ana ka Ahahui Hanai Manu Hawaii i ka hoikeike makahiki mua loa iloko ae nei o na la 7, 8, ame 9 o Dekemaba e hoea ae ana.
O kahi i kohoia no ka malama ana i keia hana aia ma ke alanui Kalepa, a o ia no hoi kahi i ku ai ka hui @@a o Herrick. Ua hoolimalimaia keia wahi i hale hoikeike, kupono a i hoomalamalama pono ia, a ua manao ia ua lawa kahi i kohoia no ka hookipa ana aku i na manu hoikeike a ka poe e makemake ana e komo ae ma keia hoikeike manu nui a hoea mai.
Ma na hiohiona e ike e ia aku nei e umeia ana na manao o na poe hanai moa, kaka, palahu, ame na manu e ae e komo pu ae ma keia hana a hoolilo ae i ka hoikeike i mea holopono, a oiai o ka manawa mua loa keia i hanaia ai keia ano hana ma keia Teritori, he mea pono e hoolilo ae ia hoikeike i mea nui a holopono.
Ua hookaawaleia no kahi e hoikeike ai na manu a ka poe i komo iloko o ka ahahui. a ua konoia no hoi kela ame keia mea hanai manu e komo pu ae iloko o na hana hoikeike. Ua hamama ka puka no na manu wale no.
O na makana apau a ka Ahahui i hookaawale ai e haawi koke ia no lakou i ka manawa e pau ai ka nana ana a na lunakanawai a hooholo i ka lakou mea i wae ai.
O na makana kaulele mawaho ae e loaa koke ana i ka mea i lilo ai mahope a ka pau ana o na hana, a mai ke kakauolelo aku o ka Ahahui.
Ua hamama ka puka i keia manawa no ka hookomo ana ae i na palapala noi, a me he mea la e mau ana a hiki i ka la 5 o Dekemaba.
O ka ukukomo no ka mea hoikeike he $1.00 no hookahi ano; na paa, $1.25; ekolu, $1.50; pa hoohanau, $2.00; manuku. $1.00 o ka paa; hookahi manu 50 keneta.
O na poe apau e manao ana e komo ae ma na hana hookelakela nani e waiho ae i ka lakou mau noi maluna o na palapala i hooomakaukauia a i paʻihakahakaia e ka Ahahui. a e loaa no hoi ua mau palapala la ma ke noi ana ae i ke kakauolelo o ka ahahui. E uku mua ia na auhau, a e komo no hoi ka manu malalo o na malama ana ame ka hooponopono ana a ka mea nana ia manu a mau manu paha. O ka hanai ana na kekahi loea hanai manu a ka Ahahui e hookohu ae ai. a pela no hoi me na mea ai. Aole e aeia kekahi mea hoikeike e komo aku iloko o kahi hoikeike ina aole i paa mua ka inoa maluna o ka buke a e kakauolelo.
O kela ame keia ano manu e komo ana no ka hookelakela no ka makana ia e pono e hookomoia ma ka inoa ponoi o ka mea nana ia mea. a o ke ku-e ana i keia rula e kiolaia no ua mea hoikeike la ke komo aku iloko o kahi hoikeike.
Ina hoi e komo ana kekahi manu no kekahi kumu i hoike ole ia, o ka ukukomo no ia mea e lilo no i ka Ahahui.
O kela ame keia mea e komo ae ana e malama ana lakou i ka lakou mau manu ma na halemanu i hoomakaukauia e ka Ahahui. a o na hua apau e hanau ana a e moe ana paha i ka manawa o ka hoikeike e ohiia no lakou, a o na hua maikai ke malamaia a kiola no hoi i ka mea ino.
O ka mea i komo pu ae ma na hana hoikeike i hiki aku kona ukukomo i ka $3.00, e loaa no na palapala komo no ka manawa holookoa e hoikeike ai - aole nae e hiki ke haawi aku i kekahi mea okoa.
Aia iloko o ka ukukomo ua huipuia aku na hookomo ana a kela ame keia ahahui ame na makana kaokoa, auhau halemanu, ka malama ana ame ka hanai ana i ka wa e malamaia ana ke hoikeike. Ua hiki no i kekahi mea e manao ana e hookomo i kana mau mea hoikeike ke noho me ka hele pu ole mai me ua mea hoikeike ia ana, aka nae he mea pono e hoomaopopo mua ia na lilo no ka hoihoi hou ana aku ia mea mahope o ka hoikeike ana.
Aole e ae ia ana e kauia na inoa maluna o kela ame keia halemanu, aole hoi i kekahi hoailona e ae a hiki i ka pau ana o ka nana ana a na lunakanawai. Aole hoi e ae ia kekahi mea he hoikeike kana e hoao e akeʻakeʻa a i ole e koi aku i na lunakanawai no ka lakou olelo hooholo ma ke kau leta ana a i ole ma kekahi ano e ae paha, a o ka mea e hana ana pela a e akeʻakeʻa ana i ka hana a na lunakanawai e lilo no kona mau pono apau e loaa ana ma ka haawiia ana o na makana.
O na makana e haawiia ana oia iho keia: Makana Ekahi, lipine bolu, elua, ulaula; ekolu, akala; eha, melemele, a hoopukaia ana he mau palapala hoike hoomaikai i kakauinoaia e ka peresidena ame ke kakauolelo o ka Ahahui. E kau koke ia no keia mau lipine maluna o na halemanu i hooholoia e na lunakanawai, a e mau hoi ke kau ana a hiki i ka pau ana o ka hoikeike i mea e maopopo ai i ka poe e hele makaikai aku ana.
O ka olelo hooholo a na lunakanawai o ka piha pono ia.
Nuhou Kuwaho.
KE KOMO NUI NEI NA KOA.
ST. PETERSBURG, Okatoba 28. - O ka houluulu nui ana o na koa ke komo nui nei. Ke manaoio nei ke aupuni o ka haunaele nui mawaena o na koa ame ka poe hoohaunaele e hiki ole ana ke pau. Ua kauoha no kiaaina o Warsaw ame Lod@ i na koa e ki aloha ole aku i na hoohaunaele.
KONOIA NA ALIIMOKU MA KA PAPAAINA EMEPERA.
TOKIO, Okatoba 28. - He eha kaukani aliikoa mokukaua i konoia ma ka papaaina awakea i haawiia e ka Empera.
HOEA O ALICE I KAUHALE.
WASINETONA, Okatoba 28. - O Miss Alice Rusawela ua hiki mai oia i ka hopena a kana huakai loihi a eia hou ia ma ka home.
O JEROME KA NA REPUBALIKA MOHO.
NU IOKA, Okatoba 28. - Ua waeia ae nei o Jerome e na Repubalika no ka oihana Loio Apana.
E HOLO AKU ANA O TAFT NO COLON.
WASINETONA, Okatoba 28. - E holo aku ana ka hana huakai a Taft no Colon i ka la apopo.
KANALUA KA ZA NO KA HOOLAHA AKEA ANA.
ST. PETERSBURG, Okatoba 29. - O Premier de Witte ke koi ikaika nei i kuokoa pihakuʻi no na nupepa ame haiolelo ame ke kuleana o ka malama halawai nunui akea ana. Ua kanalua ke Za no ia mea. Ke hele aku nei na kulana i ka piliaiku loa. Aia he 300,000 poe hana ole. Ua hiki pono ole i ke aupuni he hoonee hana imua a ke ikaika nei ka poe ku-e. Aia he @0,000 mau koa ko Kiaaina Generala Trepoff mau puali maanei. O keia ano hookahi no i komo aku iloko o Moscow. Aohe he emi mai o ka ikaika olohani alahao. Ua ku ae ka mokukaua Hatharine i Odessa me ka loaa a ulu ole o na pilikia maluna ona.
HANAU HOU IA O HUNAGARIA.
BUDAPEST, Okatoba 29. - O na hoano hou ana o Fejerwary pau pu me ka manakoho laula o ka ae ana i ka olelo Hunagaria iloko o na pualikoa ka hoonaauao akea ana.
KU-E AKU I NA AWA ASIA O TUREKE.
VIENNA, Okatoba 29. -- Ua hooholo ae nei na mana e hana i mana kauamoana ku-e ana i na awa Asia o Tureke.
HAALELE KA AHA-KUHINA.
MADRID, Okatoba 29. - Ua haalele iho ne ka aha kuhina. O Generala Weyler ka mea i maopopo loa no ke Kuhina Kaua.
NUI KA PILIAIKU MA RUSIA.
ST. PETERSBURG, Okatoba 30. - Aole he hookahe koko oonei inehinei. He ikiiki nae ke kulana. Aohe he hiki i ke aupuni ke hoomalu. Aia he like ole mawaena o Witte ame Klasina Generala Trepoff.
PILIAIKU NA MAKAAINANA AME NA MALIHINI.
O ka lahui aia iloko o ke kulana piliaiku maoli. Aole i hooholo ke Za i kona manao. Ua pilikia pu no hoi na malihini.
LUKU WALE MA ODESSA.
ODESSA, Okatoba 30. - Iloko o na hakaka o na koa me na kanakahana ame na haumana, he iwakalua-kumamahiku i make a he kanaiwa i eha.
PAAIA KA HOOHANA ANA I NA HANA.
WARSAW, Okatoba 30. - Ua paaia ka hoomau ana i na hana oonei. He nui ka poe i hoehala iloko o ka haunaele ma Lodz.
NUI KA MAKE O NA KOSAKA.
TIFIS, Okatoba 30. - O ka haunaele oonei ua pau. He heluna o na Kosaka (Rukini) ka i pau i ka make ma ka hu ana o ke kaaahi o na koa.
(E nana ma ka aoao 6.)
W. H. Babbitt, ka Luna Kula Hou.
(kii ʻo W. H. Babbitt)
Ma ka Poaha o ka pule i hala i ninau aku ai o Kiaaina Carter ia Winfred H. Babbitt ina paha e ae ana oia e lawe ae i ke koikoi o ka noho ana ma ke kulana Kahukula o na kula aupuni.
Ua ae aku no o Mr. Babbitt, aka nae e noonoo mua oia, a i ka Poalima ae i hele aku ai oia e hui hou me ke Kiaaina. Mahope o ko laua kukakuka ona no kekahi manawa, ua ae aku la oia e lilo i Kahukula, a loaa mai la kona hookohu. a i ka Poakolu iho la i komo ae ai oia ma kana hana. e pani ana hoi ia James C. Davis, i haalele mai i ka hana.
Eia no o Mr. Babbitt i ke 35 o kona mau makahiki, a ua hanauia oia ma Waitfield, Vermont, i Augate 4, 1871. I na makahiki 1886 - 1891, e hele ana oia i k Kula o Pillips, Andover, Mass., a i 1891 - 1895 ma ke Kulanui o Williams. a i kona makahiki hope malaila i loaa ai iaia ka inoa hanohano A. B. Ua noho kumukula oia ma ke Kula Kumumua o Sigler no na Keikikane ma Newburg N.Y., mai ka makahiki 1895 - 1896. e aʻo ana hoi ma na ike huahelu, a i ka makahiki hope ua holo mai la oia no Hawaii nei a lilo i kumuaʻo olelo Latina ma ke Kulanui o Punahou, he wahi hoi nana i paa iho no ekolu makahiki. I keia wa oia kekahi o na kahu waiwai o Punahou. Ua mare aku oia i ke kaikamahine a Mr. ame Mrs. J. O. Carter. Mahope o kona waiho ana i ka oihana kumukula ua lilo ae la oia i limahana ma ka halekuai o Von Hamm-Young Co., Ltd.
He keonimana o Mr. Babbitt i hilinaiia e na poe hanohano o ka aina, a oiai ua loaa pu iaia ka ike ma na hana hoowaiwai ame ka oihana kumukula, ke manaolanaia aku nei e maikai ae ana ka lawelaweia ana o na hana pili i ka hoonaauao ana i na pokii o Hawaii nei.
Halawai na Lunakiai.
Ma ka halawai a na Lunakiai o ke Kalana o @@nu i malamaia i ka po Poakahi nei ala hou mai ai ka ninau maluna o na Palapala Kikoo Dala Huikau a o ka palapala kikoo dala i noonooia oia no ko Frazee. Ua pepehiia iho ua palapala kikoo dala nei, a o keia iho la ka hopena o na palapala kikoo dala huikau apau. Ma keia mua aku, mamuli iho la o keia hana a ka Papa, aole e hoopukaia ana na palapala kikoo dala ukuhana o na limahana o ke Kalana ma ka inoa o kekahi mea, aka ma ka inoa o kela ame keia limahana pakahi.
O keia malalo iho nei na koi ukuhana i hooholoia e ka Papa:
Oihana makai, $7145.92.
Na Luna Aupuni Kalana, $1670.
Keena Kakauolelo Kalana, $195.
Keena Loio Kalana, $635.
Kupakako a ka Puuku Kalana, $100.
Kupakako a ka Lunahooia, $100.
Luna Pa-aupuni, $30.
Oihana Kau heahelu, $300.
Na Malama Paka. $200.
Papa Alanui Ewa, Moanalua, $100.
Bana Hawaii, $1250.
Oihana Lawe Opala, $150.
Oihana Alanui, $1739.
Oihana Kinaiahi, $3625.
Oihana Kukui-uwila $570.
Oihana Hoailona Pauahi ame Makai, $100.
Kapiolani Paka. $326.50
Oihana Alanui. $96.93
Lunakiai Lucas i hoike ae ua hoopau ae o Sam Johnson i kona manao e holo maluna o ke kaa otomobila ma kana mau huakai nana i na alanui i ka manawa i loaa ae ai ka ike aole ia he mea kupono.
Na Moore i waiho ae he manao e hoao ana i ka ninau, owai la ka mea i loaa ka mana maluna o na alanui apau. o ke Kalana paha a i ole o ka Teritori paha, a e noi ana i ka Papa e hoopuka i na palapala ae hoomoe paipu-wai ia elua mea i noi mai no ia mea. e hoomoe ana @oi mai kekahi aoao a hiki i kekahi aoao o ke alanui Vinla.
Ua hoike ae ka Loio Kalana aia i ke Kalana ka malama ana i na alanui o ka lehulehu aka ma kekahi olelo hooholo a ka Aha Kiekie maluna o keia ninau ua hoike ae ua aha ia mamuli o ke komo mana ana mai o na lunakiai ua hoololiia na mana o ka Oihana o a Lehulehu. Ua manao oia e ala mai ana he mau hoopaapaa ma ka ninau mana maluna o na alanui mawaena o ka Oihana o ka Lehulehu ame ke Kalana. Ua hoopuka ae ka Loio Aupuni, he manawa i hala ae nei, he manao maluna o keia ninau hookahi e olelo ana he mana kiekie ko ka Oihana o ka Lehulehu.
Ua manao hoi o Lucas he mea maikai ole i ka Papa ka hoohoihoi ana aku i ka poe i loaa na ponowai e haawi aku i ka wai i kekahi poe e ae. oiai ma ia hana ana ua hooneleia ke Aupuni me kekahi mau loaa e loaa mai ana ina e kii ana ka poe i makemake i ka wai o ke Aupuni. Eia o Theodore Richards ke hoolako nei i ka wai ma ke kuai ana i ka wai o kona luawai aniani i ka poe e makemake mai ana.
Ua manao hou o Moore he mea pono e hoao mua i ka mana o ke Kalana ma keia ninau. Ina he mau ku-e kekahi mai ke Oihana o ka Lehulehu no ka lilo o kekahi mau kenikeni mawaho aku, he mea pono i ka Lunanui o na Hana o ka Lehulehu e hoopii ku-e ia Theodore Richards. Ua hoike hou ae no hoi o Moore ua olelo ae ka Lunanui o na Hana o ka Lehulehu. e ku-e no oia i ka hoomoe ana i na paipu wai ma kahi i nolia, ina e waihoia aku ana keia mea iloko o kona lima.
Mahope o na hoike manao lehulehu ana ua noi ae io o Lucas e aela ke noi no ka hoomoe ana i na paipu wai. aole no nae e aela ka hookuu ana i ka wai iloko o ua mau paipu ia. Aole he mea i kokua i kela noi: nolaila, o ke noi mua a Moore e hoopukaia na palapala ae hoomoe paipu ka i hooholoia, o Lucas hookahi ka mea i ke-e ae.
Na Lucas i hoike ae ua ike ae ka Papa Ola i ke komite o na alanui no na mea e pili ana i ke kulana ino o ke alanui Moi, mauka ae o kahi hoolulu kaaahi, e kokoke ana hoi i ka hale bibi o na Pake. Ua manao oia e hoomoe pohaku bitumena ia keia wahi, a e hanaia no hoi me ka awiwi.
No ka lunahoomalu hoi i hoike ae he mea pono e hanaia ke alanui Beritania.
Na Adams hoi i hooikaika ae e hana ia i paka o 20 kapuai iwaena o ke alanui Waikiki. no ka hoomaikai ana ae ia wahi, a waiho pu ae no hoi oia he noi maluna o kela manao ona.
Manao o Lucas he mea pono e ana mua ia ke alanui. Na Adams hoi i hoike manao ae he mea pono e kanuia na laau poinciana ma na paka alanui; aka ua manao o Archer he mea hoopunana i na @@@@ na laau i hoouluia ma k@ʻe alanui. O ka hopena o na kamakamall@o ana maluna o keia noi. oia ka hooholo @@a ia ana.
Na ka L@n@nu@ @ na Hana o ka Lehulehu i kakau @@ he @@@@ i ka Papa e hoike ana aole @ hoouna aku ka Papa.
HE 100 POE WAIWAI O KE AO NEI.
Hiki aku ka Huina o ko Lakou Waiwai i ka
$6,740,000,000.
Like a like keia Huina me na Loaa Auhau o Nu Ioka
J. D. Rockefeller ka Ona-biliona.
O keia papainoa malalo iho nei oia na inoa ame ka waiwaiio o kela ame keia kanaka waiwai he hookahi haneri i waeia mailoko mai o ka poe waiwai o ka honua holookoa. O ka hapanui o keia poe ua loaa ia lakou ka waiwai ma ka hooilina, oia hoi he 40 mailoko mai o ka hookahi haneri; he 13 he poe malama banako; 12 poe hoopukapuka dala; 6 poe hana aila; 5 poe ona alahao, ame na mea like e loaa ai ka waiwai i ke kanaka.
He elua mea nui e loaa ana ma keia papainoa, o ia o John D. Rockfeller, ka "Moi o ka Aila," a he kanaka Amerika. oia ke kanaka waiwai i hiki aku kona waiwaiio i ka biliona. O ka lua o na mea nui e loaa ana ma ka heluhelu ana i keia papainoa. oia ka like a like ana o ka waiwaiio auhau o na aina. e hoohui pu ana i na paka o ka lehulehu ame na wahi hoonaauao o Nu Ioka me ko keia poe. Ma ka hoike malalo iho nei o na huaolelo i apoia o ia na hoike no kahi ame ka hana i loaa ai ka waiwai i keia poe. a ma ka heluhelu akahele ana iho e hoomaopopo ai i na mea i hoikeia ae nei maluna.
1 - John D. Rockfeller, Amerika (aila) $1,000,000,000
2 - A. Beit, Aferika Hema (daimana) 500,000,000
3 - J. B. Robinson, Aferika Hema (lua gula) 400,000,000
4 - Czar, Rusia (hooilinaia) 307,000,000
5 - Andrew Carnegie, Amerika (kila) 250,000,000
6 - William Waldorf Astor, Amerika (waiwai paa) 200,000,000
7 - Prince Demodoff, Rusia (hooilinaia) 200,000,000
8 - Emepera Franz Josef, Austria (hooilinaia) 185,000,000
9 - William K. Vanderbilt, Amerika (mau alahao) 100,000,000
10 - William Rockfeller, Amerika (aila) 100,000,000
11 - Alii Leopold, Belekiuma (hooilina) 100,000,000
12 - Shah, Persia (hooilina) 100,000,000
13 - Grand Duke Vladimir, Rusia (hooilina) 100,000,000
14 - Marshall Field, Amerika (kalepa) 100,000,000
15 - Russell Sage, Amerika (hoopukapuka) 80,000,000
16 - John Jacob Astor, Amerika (hooilina) 75,000,000
17 - D. O. Mills, Amerika (banako) 75,000,000
18 - J. Pierpont Morgan, Amerika (banako) 75,000,000
19 - Lord Rothschild, Pelekane (banako) 75,000,000
20 - Duke of Westminster, Pelekane (hooilina) 75,000,000
21 - A. von Roelsch, Kelemania (banako) 70,000,000
22 - Sultan, Turkey (hooilina) 65,000,000
23 - J. J. Hill, Amerika (alahao) 60,000,000
24 - Archduke Frederick, Austria (hooilina) 60,000,000
25 - Lord Iveagh, Pelekane (hooilina) 55,000,000
26 - Senora Isadora Cousinho, Kili (hooilina) 55,000,000
27 - M. Heine, France (banako) 55,000,000
28 - George Gould, Amerika (alahao) 55,000,000
29 - H. H. Rogers, Amerika (aila) 50,000,000
30 - Sir Jervin Clark, Aukekelalia (hipa) 50,000,000
31 - Prince Lichtensten, Austria (hooilina) 50,000,000
32 - H. L. Flagler, Amerika (aila) 48,000,000
33 - A. Brehr, Austria (banako) 48,000,000
34 - Mrs. Hetty Green, Amerika (hoopukapuka) 45,000,000
35 - Henry Phipps, Amerika (kila) 45,000,000
36 - James Henry Smith, Amerika (hooilina) 40,000,000
37 - Duke of Devonshire, Pelekane (hooilina) 40,000,000
38 - Lorth Strapthcome, Canada (hoopukapuka) 40,000,000
39 - H. C. Frick, Amerika (kila) 40,000,000
40 - Mrs. Walker, Amerika (hooilina) 40,000,000
41 - Don Luia Wizperrazas, Mekiko (lua maina) 40,000,000
42 - Earl of Grosvenor, Pelekane (hooilina) 40,000,000
43 - J. D. Archibald, Amerika (aila) 40,000,000
44 - James B. Haggin, Amerika (lua gula) 40,000,000
45 - Grand Duke Michael, Rusia (hooilina) 40,000,000
46 - Earl o Derby, Pelekane (hooilina) 40,000,000
47 - Miss Bertha Krupp, Geremania (hooilina) 40,000,000
48 - John Smith, Mekiko (lua maina) 36,000,000
49 - Prince Henry o Pless, Geremania (hooilina) 36,000,000
50 - Count Henckel, Geremania (hooilina) 36,000,000
51 - A. G. Vanderbilt, Amerika (hooilina) 36,000,000
52 - John H. Flager, Amerika (hoopukapuka) 35,000,000
53 - Baron E. Rothschild, Paris (banako) 32,000,000
54 - C. Spreckles, Amerika (kopaa) 32,000,000
55 - Bihopa Kohn, Austria (hooilina) 32,000,000
56 - Frit Schwarzenzerger, Austria (hooilina) 32,000,000
57 - W. A. Clark, Amerika (lua maina) 32,000,000
58 - W. F. Havemeyer, Amerika (kopaa) 32,000,000
59 - Clarence Mackay, Amerika (hooilina) 32,000,000
60 - J. Ogden Armour, Amerika (pipi) 32,000,000
61 - P. A. B. Widener, Amerika (hoopukapuka) 30,000,000
62 - Baron A. Rothschild, Pelekane (banako) 28,000,000
63 - Duke dʻArenberg, Belekiuma (hooilina) 25,000,000
64 - Angelo Quinteri, Italia (hooilina) 25,000,000
65 - W. H. Tilford, Amerika (meaai) 25,000,000
66 - M. Noble, Rusia (aila) 25,000,000
67 - Baron Leitenberger, Austria (hooilina) 25,000,000
68 - Miss Helen Gould, Amerika (hooilina) 25,000,000
69 - Prince Jussupoff, Rusia (hooilina) 25,000,000
70 - Haku Armstrong, Pelekane (halehana waiwai) 25,000,000
71 - Haku Montshephen, Canada (waiwai paa) 25,000,000
72 - Duke o Portland, Pelekane (hooilina) 25,000,000
73 - Guszman Blanco, Farani (hoopukapuka) 25,000,000
74 - Thomas F. Ryan, Amerika (hoopukapuka) 25,000,000
75 - Haku Brassey, Pelekane (hooilina) 25,000,000
(E nana ma ka aoao eono.)